ព័ត៌មានជាតិ
មកដល់ពេលនេះ កម្ពុជាទទួលបានវ៉ាក់សាំងការពារជំងឺកូវីដ ‑១៩ជាង៧លានដូសហើយ
រហូតមកដល់ពេលនេះ កម្ពុជាបានទទួលវ៉ាក់សាំងការពារជំងឺកូវីដ‑១៩ជាង៧លានដូសហើយសម្រាប់ចាក់ជូនដល់ពលរដ្ឋគោលដៅប្រមាណ១០លាននាក់។
បើតាមរបាយការណ៍របស់ក្រសួងសុខាភិបាលបានឱ្យដឹងថា ក្នុងចំណោមវ៉ាក់សាំងប្រមាណជាង៧លាននាក់នោះ ក្នុងនោះមានវ៉ាក់សាំងប្រភេទស៊ីណូវ៉ាក់ដែលរាជរដ្ឋាភិបាលបានបញ្ជាទិញពីរដ្ឋាភិបាលចិនចំនួន៤លាន៥០ម៉ឺនដូសសម្រាប់ចាក់លើក្រុមមនុស្សដែលមានអាយុចាប់ពី១៨ឆ្នាំឡើងទៅ។
វ៉ាក់សាំងប្រភេទ ស៊ីណូហ្វាមដែលជាជំនួយរបស់រដ្ឋាភិបាលចិនផ្តល់ឱ្យរដ្ឋាភិបាលកម្ពុជាចំនួន២លាន២សែនដូសសម្រាប់ចាក់ដល់ក្រុមមនុស្សមានអាយុចាប់ពី១៨ឆ្នាំរហូតដល់៥៩ឆ្នាំ។ វ៉ាក់សាំងកូវីសែលដែលផលិតដោយក្រុមហ៊ុនអាស្ត្រាហ្សេនេកាតាមរយៈគម្រោងកូវ៉ាក់មានចំនួន៣២៤០០០ដូសសម្រាប់ចាក់លើក្រុមមនុ្សដែលមានអាយុចាប់ពី៦០ឆ្នាំឡើងទៅ។
វ៉ាក់សាំងជាង៧លានដូសនេះ បូកទាំងវ៉ាក់សាំងដែលបានដឹកមកដល់កម្ពុជានៅព្រឹកថ្ងៃទី០៨ ខែមិថុនា ឆ្នាំ២០២១ចំនួន១លានដូសក្នុងនោះវ៉ាក់សាំងស៊ីណូវ៉ាក់ចំនួន៥០ម៉ឺនដូសដែលរដ្ឋាភិបាលបានបញ្ជាទិញពីចិន និង៥០ម៉ឺនដូសទៀតជាវ៉ាក់សាំងស៊ីណូហ្វាមជាជំនួយរបស់រដ្ឋាភិបាលចិនផ្តល់ឱ្យកម្ពុជា។
លោកស្រីវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល និងជាប្រធានក្រុមការងារប្រតិបត្តិការបច្ចេកទេសនិងផ្គត់ផ្គង់នៃគណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ-១៩ បានឱ្យដឹងថា៖ «ក្រៅពីវ៉ាក់សាំង១លានដូសដែលដឹកមកដល់ព្រឹកនេះ វ៉ាក់សាំងស៊ីណូវ៉ាក់ចំនួន២លានដូសទៀតនឹងដឹកមកដល់កម្ពុជាជាបន្តបន្ទាប់ទៀតសម្រាប់ចាក់ជួនពលរដ្ឋនៅរាជធានីភ្នំពេញនិងទីប្រជុំជនខេត្តកណ្តាល។»
លោកស្រី បានបន្តថា បើមិនមានអ្វីប្រែប្រួលទេវ៉ាក់សាំង១លានដូសនឹងមកដល់ថ្ងៃទី១២ខែមិថុនា និង១លានដូសទៀតនឹងមកដល់ថ្ងៃទី១៩មិថុនាខាងមុខនេះ។ ទាំងវ៉ាក់សាំង១លានដូសនិង២លានដូសដែលដឹកមកដល់ខាងមុខនេះនឹងយកទៅចាក់ដល់ពលរដ្ឋនៅភ្នំពេញឱ្យរួចរាល់និងចាក់នៅតាមទីប្រជុំជននៃខេត្តកណ្តាល។ បន្ទាប់មករដ្ឋាភិបាលនឹងបន្តចាក់នៅតាមរាជធានីខេត្តដែលប្រឈមខ្ពស់ពិសេសខេត្តដែលមានកម្មកររោងចក្រច្រើន។
លោក ស្រី វេជ្ជបណ្ឌិត ឱ វណ្ណឌីន រដ្ឋលេខាធិការនិងជាអ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ (គ.វ.ក១៩)បានមានប្រសាសន៍ថា គ.វ.ក១៩ នឹងចាប់ផ្តើមបើកយុទ្ធនាការចាក់វ៉ាក់សាំងការពារជំងឺកូវីដ‑១៩ដល់ប្រជាពលរដ្ឋរស់នៅក្រុងតាខ្មៅ ខេត្តកណ្តាលនៅថ្ងៃទី១០ ខែមិថុនា ឆ្នាំ២០២១ខាងមុខនេះ។
លោកស្រី បានបន្តថា ក្រៅពីនេះគ.វ.ក១៩ នឹងបើកយុទ្ធនាការបន្តទៀតសម្រាប់ចាក់នៅខណ្ឌចំនួន៣ទៀតនៅរាជធានីភ្នំពេញដែលនៅសេសសល់ គឺខណ្ឌដូនពេញ ខណ្ឌព្រែកព្នៅ និងខណ្ឌជ្រោយចង្វារដោយដូសទី១ចាក់ពីចាប់ពីថ្ងៃទី១០ដល់ថ្ងៃទី២៣ខែមិថុនានិងដូសទី២ចាប់ពីថ្ងៃទី២៥ខែមិថុនាដល់ថ្ងៃទី៨ខែកក្កដាឆ្នាំ២០២១ ។
លោកស្រី រំពឹងទុកថា នឹងអាចចាក់អស់គ្រប់បុគ្គលដែលមានអាយុចាប់ពី១៨ឆ្នាំឡើង នៅរាជធានីភ្នំពេញនៅខែកក្កដាខាងមុខនេះខណៈបច្ចុប្បន្នកំពុងចាក់ជួនប្រជាពលរដ្ឋចំនួន១១ខណ្ឌហើយមានខណ្ឌខ្លះបានចាក់រួចរាល់និងខណ្ឌខ្លះទៀតកំពុងដំណើរការចាក់។
គួរបញ្ជាក់ថា គិតចាប់ពីថ្ងៃទី១០ ខែកុម្ភៈ ឆ្នាំ២០២១ រហូតមកដល់ថ្ងៃទី៧ខែមិថុនាឆ្នាំ២០២១នេះ កម្ពុជាបានចាក់វ៉ាក់សាំងដល់ពលរដ្ឋបានចំនួន ២ ៧៦៦ ១៩៨នាក់ ស្មើនឹង២៧.៦៦ភាគរយនៃធៀបនឹងគោលដៅប្រមាណ១០លាននាក់៕
អត្ថបទ៖ សំអឿន
-
កីឡា១ សប្តាហ៍ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៦ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ២ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ១ សប្តាហ៍ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៦ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ១ សប្តាហ៍ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានជាតិ៦ ថ្ងៃ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?
-
កីឡា៣ ថ្ងៃ ago
ជើងឯកម៉ុងហ្គោលី Erdene អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត