ព័ត៌មានជាតិ

ក្រសួងធម្មការណែនាំដល់គ្រប់វត្តអារាមត្រូវរៀបចំតុបតែងលម្អឱ្យបានស្អាត អបអរព្រះរាជពិធីបុណ្យចម្រើនព្រះជន្មសម្តេចម៉ែ

បានផុស

៣ years មុន

នៅ

ថ្ងៃព្រហស្បតិ៍ ១៧ មិថុនា ២០២១

ដោយ

ក្រសួងធម្មការនិងសាសនា បានណែនាំដល់គ្រប់វត្តអារាមនៅទូទាំងប្រទេស ត្រូវរៀបចំតុបតែងលម្អនៅទីធ្លាក្នុងវត្ត និងកន្លែងសក្ការបូជាឱ្យបានស្អាត ដើម្បីចូលរួមអបអរសាទរព្រះរាជពិធីបុណ្យចម្រើនព្រះជន្មសម្ដេចព្រះមហាក្សត្រីនរោត្ដមមុនិនាថសីហនុ ព្រះវររាជមាតាជាតិខ្មែរ ក្នុងសេរីភាពសេចកី្តថ្លៃថ្នូរនិងសុភមង្គល ក្នុងគម្រប់ព្រះជន្ម៨៥យាងចូល៨៦ព្រះវស្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឈិត សុខុន រដ្ឋមន្ត្រីក្រសួងធម្មការ និងសាសនា បានឱ្យដឹងនៅក្នុងសេចក្តីជូនដំណឹងថាជារៀងរាល់ឆ្នាំ រាជរដ្ឋាភិបាលរួមជាមួយព្រះរាជវង្សានុវង្ស ថ្នាក់ដឹកនាំគ្រប់លំដាប់ថ្នាក់ មន្ត្រីរាជការតាមក្រសួងរដ្ឋលេខាធិការដ្ឋាន ស្ថាប័ននិងរដ្ឋបាលរាជធានីខេត្ត ព្រមទាំងប្រជារាស្ត្រទូទាំងប្រទេសតែងតែប្រារព្ធពិធីបុណ្យចម្រើនព្រះជន្មថ្វាយសម្ដេចព្រះមហាក្សត្រីនរោត្ដមមុនិនាថសីហនុព្រះវររាជមាតាជាតិខ្មែរ ក្នុងសេរីភាព សេចកី្តថ្លៃថ្នូរ និងសុភមង្គល តាមប្រពៃណីស្របតាមព្រះរាជប្បវេណីពីបុរាណនិងប្រពៃណីសាសនា។

លោករដ្ឋមន្ត្រីបានបន្តថា ការប្រារព្ធពិធីបុណ្យចម្រើនព្រះជន្មដើម្បីសម្ដែងនូវកតញ្ញុតាធម៌តបស្នងព្រះមហាករុណាទិគុណដ៏ធំធេង ដែលព្រះអង្គបានលះបង់ព្រះកាយពលព្រះបញ្ញាញាណក្នុងព្រះរាជសកម្មភាពដ៏ឧត្ដុង្គឧត្ដមដើម្បីបុព្វហេតុជាតិមាតុភូមិនិងប្រជារាស្ត្រជាកូនចៅ ចៅទួតរបស់ព្រះអង្គ ជាពិសេសលើវិស័យមនុស្សធម៌អប់រំសង្គមកិច្ចសុខមាលភាពទូទៅនិងចូលរួមអបអរសាទរថ្វាយព្រះរាជសព្វសាធុការ មហាប្រសើរថ្វាយសម្ដេចមហាក្សត្រីព្រះវររាជមាតាជាតិខ្មែរជាទីសក្ការដ៏ខ្ពង់ខ្ពស់បំផុតក្នុងឱកាសព្រះរាជពិធីបុណ្យចម្រើនព្រះជន្មព្រោះព្រះអង្គគម្រប់ព្រះជន្ម៨៥យាងចូល៨៦ ព្រះវស្សា។

លោករដ្ឋមន្ត្រីបានបន្តទៀតថា ឆ្នាំនេះព្រះរាជពិធីបុណ្យចម្រើនព្រះជន្មវស្សាថ្វាយសម្ដេចព្រះមហាក្សត្រីព្រះវររាជបិតាជាតិខ្មែរជាទីសក្ការៈដ៏ខ្ពង់ខ្ពស់នឹងប្រព្រឹត្តទៅនៅថ្ងៃសុក្រទី១៨ ខែមិថុនា ឆ្នាំ២០២១ក្នុងបរិការណ៍នៃព្រឹត្តិការណ៍សហគមន៍២០កុម្ភៈនៅតែបន្តឆ្លងរីករាលដាលតាមរាជធានីនិងគ្រប់ខេត្តទូទាំងប្រទេស។

លោករដ្ឋមន្ត្រីបានបន្ថែមទៀតថា ដើម្បីចូលរួមជាមួយរាជរដ្ឋាភិបាលនិងក្រសួងសុខាភិបាលក្នុងការអនុវត្តវិធានការចាំបាច់នានាសំដៅកាត់ផ្ដាច់និងទប់ស្កាត់ជំងឺដ៏កាចសាហាវនេះក្រសួងធម្មការនិងសាសនាសូមធ្វើការណែនាំតែគ្រប់មន្ទីរធម្មការនិងសាសនារាជធានីខេត្តថាឆ្នាំនេះមិនមានការរៀបចំប្រជុំផ្សព្វផ្សាយសេចក្តីណែនាំស្ដីពីការចាត់តាំងរៀបចំព្រះរាជពិធីបុណ្យចម្រើនព្រះជន្មសម្ដេចព្រះមហាក្សត្រីព្រះវររាជមាតាជាតិខ្មែរជាទីសក្ការៈដ៏ខ្ពង់ខ្ពស់បំផុតក្នុងគម្រប់ព្រះជន្ម៨៥យាងចូល៨៦ព្រះវស្សាទេ។

យ៉ាងណាក៏ដោយ លោករដ្ឋមន្ត្រីបានណែនាំដល់មន្ទីរធម្មការនិងសាសនារាជធានីខេត្តត្រូវណែនាំគ្រប់វត្តអារាមត្រូវធ្វើការបោសសំអាតទីធ្លាក្នុងវត្តនិងកន្លែងសក្ការៈបូជាឱ្យបានស្អាតតុបតែងលម្អទង់ជាតិទង់សាសនាទង់ព្រះមហាក្សត្របដាពាក្យស្លោកនិងរៀបចំតាំងព្រះបរមឆាយាល័ក្ខណ៍សម្ដេចព្រះមហាក្សត្រីព្រះវររាជមាតាជាតិខ្មែរដោយមានតុបតែងលំអឲ្យបានសមរម្យ។

លោករដ្ឋមន្ត្រីបានស្នើឱ្យលោកប្រធានមន្ទីរធម្មការនិងសាសនារាជធានីខេត្តអនុវត្តន៍សេចក្តីណែនាំនេះឱ្យមានប្រសិទ្ធភាពខ្ពស់និងទទួលបានលទ្ធផលល្អប្រសើរឲ្យបានស្របទៅតាមវិធានការទប់ស្កាត់ការឆ្លងរាលដាលជំងឺកូវីដ១៩៕

អត្ថបទ ៖ សំអឿន