កុមារជាង២៥,០០០នាក់ និងស្រ្តីជាង៥,០០០នាក់ បានព្យាបាលនៅ មន្ទីរពេទ្យគន្ធបុប្ផា ក្នុងខែមិថុនា នេះ

នៅក្នុងខែមិថុនា ឆ្នាំ២០២១នេះ មានកុមារដែលមានស្ថានភាពជំងឺផ្សេងៗគ្នាសរុបជាង ២៥,០០០នាក់ និងស្រ្តីមានផ្ទៃពោះ  ព្រមទាំងស្រីសម្រាលកូន សរុបជាង ៥,០០០នាក់ បានទទួលព្យាបាលនៅ មន្ទីរពេទ្យគន្ធបុប្ផាភ្នំពេញ និងសៀមរាប។

យោងតាមព័ត៌មានតួលេខ ក្នុងខែមិថុនា ឆ្នាំ២០២១ របស់ មន្ទីរពេទ្យគន្ធបុប្ផា បានបង្ហាញពីចំនួន និងស្ថានភាពជំងឺរបស់កុមារ និងស្ត្រី ដោយលម្អិតថា៖​
កុមារឈឺចំនួន ២០,៣០៨នាក់ ត្រូវបានពិនិត្យព្យាបាល នៅក្នុងផ្នែកពិគ្រោះជំងឺក្រៅ។

កុមារមានជំងឺធ្ងន់ៗ ៣,៨២៤នាក់ ត្រូវបានដាក់ឱ្យសម្រាកព្យាបាលនៅក្នុងមន្ទីរពេទ្យ។

កុមារចំនួន ១,១៨១នាក់ ត្រូវបានទទួលការវះកាត់។

កុមារចំនួន ៣១នាក់ ត្រូវបានវះកាត់ និងភ្ជិតប្រហោងបេះដូងតាមសរសៃឈាម។

ជាមួយគ្នានេះ ស្ត្រីមានផ្ទៃពោះចំនួន ៣,៨៩៥នាក់ បានមកពិនិត្យតាមដានផ្ទៃពោះ និងព្យាបាលនៅក្នុងផ្នែកពិគ្រោះជំងឺក្រៅនៃមន្ទីរសម្ភព និងស្ត្រីចំនួន ១,៣៩២នាក់ បានមកសម្រាលកូន។

គួរបញ្ជាក់ថា ការព្យាបាលទាំងអស់ គឺឥតគិតថ្លៃសម្រាប់គ្រប់ៗគ្នា ដោយពុំមានការរើសអើង៕

អត្ថបទ៖ ច័ន្ទ វីរៈ