កូនឈើប្រណិត១ម៉ឺនដើម ត្រូវបានដាំនៅទីបញ្ជាការយោធភូមិភាគទី៤ តំបន់អង្គរ

ខេត្តសៀមរាប៖ នៅថ្ងៃទី០១ ខែមិថុនា ឆ្នាំ២០២១ លោក ហង់ ពៅ អគ្គនាយកអាជ្ញាធរជាតិអប្សរា និងសហការី បានអញ្ជើញចូលរួមពិធីប្រគល់ និងដាំកូនឈើចម្រុះចំនួន១ម៉ីនដើម នៅទីបញ្ជាការយោធភូមិភាគទី៤ ក្នុងតំបន់រមណីដ្ឋានអង្គរ។

ពិធីនេះប្រារព្វឡើងក្រោមអធិបតីភាព ឧត្តមសេនីយឯក ពៅ ហេង មេបញ្ជាការរងកងទ័ពជើងគោក និងជាមេបញ្ជាការដ្ឋានយោធភូមិភាគទី៤ និងលោក ហង់ ពៅ អគ្គនាយកអាជ្ញាធរជាតិអប្សរា លោក ពិន ប្រាកដ អភិបាលរងខេត្តសៀមរាប មេបញ្ជាការរង ខណ្ឌរដ្ឋបាលព្រៃឈើនៃមន្ទីរកសិកម្មរុក្ខាប្រមាញ់ និងនេសាទ តំណាងសហភាពសហព័ន្ធយុវជនកម្ពុជា ប្រធានចលនាយុវជន១៥៧ប្រចាំខេត្តសៀមរាប មន្ត្រីអាជ្ញាធរជាតិអប្សរា និងស្ថាប័នពាក់ព័ន្ធជាច្រើនទៀតចូលរួម។

ការដាំកូនឈើចម្រុះប្រភេទ បេង ធ្នង់ គ្រញូង និងនាងនួន លើផ្ទៃដីទំហំជាង ២.៥ហិកតានេះ ដើម្បីចូលរួមចំណែកក្នុងការថែរក្សា និងអភិរក្ស បរិស្ថានធម្មជាតិឱ្យកាន់តែមានភាពស្រស់បំព្រង នៅក្នុងបរិវេនយោធភូមិភាគទី៤ ជាពិសេសនៅក្នុងតំបន់រមណីដ្ឋានអង្គរទាំងមូល។

សូមជម្រាបជូនថា នេះជាឆ្នាំទីពីរហើយដែលអាជ្ញាធរជាតិអប្សរា សហការណ៍ជាមួយបញ្ជាការដ្ឋានយោធភូមិភាគទី៤ ដើម្បីដាំកូនឈើចម្រុះឡើងវិញ នៅបរិវេនទីបញ្ជាការដ្ឋានយោធភូមិភាគទី៤ ដែលលើកទី១បានដាំកាលពីអំឡុងខែឧសភា ឆ្នាំ២០២០ ចំនួនមួយម៉ឺនដើម និងលើកទីពីរប្រារព្ធឡើងក្នុងថ្ងៃទី១ ខែមិថុនា ឆ្នាំ២០២១នេះ ចំនួនមួយម៉ីនដើម៕

អត្ថបទ៖ គឿនវេត