Connect with us

ព័ត៌មានជាតិ

ឆ្នាំ២០២៥ ត្រូវតែមាន ទឹកស្អាត ដល់ទីប្រជុំជននិងឆ្នាំ២០៣០ ប្រជាជន នឹងទទួលបានទឹកស្អាតប្រេីប្រាស់គ្រប់គ្នាៗ

បានផុស

នៅ

លោកកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានបញ្ជាក់ថា បេសកកម្មរបស់រាជរដ្ឋាភិបាល ក៏ដូចជាទស្សន:វិស័យរបស់ក្រសួងត្រូវខិតខំរួមគ្នាសម្រេចឲ្យបាននូវគោលដៅអភិវឌ្ឍវិស័យទឹកស្អាតដោយកំណត់ថា នៅឆ្នាំ២០២៥ ទីប្រជុំជនត្រូវមានទឹកស្អាតប្រេីប្រាស់ និងឆ្នាំ២០៣០ ប្រជាជន នឹងទទួលបានទឹកស្អាតប្រេីប្រាស់គ្រប់គ្នាៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តីរដ្ឋមន្ត្រីក្រសួង ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ថ្លែងបែបនេះ ខណៈទទួលជួបលោកស្រីEva Nguyen Binh ឯកអគ្គរដ្ឋទូតសាធារណរដ្ឋ បារាំង ប្រចាំកម្ពុជា នាថ្ងៃម្សិលមិញ ដេីម្បីសម្តែងការគួរសម ពិភាក្សាការងារ និងជម្រាបលា ក្នុងឱកាសដែលបញ្ចប់អណត្តិបេសកកម្មការទូតរយ:ពេល៤ឆ្នាំនៅកម្ពុជា ។

នៅក្នុងជំនួបនោះ លោកកិត្តិសេដ្ឋាបណ្ឌិត ទេសរដ្ឋមន្រ្តី ចម ប្រសិទ្ធ បានវាយតម្លៃខ្ពស់ និងកោតសរសើរ ចំពោះ បេសកកម្ម កាទូតរបស់លោកស្រីឯកអគ្គរដ្ឋទូត បារាំង នៅកម្ពុជា ក្នុង ការ ជំរុញ ទំនាក់ទំនង និង កិច្ចសហប្រតិបត្តិការល្អប្រសេីររវាងកម្ពុជា-បារាំង ។ ក្នុងនោះជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ប្រទេស​បារាំង តាមរយ:ទីភ្នាក់ងារអភិវឌ្ឍបារាំង (AFD) បានដេីរតួយ៉ាងសំខាន់ លេីវិស័យទឹកស្អាត ក្នុងគម្រោងធំៗជាច្រេីន ។ ជាក់ស្តែង ដូចជា រោងចក្រប្រព្រឹត្តកម្មទឹកស្អាត បាក់ខែង ទី២ ដែលទេីបសម្ពោធបេីកការដ្ឋានថ្មីៗនេះ ក្នុងទឹកប្រាក់រាប់រយលានដុល្លារ ដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃ ព្រះរាជាណាចក្រ កម្ពុជា ។

