ព័ត៌មានជាតិ

បេក្ខជនឈរឈ្មោះទាំងអស់ត្រូវតែមានលក្ខណៈសម្បត្តិ និងប្រជាប្រិយភាព ទាំងសុខភាព និងទាំងសមត្ថភាព

បានផុស

៣ years មុន

នៅ

ថ្ងៃសុក្រ ១៨ មិថុនា ២០២១

ដោយ

ភ្នំពេញ ៖ ក្នុងកិច្ចប្រជុំផ្សព្វផ្សាយផែនការចាត់តាំងអនុវត្តសេចក្តីសម្រេចស្តីពីផែនការរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ កាលពីល្ងាចថ្ងៃទី១៧ ខែមិថុនា ឆ្នាំ២០២១ លោកសុខ សម្បត្តិ ប្រធានគណៈកម្មាធិការគណបក្សខណ្ឌព្រែកព្នៅ បានលើកឡើងថា ឆ្នាំនេះមិនមានការបោះឆ្នោតសាកល្បងជ្រើសរើសក្រុមប្រឹក្សា ឃុំ សង្កាត់ ដូចឆ្នាំកន្លងមកនោះទេ តែបេក្ខជនឈរឈ្មោះទាំងអស់ត្រូវតែមានលក្ខណៈសម្បត្តិ និងប្រជាប្រិយភាព សុខភាព និងទាំងសមត្ថភាពនៅក្នុងមូលដ្ឋាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកសុខ សម្បត្តិ បន្តថា ដោយអនុលោមតាមសភាពការណ៍នាពេលបច្ចុប្បន្ន សង្កាត់នីមួយៗត្រូវជ្រើសរើសឲ្យបាន ទាំងបេក្ខជនពេញសិទ្ធ និងទាំងបេក្ខជនបម្រុងត្រូវមានចំនួនលើសពីរដងនៃចំនួនអាសនៈ យ៉ាងតិចពីរនាក់ឡើង(ឧទាហរណ៍ ៥+៥+២=១២ឡើង)ហើយក្នុងនោះមានបេក្ខនារីផងដែរ។ ក្នុងបញ្ជីទាំងមូល ត្រូវមានយុវជន(អយុ៤៥ឆ្នាំចុះ)យ៉ាងតិច១/៣នៅក្នុងបេក្ខជនពេញសិទ្ធ និង១/៣នៅក្នុងបេក្ខជនបម្រុង។ បេក្ខជនដែលឈរលំដាប់លេខរៀងអាចជាប់ឆ្នោតគម្បីត្រូវធានាឲ្យបានទាំងប្រជាប្រីយភាព ទាំងសុខភាព និងទាំងសមត្ថភាពបំពេញការងារជូនប្រជាជន ជូនប្រទេសជាតិ និងជូនគណបក្ស។

ចំណែកលោក រស់ សូផាន់ អនុប្រធានទី១ក្រុមការងារចុះជួយខណ្ឌព្រែកព្នៅ បានមានប្រសាសន៍ថា ក្រុមការងារចុះជួយខណ្ឌ ត្រូវតាមដាន ត្រួតពិនិត្យការរៀបចំ និងអនុវត្តន៍ការចាត់តាំងនេះដោយហ្មត់ចត់ និងមានការទទួលខុសត្រូវខ្ពស់ និងអាចបង្កើតក្រុមការងារមួយដើម្បីជួយ។ ក្រុមការងារនេះត្រូវធ្វើរបាយការណ៍ជាប្រចាំជូនក្រុមការងារចុះជួយខណ្ឌតាមការកំណត់។

លោកបន្តថា ក្រុមការងារចុះជួយខណ្ឌ ត្រូវណែនាំដល់ក្រុមការងារចុះជួយសង្កាត់នីមួយៗរៀបចំរៀបចំបង្កើតក្រុមការងារសម្រាប់តាមដានត្រួតពិនិត្យការអនុវត្តផែនការនេះក្នុងដែនសមត្ថកិច្ចរបស់ខ្លួន។ គ្រប់ថ្នាក់ ត្រូវពង្រឹងរបៀបរបបធ្វើការងារឲ្យបានច្បាស់លាស់ និងត្រូវធ្វើការបូកសរុបរាយការណ៍អំពីលទ្ធផលការងាររបស់ខ្លួនជាប្រចាំតាមការកំណត់។

លោកបញ្ជាក់ថា រាល់ការជួបជុំ ការប្រជុំ ការធ្វើសន្និបាត ការប្រមូលផ្តុំកម្លាំងការហែក្បួន។ល។ ត្រូវអនុវត្តដោយច្នៃប្រឌិតឲ្យបានសមស្របតាមសភាពការជាក់ស្តែងពិសេសត្រូវគោរពឲ្យបានម៉ឺងម៉ាត់នូវការណែនាំរបស់រាជរដ្ឋាភិបាលរបស់ក្រសួងសុខាភិបាលនិងរបស់អាជ្ញាធរមានសមត្ថកិច្ចពាក់ព័ន្ធដល់ការប្រយ័ត្នប្រឆាំង និងជំងឺកូវីដ១៩ក្នុងនោះត្រូវអនុវត្តនូវវិធានការ៣ការពារ និង៣កុំឲ្យបានជាប់លាប់បំផុត៕

ដោយ ៖ ឧត្តរ៉ា