ឃាត់ខ្លួនខ្មែរចិនបួននាក់បម្រុងឆ្លងដែនតាមច្រករបៀងចូលប្រទេសថៃ ក្រោយមេខ្យល់រត់បាត់

បន្ទាយមានជ័យ៖ កម្លាំងតំបន់ប្រតិបត្តិការសឹករងបន្ទាយមានជ័យ ដឹកនាំដោយវរសេនីយ៍ឯក មាស ប៊ុនរុន មេបញ្ជាការរង និងជានាយសេនាធិការតំបន់ប្រតិបត្តិការសឹករងបន្ទាយមានជ័យ ឃាត់ខ្លួនជនជាតិខ្មែរចិនប្រុស-ស្រីបួនម្នាក់ បម្រុងឆ្លងដែនតាមច្រករបៀងចូលទៅប្រទេសថៃដោយខុសច្បាប់។
ការឃាត់នេះមានពលរដ្ឋខ្មែរប្រុស-ស្រី ចំនួន៣នាក់ និងជនជាតិចិនម្នាក់រួមមាន៖

១. ឈ្នោះ លី ពីងសុីង ភេទប្រុស អាយុ២៦ឆ្នាំ ជនជាតិចិន មកពីខេត្តកំពង់សោម ប្រុងឆ្លងដែនតាមថៃ និងបន្តទៅប្រទេសភូមា
២. ឈ្មោះ សឿន ផាន់នី ភេទប្រុស អាយុ ២៤ ជនជាតិខ្មែរ មកពីខេត្តកំពង់ធំ។
៣. ឈ្មោះ តឹក វុទ្ធី ភេទប្រុស អាយុ១៦ ឆ្នាំ ជនជាតិ​ខ្មែរ មកពីខេត្តកំពង់ធំ។
៤. ឈ្មោះ រ៉ា ពិសី ភេទស្រី អាយុ២០ ជនជាតិខ្មែរ រស់នៅភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត។

យោងតាមការណ៍រៀបរាប់របស់ពលរដ្ឋខ្មែរប្រាប់សមត្ថកិច្ចបានឱ្យដឹងថា ពួកគាត់បម្រុងឆ្លងដែនទៅធ្វើការ និងលក់ដូរនៅក្នងផ្សារលុងគ្លឿទឹកដីថៃ ជាប់ព្រំដែនកម្ពុជា-ថៃ  ដោយមេខ្យល់យកលុយក្នុង១នាក់ ៤,០០០បាត (បួនពាន់បាត)  និងជនជាតិចិនគេយកក្នុងម្នាក់ ៥,០០០បាត (ប្រាំពាន់បាត)។
ពួកគាត់បន្តថា បន្ទាប់ពីមេខ្យល់បាននាំពួកគាត់ដល់កន្លែងចម្ការដំឡូង នៅចំណុចចម្ការដំឡូងខាងក្រោយប៉ុស្តិ៍ដើម កកោះព្រៃគប់ ស្ថិតនៅក្នុងភូមិព្រៃគប់ សង្កាត់ផ្សារកណ្តាល ក្រុងប៉ោយប៉ែត ស្រាប់តែក្រុមមេខ្យល់បានគេចខ្លួនបាត់ស្រមោល។ រហូតដល់ព្រឹកឡើងនៅថ្ងៃទី២៣ ខែឧសភា ឆ្នាំ២០២១ ក៍ត្រូវសមត្ថកិច្ចឃាត់ខ្លួនតែម្តង។

លោកវរសេនីយ៍ឯក មាស ប៊ុនរុន មេបញ្ជាការរងនាយសេនាធិការតំបន់ប្រតិបត្តិការសឹករងបន្ទាយមានជ័យ បានឱ្យដឹងថា កម្លាំងរបស់លោកបានឃាត់ខ្លួនជនជាតិខ្មែរប្រុស-ស្រី ចំនួន៣នាក់ និងជនជាតិចិនម្នាក់ សរុបទាំងអស់ចំនួន៤នាក់បាននាំយកមក តំបន់ប្រតិបត្តិការសឹករងក្រុងប៉ោយប៉ែត ដើម្បីធ្វើកំណត់ហេតុ និងរង់ចាំបញ្ជួនទៅឱ្យជំនាញចាត់ការបន្ត ព្រមទាំងធ្វើចត្តាឡីស័ក៕

អត្ថបទ៖ ពៅ