លោក កិត្តិសេដ្ឋាបណ្ឌិត ទេសរដ្ឋមន្រ្តី ចម ប្រសិទ្ធ បានបញ្ជាក់បន្ថែមថា៖ បេសកកម្ម របស់ រាជរដ្ឋាភិបាល ក៏ដូចជា ទស្សន:វិស័យរបស់ក្រសួងត្រូវខិតខំរួមគ្នាសម្រេចឲ្យបាននូវគោលដៅអភិវឌ្ឍវិស័យទឹកស្អាតដោយកំណត់ថា នៅឆ្នាំ ២០២៥ ទីប្រជុំជន ត្រូវមាន ទឹកស្អាត ប្រេីប្រាស់ និងឆ្នាំ២០៣០ ប្រជាជន នឹងទទួល បាន ទឹកស្អាត ប្រេីប្រាស់ គ្រប់គ្នា ។ ចំណុចនេះ លោក កិត្តិសេដ្ឋាបណ្ឌិត បានស្នេីឲ្យភាគីបារាំងពិនិត្យលទ្ធភាពវិនិយោគ ឬផ្តល់កម្ចី ឥណទាន លេីវិស័យទឹកស្អាត បន្ថែម និងបន្តបន្ទាប់ទៀត ។ ក្នុងនោះចំពោះមុខ គឺស្នេីឲ្យភាគីបារាំង ចាប់អារម្មណ៍ យកចិត្តទុកដាក់ ចំពោះ គម្រោងរោងចក្រប្រព្រឹត្តិកម្មទឹកស្អាតបាក់ខែងទី៣ ដេីម្បីគិតគូដោះស្រាយឲ្យបានទាន់ពេលវេលា នៃតម្រូវការ ប្រេីប្រាស់ទឹកស្អាតរបស់ប្រជាពលរដ្ឋក្នុងរាជធានីភ្នំពេញ ដែលមានផ្ទៃក្រលាដីកាន់តែរីកធំឡេីង ។

លោកស្រី Eva Nguyen Binh ឯកអគ្គរដ្ឋទូត បារាំង ប្រចាំ កម្ពុជា ដែល ទេីបចប់ អណត្តិ បានម្តែង នូវទឹកចិត្តរីករាយចំពោះការបំពេញបេសកកម្មការទូតនៅកម្ពុជា ដែល ទទួលបាន លទ្ធផល ផ្លែផ្កា តាមរយៈ កិច្ចសហការ ដ៏ល្អ ប្រសេីរ នៃគ្រប់ភាគី និងស្ថាប័នពាក់ព័ន្ធ កម្ពុជា រួមទាំងជាមួយក្រសួងឧស្សាហម្ម វិទ្យាសាស្ត្រ បច្ចេកវិទ្យា និងនវានុវត្តន៍ ផងដែរ ជាពិសេស លេីវិស័យទឹកស្អាត ។ លោកស្រី ឯកអគ្គរដ្ឋទូត បានបញ្ជាក់ថា៖វិស័យទឹកស្អាត ជាវិស័យ ដ៏មានសារ:សំខាន់សម្រាប់ មនុស្សគ្រប់រូប ។ ដូច្នេះ ប្រទេសបារាំង មានការយកចិត្តទុកដាក់លេីវិស័យនេះ ហេីយច្បាស់ណាស់ការអភិវឌ្ឍន៍គម្រោងទឹកស្អាត របស់បារាំងនៅកម្ពុជា នឹងនៅតែស្ថិតក្នុងកត្តាអាទិភាពមួយ ។

នៅក្នុងឱកាសនោះផងដែរ ដៃគូសន្ទនា ក៏បានលេីកឡេីងពីផលបះពាល់ជាសាកលផែ្នកសេដ្ឋកិច្ចចំពោះក៏ដូចជា ហិរញ្ញវត្ថុ ពីការរីករាលដាលនៃមេរោគឆ្លងកូវីដ១៩ ។ ក្នុងនោះលោកស្រីឯកអគ្គ រដ្ឋ ទូត បារាំង បានវាយតម្លៃខ្ពស់ ចំពោះកិច្ចខិតខំប្រឹងប្រែងរបស់កម្ពុជា លេីការទប់ស្កាត់ការរីករាលដាលនៃជំងឺកូវីដ១៩ និងយុទ្ធនាការចាក់វ៉ាក់សាំងយ៉ាងផុលផុស ។ ជាមួយគ្នានេះ លោកស្រី ឯកអគ្គរដ្ឋទូត ក៏បានផ្តល់សារ: សំខាន់ ទៅលេីវិស័យ វិទ្យាសាស្ត្រ បច្ចេកវិទ្យា និងនវានុវត្តន៍ ដែលជាបេសកកម្មថ្មីរបស់ក្រសួង ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្រោមការដឹកនាំរបស់ លោកកិត្តិសេដ្ឋាបណ្ឌិត ទេសរដ្ឋមន្រ្តី ចម ប្រសិទ្ធ ផងដែរ ៕

អត្ថបទ ៖ វិមាន

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម