ព័ត៌មានជាតិ
កម្ពុជាអាចទទួលវ៉ាក់សាំងកូវីដ-១៩ តាមផែនការសម្រាប់ប្រជាពលរដ្ឋ១០លាននាក់នៅខែសីហា
រដ្ឋលេខាធិការសុខាភិបាល មានប្រសាសន៍ថា កម្ពុជាអាចនឹងទទួលវ៉ាក់សាំងគ្រប់តាមផែនការនៅខែសីហា និងបញ្ចប់យុទ្ធនាការចាក់វ៉ាក់សាំងនៅខែតុលា ឆ្នាំ២០២១នេះ។
លោកស្រីវេជ្ជបណ្ឌិត ឱ វណ្ណឌីន ថ្លែងបែបនេះ ខណៈលោកស្រីអញ្ជើញនាំយកថវិកាចំនួន១០លានរៀល និងសម្ភារៈមួយចំនួនទៀត របស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា ប្រគល់ជូនអ្នកចាក់វ៉ាក់សាំងបង្ការជំងឺកូវីដ-១៩ ទី៤លាន ដែលជាយុទ្ធជនពិការនៅស្រុកបុទុមសាគរ ខេត្តកោះកុង នៅថ្ងៃទី២៩ ខែមិថុនា ឆ្នាំ២០២១នេះ។
លោកស្រី មានប្រសាសន៍ថា តាមផែនការលទ្ធកម្មវ៉ាក់សាំងដែលលោកស្រីទទួលបាន ប្រសិនជាមិនមានអ្វីប្រែប្រួលទេ កម្ពុជានឹងទទួលបានវ៉ាក់សាំងកូវីដ-១៩ គ្រប់ចំនួនសម្រាប់ចាក់ជូនប្រជាពលរដ្ឋ១០លាននាក់តាមផែនការគ្រោងទុកនៅត្រឹមខែសីហា ខាងមុខនេះ។
លោកស្រី ឱ វណ្ណឌីន បញ្ជាក់ថា៖ “អ៊ីចឹង អ្វីដែល គណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ កំពុងគិតគូរ និងបន្តរៀបចំសេចក្ដីព្រាង ផែនការសម្រាប់ចាក់ដែលនឹងទទួលបានក្នុងខែសីហានេះ គឺយើងរំពឹងទុកថា ការងារចាក់វ៉ាក់សាំងសម្រាប់ក្រុមគោលដៅ១០លាននាក់នេះ នឹងអាចបញ្ចប់ នៅល្បាក់ចុងខែតុលាខាងមុខ”។
អ្នកនាំពាក្យក្រសួងសុខាភិបាល ខាងលើនេះ បានលើកឡើងបន្ថែមថា បើមើលទៅលើផែនការរបស់កម្ពុជា គឺកិច្ចការចាក់វ៉ាក់សាំងសម្រាប់ក្រុមគោលដៅនេះបានអនុវត្តបានលឿនជាងការគ្រោងទុក ដែលការគ្រោងទុកគឺអាចបញ្ចប់នៅចុងពាក់កណ្ដាលឆ្នាំ២០២២ ឬអាចយូរជាងហ្នឹងទៀត។
លោកស្រី ឱ វណ្ណឌីន មានប្រសាសន៍ថា៖ “ប៉ុន្តែឥឡូវអត់អ៊ីចឹងទេ! ដំបូងយើងគិតថា អាចលឿនជាងប្រហែលក្នុងចុងឆ្នាំនេះ ឬដើមឆ្នាំ២០២២។ ប៉ុន្តែឥឡូវ តាមលទ្ធភាពវ៉ាក់សាំងដែលនឹងមកដល់នេះ អ៊ីចឹងយើងអាចបញ្ចប់នៅចុងខែតុលា ឬយ៉ាងយូរបំផុតត្រឹមខែវិច្ឆិកា”។
ប្រធានគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ រូបនេះ បង្ហាញថា លទ្ធផលល្អនេះ បានដោយសារសម្ដេចតេជោ ហ៊ុន សែន មានបេះដូងមនុស្សធម៌ បានធ្វើសហប្រតិបត្តិការល្អជាមួយបណ្ដាប្រទេសជិតខាង និងដោយសារចំណងមិត្តភាពដែកថែបកម្ពុជាចិន តាមរយៈការខិតខំរបស់សម្ដេចតេជោ ធ្វើឱ្យកម្ពុជាមានលទ្ធភាពទទួលបានវ៉ាក់សាំងនេះពីសាធារណរដ្ឋប្រជាមានិតចិន ជាអំណោផង និងការបញ្ជាទិញផ្ទាល់ផង។
គួរបញ្ជាក់ថា មកដល់ពេលនេះ កម្ពុជា ទទួលបានវ៉ាក់សាំងកូវីដ-១៩ ទាំងជាអំណោយ និងការបញ្ជាទិញបានសរុបជាង១១លានដូស ដែលបាន និងកំពុងធ្វើយុទ្ធនាការចាក់វ៉ាក់សាំងជូនមន្ត្រីរាជការ ពិសេសប្រជាពលរដ្ឋនៅតំបន់ហានិភ័យ បានចំនួន ៤,០១៩,៧៥១នាក់ ឬ ៤០,២០ភាគរយ ធៀបទៅនឹងចំនួនគោលដៅ១០លាននាក់ គិតត្រឹមថ្ងៃទី២៨ ខែមិថុនា ម្សិលមិញនេះ៕
អត្ថបទ៖ ច័ន្ទ វីរៈ
-
ព័ត៌មានជាតិ៧ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ២ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ១ សប្តាហ៍ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៧ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ១ សប្តាហ៍ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
កីឡា៣ ថ្ងៃ ago
ជើងឯកម៉ុងហ្គោលី Erdene អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត
-
ព័ត៌មានជាតិ៦ ថ្ងៃ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?
-
ជីវិតកម្សាន្ដ២ ថ្ងៃ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»