ប្រទះឃើញពលករលួចឆ្លងដែន១៩នាក់ និងស្រាវជ្រាវចាប់បានមេខ្យល់២នាក់

បន្ទាយមានជ័យ៖ កម្លាំងនរបាលប៉ុស្តិ៍រដ្ឋបាលឃុំអូរបីជាន់ បានល្បាតក្នុងព្រៃប្ញស្សី ក្នុងភូមិសាស្ត្រ ភូមិប្រសាទ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បានប្រទះឃើញពលករខ្មែរលួចឆ្លងដែនទៅប្រទេសថៃ ចំនួន១៩នាក់ ក្នុងនោះស្រី៨នាក់ និងបាននាំពួកគេមកប៉ុស្តិ៍សួរនាំ រសៀលថ្ងៃទី២២ ខែឧសភា ឆ្នាំ២០២១។

ពលករបានឆ្លើយសារភាពថា មានមេខ្យល់២នាក់ធានាជូនពួកខ្លួនឆ្លងដែនទៅថៃដោយសុវត្តិភាព ទើបខ្លួនទៅ។

ក្រោយពីធ្វើការស្រាវជ្រាវ សមត្ថកិច្ចបានរកឃើញមេខ្យល់ចំនួន២នាក់ ១មាន ឈ្មោះ ម៉ៅ ដែ ភេទប្រុស​ អាយុ២៦ឆ្នាំ នៅភូមិប្រសាទ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ និង ម្នាក់ទៀតឈ្មោះ ពៅ បូរី ភេទប្រុស អាយុ២៨ឆ្នាំ នៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។

មេខ្យល់ត្រូវបញ្ជូនមកស្នងការខេត្តបន្ទាយមានជ័យ និងកសាងសំនុំរឿងបញ្ជូនទៅតុលាការដើម្បីដាក់ទោសទៅតាមច្បាប់។ ចំណែកពលករចំនួន១៩នាក់ ត្រូវបានបញ្ជូនឱ្យក្រុមការងារចម្រុះមណ្ឌលសំចតប្រចាំការនៅច្រកអូរបីជាន់ ដើម្បីត្រួតពិនិត្យ និងធ្វើចត្តាឡីស័កចំនួន១៤ថ្ងៃ ទើបអនុញ្ញាតឱ្យវិលត្រឡប់ទៅលំនៅដ្ឋានវិញ៕

អត្ថបទ៖ វ៉ាន់ ណាង