ព័ត៌មានជាតិ
អ្នកនាំពាក្យ៖ បើបក្សកែទម្រង់កម្ពុជា ធ្វើត្រឹមត្រូវតាមច្បាប់កំណត់ អាជ្ញាធរមិនរារាំងសកម្មភាពពួកគេនោះទេ
អ្នកនាំពាក្យក្រសួងមហាផ្ទៃ បានអះអាងថា ប្រសិនបើក្រុមការងារគណបក្សកែទម្រង់កម្ពុជា ធ្វើសកម្មភាពទៅតាមច្បាប់កំណត់ នោះអាជ្ញាធរមូលដ្ឋាន នឹងមិនរារាំងសកម្មភាពរបស់ពួកគេនោះឡើយ។
ការអះអាងនេះ បន្ទាប់ពីលោក អ៊ូ ច័ន្ទរ័ត្ន ស្ថាបនិកគណបក្សកែទម្រង់កម្ពុជា បានបង្ហាញក្ដីបារម្ភខ្លាចអាជ្ញាធរមូលដ្ឋាន រារាំងសកម្មភាពរបស់ក្រុមការងារគណបក្សរបស់លោក ដែលចុះទៅប្រមូលស្នាមមេដៃពីអ្នកគាំទ្រឲ្យគ្រប់៤ពាន់នាក់ ដើម្បីដាក់ពាក្យស្នើសុំចុះបញ្ជី គណបក្សផ្លូវការនៅក្រសួងមហាផ្ទៃនាពេលខាងមុខ។
ចំពោះការបារម្ភនេះ បន្ទាប់ក្រសួងមហាផ្ទៃ បានចេញលិខិតមួយរំលឹកស្ថាបនិកគណបក្សនេះថា គណបក្សកែទម្រង់កម្ពុជា ពុំទាន់បានចុះឈ្មោះក្នុងបញ្ជីគណបក្សនយោបាយ នៅក្រសួងមហាផ្ទៃជាផ្លូវការនៅឡើយ។
យ៉ាងណាក៏ដោយលោក ខៀវ សុភ័គ រដ្ឋលេខាធិការ និងជាអ្នកនាំពាក្យក្រសួងមហាផ្ទៃ បានថ្លែងប្រាប់អ្នកសារព័ត៌មានកម្ពុជាថ្មី នាព្រឹកថ្ងៃទី៦ ខែកក្កដានេះថា ប្រសិនបើក្រុមការងារគណបក្សកែទម្រង់កម្ពុជា ធ្វើអ្វីទៅតាមច្បាប់កំណត់នោះ គឺអាជ្ញាធរមូលដ្ឋានពុំមានការរារាំងនោះឡើយ។
លោក ខៀវ សុភ័គ មានប្រសាសន៍ថា «សំខាន់យើងក្រើនរំលឹកគាត់ គាត់ក៏បានអរគុណ ចំពោះការក្រើនរំលឹករបស់មហាផ្ទៃដែរតើ អញ្ចឹងរឿងហ្នឹងវាចប់ហើយ រឿងហ្នឹងមានអីទៀត គាត់ធ្វើឲ្យតែត្រឹមត្រូវទៅមានអី អាជ្ញាធរមូលដ្ឋានមានអ្នកណា ទៅគាបសង្កត់គាត់ ហើយរហូតមកដល់ពេលនេះ ក៏មិនទាន់មានដែរ គាត់ថាខ្លួនគាត់តើ»។
ជាមួយគ្នានេះ អ្នកនាំពាក្យក្រសួងមហាផ្ទៃ ក៏បានបញ្ជាក់ដែរថា មូលហេតុដែលក្រសួងមហាផ្ទៃ ចេញលិខិតក្រើនរំលឹក ដល់គណបក្សកែទម្រង់កម្ពុជា ដែលធ្វើសកម្មភាពនៅមូលដ្ឋានយ៉ាងដូច្នេះថា «គាត់ទៅប្រមូលស្នាមមេដៃ មានទៅចាំបាច់ទៅធ្វើមីទ្ទីងអីណា ឃោសនាឯណា ទោះរាល់ដងគណបក្សគេដទៃ រាប់សែសិប ហាសិបគណបក្ស គេធ្វើ គេធ្វើរូបភាពមិនដូចគាត់ឯណា ប៉ុន្តែទោះជាយ៉ាងណាក៏ដោយ គាត់ក៏បានលើកឡើងដែរថា អាជ្ញាធរមូលដ្ឋានយើង មិនទាន់មានវិធានការចំពោះគាត់ទេ ហើយគាត់ក៏អរគុណ ចំពោះក្រសួងមហាផ្ទៃ បានរំលឹកដាស់តឿន គាត់នឹងខិតខំហើយតើ មានអី»។
គួររំលឹកថា សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីថ្ងៃទី៣០ ខែមិថុនា ឆ្នាំ២០២១ បានចេញលិខិតមួយ ដោយបានក្រើនរំលឹកដល់លោក ទិន សៃ ជាស្ថាបនិកគណបក្សកែទម្រង់កម្ពុជាថា គណបក្សនេះ ពុំទាន់បានចុះឈ្មោះក្នុងបញ្ជី គណបក្សនយោបាយនៅក្រសួងមហាផ្ទៃផ្លូវការនៅឡើយទេ។
ក្នុងរយៈពេលកន្លងមកនេះ ក្រសួងមហាផ្ទៃពិនិត្យឃើញថា គណបក្សកែទម្រង់កម្ពុជា កំពុងធ្វើសកម្មភាពនយោបាយ នៅរាជធានីភ្នំពេញ និងនៅតាមបណ្ដាខេត្តមួយចំនួន ដែលសកម្មភាពទាំងនេះ គឺជាការអនុវត្តបំពានទៅនឹងបញ្ញត្តិមាត្រា៩ និងបញ្ញត្តិមាត្រា១៩ថ្មី នៃច្បាប់ស្ដីពី គណបក្សនយោបាយ។
ដូច្នេះ គណបក្សកែទម្រង់កម្ពុជា ត្រូវបញ្ឈប់នូវរាល់សកម្មភាព នយោបាយនៅតាមមូលដ្ឋាន រហូតដល់គណបក្សនេះ បានចុះឈ្មោះក្នុងបញ្ជីគណបក្សនយោបាយ នៅក្រសួងមហាផ្ទៃ ស្របតាមស្មារតី នៃលិខិតរបស់ក្រសួងមហាផ្ទៃ ដូចបានចុះក្នុងយោងខាងលើ៕ (ដោយ)៖ ឃួន សុភ័ក្រ
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ១ សប្តាហ៍ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ៤ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ព័ត៌មានអន្ដរជាតិ៦ ថ្ងៃ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង