ព័ត៌មានជាតិ
ស្ថានទូតអាមេរិក ៖ ទស្សនកិច្ចទៅមូលដ្ឋានកងទ័ពជើងទឹករាម បង្កើនតម្លាភាព
ឆ្លើយតបទៅនឹងរាជរដ្ឋាភិបាលកម្ពុជា ដែលបានសម្រេចអនុញ្ញាតឲ្យអនុព័ន្ធយោធា និងមន្ត្រីទូតអាមេរិកប្រចាំនៅប្រទេសកម្ពុជា ចុះទៅពិនិត្យមើលតំបន់មួយចំនួន នៅមូលដ្ឋានសមុទ្ររាម ដែលជាទីកន្លែងសហរដ្ឋអាមេរិកលើកឡើងថា កម្ពុជាបានផ្តល់មូលដ្ឋានឲ្យកងទ័ពចិននោះ ស្ថានទូតអាមេរិកប្រចាំកម្ពុជា លើកឡើងថា ការធ្វើទស្សនកិច្ចជាប្រចាំ និងជាញឹកញាប់ ដោយអនុព័ន្ធយោធាបរទេសទាំងអស់ ទៅមូលដ្ឋានកងទ័ពជើងទឹករាម អាចរួមចំណែកដល់ការបង្កើនតម្លាភាព។
លោក Chad Roedemeier មន្ត្រីអ្នកនាំពាក្យស្ថានទូតអាមេរិកប្រចាំកម្ពុជា បានប្រាប់ កម្ពុជាថ្មី នៅថ្ងៃទី៤ ខែមិថុនា ឆ្នាំ២០២១នេះថា អនុរដ្ឋមន្ត្រីក្រសួងការបរទេសអាមេរិកលោកស្រី Sherman បានសម្តែងការព្រួយបារម្ភយ៉ាងខ្លាំងអំពីសកម្មភាពយោធារបស់សាធារណរដ្ឋប្រជាមានិតចិន នៅមូលដ្ឋានកងទ័ពជើងទឹករាម ដែលធ្វើឲ្យអន្តរាយដល់អធិបតេយ្យភាពរបស់កម្ពុជា គំរាមកំហែងដល់សន្តិសុខក្នុងតំបន់ និងប៉ះពាល់ជាអវិជ្ជមានដល់ទំនាក់ទំនងរវាងកម្ពុជា-សហរដ្ឋអាមេរិក។
មន្ត្រីអ្នកនាំពាក្យស្ថានទូតអាមេរិកប្រចាំកម្ពុជារូបនេះ បានបញ្ជាក់បន្ថែមថា “ការធ្វើទស្សនកិច្ចជាប្រចាំ និងជាញឹកញាប់ ដោយអនុព័ន្ធយោធាបរទេសទាំងអស់ ទៅមូលដ្ឋានកងទ័ពជើងទឹករាម អាចរួមចំណែកដល់ការបង្កើនតម្លាភាព”។
លោក Chad Roedemeier មិនបានបង្ហាញកាលបរិច្ឆេទនៃដំណើរទស្សនកិច្ចនៅមូលដ្ឋានកងទ័ពជើងទឹករាម ខេត្តព្រះសីហនុ នៅពេលណានោះទេ។
កាលពីថ្ងៃទី០៣ ខែមិថុនា ឆ្នាំ២០២១ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានមានប្រសាសន៍ថា ក្រោយពីមានការឯកភាពរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្រសួងការពារជាតិ បានសម្រេចឲ្យខាងភាគីអាមេរិកចុះត្រួតពិនិត្យកន្លែងមួយចំនួននៅក្នុងមូលដ្ឋានសមុទ្ររាម ដែលគេបានចោទប្រកាន់កម្ពុជាម្តងហើយម្តងទៀតថា កម្ពុជាយើងបានអនុញ្ញាតឲ្យកងទ័ពចិន ដាក់មូលដ្ឋាននៅទីនោះ។
សម្តេចពិជ័យសេនា ទៀ បាញ់ បានបញ្ជាក់ថា៖ “យើងមិនបានហាមប្រាមក្នុងការស្នើសុំរបស់អាមេរិកទេ ហើយគេជាអ្នកចោទយើងខ្លួនឯង។ គេលើកគេដាក់អ្វីក៏ខ្លួនឯង ដូច្នេះដើម្បីឲ្យអស់សង្ស័យ យើងអនុញ្ញាតឲ្យគេទៅត្រួតពិនិត្យផ្ទាល់ ប៉ុន្តែមិនមែនឲ្យត្រួតគ្រប់ទីកន្លែងស្រេចតែចិត្តគេចង់បាននោះទេ ធម្មតាកន្លែងកងទ័ព នៃប្រទេសនីមួយៗមិនចេះតែបង្ហាញផ្ដេសផ្ដាសនោះឡើយ ហើយការចុះពិនិត្យនេះ គឺយើងបានកំណត់ច្បាស់លាស់ ពោលគឺឲ្យចំកន្លែងដែលគេសង្ស័យយើងតែប៉ុណ្ណោះ”។
សម្តេចពិជ័យសេនា ទៀ បាញ់ បានលើកឡើងទៀតថា នាពេលនេះ ក្រុមការងារក្រសួងការពារជាតិរបស់កម្ពុជា និងក្រុមការងាររបស់ភាគីអាមេរិក កំពុងធ្វើកិច្ចការងារទាំងនេះហើយ ដូច្នេះវានឹងដំណើរការពេលឆាប់នេះ ដើម្បីជម្រះឲ្យអស់មន្ទិលសង្ស័យ និងឲ្យគេអស់ចិត្តកុំឲ្យពួកគេចេះតែចោទកម្ពុជាម្តងហើយម្តងទៀត ឥតឈប់ឈរនោះ។
គួររំលឹកថា ការអនុញ្ញាតឲ្យភាគីអាមេរិកចូលពិនិត្យមើលតំបន់មួយចំនួននៅមូលដ្ឋានសមុទ្ររាមរបស់កម្ពុជានេះ គឺបានធ្វើឡើងបន្ទាប់ពីលោកស្រី Wendy Ruth Sherman អនុរដ្ឋមន្ត្រីការបរទេសអាមេរិក បានស្នើសុំសម្តេចតេជោ ហ៊ុន សែន ចុះពិនិត្យមើលកំពង់ផែនេះ ក្នុងពេលជំនួបជាមួយសម្តេច ក្នុងអំឡុងពេលដែល លោកស្រីមកបំពេញទស្សនកិច្ចប្រទេសកម្ពុជា កាលពីរសៀលថ្ងៃទី១ ខែមិថុនាកន្លងទៅនេះ៕
អត្ថបទ៖ ច័ន្ទ វីរៈ
-
កីឡា១ សប្តាហ៍ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៦ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ២ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ១ សប្តាហ៍ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៦ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ១ សប្តាហ៍ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានជាតិ៥ ថ្ងៃ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?
-
ជីវិតកម្សាន្ដ១ ថ្ងៃ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»