ចុះ​បន្ត​ពិនិត្យ​គ្រួសារ​គោលដៅ​ ដែល​ជួប​ទុក្ខ​លំបាក​ដោយ​កូវីដ​លើ​ជីវភាព​ ដើម្បី​ទទួល​សាច់​ប្រាក់ក្រោយ​បិទ​ខ្ទប់

លោក ឈួរ សុបញ្ញា ប្រធាននាយកដ្ឋានសុខុមាលភាពសង្គមនៃក្រសួងសង្គម​កិច្ច​អតីតយុទ្ធជននិងយុវនីតិសម្បទា បានថ្លែងនូវ​ការជម្រុញដល់ក្រុមការងារ ចុះបន្ត​ពិនិត្យ​គ្រួសារ​គោលដៅ​ដែល​ជួបទុក្ខលំបាក​ដោយកូវីដ ១៩ លើ​ជីវភាព ដើម្បីទទួល​សាច់ប្រាក់​ឧបត្ថម្ភ​របស់​រាជរដ្ឋាភិបាល​ក្នុងខែ មិថុនា នេះក្រោយបិទខ្ទប់ ។

លោក ឈួរ សុបញ្ញា ថ្លែងបែបនេះខណៈពេលរួមសហការជាមួយលោក កែវ អ៊ូលី ប្រធាន​នាយកដ្ឋាន​អត្តសញ្ញាណកម្ម​គ្រួសារក្រីក្រ នៃ​អគ្គនាយកផែនការក្រសួង​ផែនការ​ បានចុះពិនិត្យ​ស្ថានភាព​បើកប្រាក់​ឧបត្ថម្ភពីកម្មវិធីជំនួយសង្គមជាសាច់ប្រាក់ក្រោយពេលបិទខ្ទប់។ សកម្មភាព​មនុស្សធម៏​ដ៍​ថ្លៃថ្លា​របស់​រាជរដ្ឋាភិបាល​នេះ ​គឺ​សម្រាប់​ប្រជាពលរដ្ឋ និង​គ្រួសារ​ប្រជាពលរដ្ឋ​មាន​ការ​លំបាក​ផ្នែក​ជីវភាព ប្រជាពលរដ្ឋ និងគ្រួសារប្រជាពលរដ្ឋដែលមានអ្នកឆ្លងជំងឺកូវីដ ១៩ និង​មាន​ការ​លំបាក​ផ្នែក​ជីវភាព​និង​គ្រួសារ​ប្រជាពលរដ្ឋដែលមានអ្នកស្លាប់ដោយសារជំងឺកូវីដ ១៩ ក្នុង​ព្រឹត្តិការណ៍ ២០ កុម្ភៈ ២០២១ នៅក្នុង​សង្កាត់ស្ទឹងមានជ័យ៣ ខណ្ឌមានជ័យ រាជ ធានីភ្នំពេញ ។

លោកប្រធាននាយកដ្ឋានសុខុមាលភាពសង្គមបានថ្លែងបន្តថា យោង​តាម​អនុសាសន៍​ដ៍​ខ្ពង់ខ្ពស់​របស់​សម្តេច​តេជោ​និង​សេចក្តី​ណែនាំ​នីតិវិធី និងយន្តការបើកផ្តល់​កម្មវិធីជំនួយសង្គម​ជាសាច់ប្រាក់ក្រោយ​ពេល​បិទខ្ទប់​រួចមកក្រសួងសង្គមកិច្ចនិងក្រសួងពាក់ព័ន្ធបានសហការចុះ​ពិនិត្យ​តាមដាន​យ៉ាងយកចិត្តទុកដាក់ ចំពោះគ្រួសារគោលដៅសម្រាប់ប្រជាពលរដ្ឋ និងគ្រួសារ​មាន​ការលំបាកផ្នែកជីវភាព ប្រជាពលរដ្ឋ និងគ្រួសារដែលមានអ្នកឆ្លងនិងជំងឺកូវីដ ១៩ ។ លើស​ពី​នេះ​ពួកគាត់មានការលំបាកផ្នែកជីវភាព និងគ្រួសារដែលមានអ្នកស្លាប់ដោយជំងឺកូវីដ ១៩ ក្នុងព្រឹត្តិការណ៍ ២០ កុម្ភៈ ២០២១ និងការអនុវត្តកម្ម វិធីការងារក្នុងដំណាក់កាលបរិបទកូវីដ-១៩។

លោកបានបន្តថា កម្មវិធីជំនួយសង្គមជាសាច់ប្រាក់ក្រោយពេលបិទខ្ទប់​របស់​រាជរដ្ឋាភិបាល​មាន​សារៈសំខាន់​ណាស់​សម្រាប់​ជួយដល់បងប្អូនប្រជាពលរដ្ឋដែលបានបាត់បង់ប្រាក់ចំណូល ឬ​បាត់បង់​ការងារ​ដោយសារ​ការបិទខ្ទប់ពិសេសបងប្អូនមានផ្ទុកកូវីដ១៩ និង​គ្រួសារអ្នកស្លាប់​​ដោយសារ​កូវីដ១៩តែ​ម្ដង។ គ្រួសារគោលដៅដែលងាយរងគ្រោះ​លើ​បញ្ហា​ជីវភាព​ប្រចាំថ្ងៃ​ដោយសារ​កូវីដ ១៩ ដូចជា អ្នក​លក់ដូរជាកញ្ច្រែងតាមផ្សារ អ្នកលក់ដូរតាមផ្លូវ អ្នករត់​ម៉ូតូឌុប អ្នករត់​ម៉ូតូ​កង់បី អ្នកធាក់ស៊ីក្លូ អ្នកស៊ីឈ្នួលបើកបរថយន្ត កម្មករផ្នែកដឹកជញ្ជូន កម្មករប្រមូល​សំរាម កម្មករ​សំណង់ អ្នក​រើសអេតចាយ អ្នក​បម្រើសេវាកំសាន្ត អ្នកបម្រើ​សេវាវិស័យទេស ចរណ៍ នៅ​រាជធានីភ្នំពេញ ក្រុង​តាខ្មៅនៃខេត្តកណ្តាល និងក្រុព្រះសីហនុ នៃ​ខេត្តព្រះសីហនុ​និង​ខេត្ត​មួយ​ចំនួន​ខ្លះទៀត ៕

អត្ថបទ៖ វិមាន