អាជ្ញាធរខណ្ឌមានជ័យ បន្តផ្សព្វផ្សាយ និងទប់ស្កាត់ករណីឆ្លងកូវីដ-១៩ នៅក្នុងមូលដ្ឋាន

អាជ្ញាធរខណ្ឌមានជ័យ ដឹកនាំដោយលោក ឌី រ័ត្នខេមរុណ អភិបាលរងខណ្ឌមានជ័យ និងលោក ទូច សុទ្ធមុត តំណាងក្រសួងការងារ រួមទាំងមន្រ្តីពាក់ពន្ធ័ បានបន្តចុះផ្សព្វផ្សាយ និងទប់ស្កាត់ការរីករាលដាលនៃជំងឺកូវីដ-១៩ ដើម្បីបញ្ជ្រៀបព័ត៌មាននេះ អោយកាន់តែច្បាស់នៅក្នុងមូលដ្ឋាន កាលពីថ្ងៃទី២៥ ខែមិថុនា ឆ្នាំ២០២១ ។

ក្រោយពីបានផ្សព្វផ្សាយ និងទប់ស្កាត់ករណីឆ្លងកូវីដ-១៩ ក្រុមការងារបានពិនិត្យរកឃើញថា មានកម្មករនិយោជិករបស់ក្រុមហ៊ុន FACTORY សរុបចំនួន ៤៦៤ នាក់ ក្នុងនោះដែររកឃើញវិជ្ជមានមេរោគកូវីដ-១៩ ចំនួន១១នាក់ លើ៤៦៤ នាក់ (ករណីថ្មី រកឃើញ កាលពីថ្ងៃទី ២៤ មិថុនា ២០២១ អ្នកវិជ្ជមាន ត្រូវបានយកទៅសម្រាកព្យាបាល ) ។
  
នាឱកាសនោះលោក ឌី រ័ត្នខេមរុណ អភិបាលរងខណ្ឌមានជ័យ បានណែនាំទៅដល់តំណាងក្រុមហ៊ុន និងស្នើបុគ្គលិក  កម្មករទាំងអស់ដែលពាក់ព័ន្ធ ជាមួយអ្នកវិជ្ជមានមេរោគកូវីដ-១៩ ទៅយកសំណាកឲ្យបានគ្រប់ៗគ្នា និងអនុវត្តនូវវិធានការ ៣ការពារ និង ៣កុំ របស់រាជរដ្ឋាភិបាល អោយបានខ្ជាប់ខ្ជួនជាប់ជានិច្ច ៕

អត្ថបទ ៖ រ៉ាវុទ្ធ