សង្កាត់វាលស្បូវមានអ្នកឆ្លងច្រើនធ្វើឱ្យអាជ្ញាធរចុះបិទទីតាំងជាច្រើនកន្លែង

ភ្នំពេញ៖ យោងតាមសេចក្តីរាយការណ៍ពីសាលាសង្កាត់វាលស្បូវបានឱ្យដឹងនៅថ្ងៃទី០៧ ខែកក្កដានេះថា អាជ្ញាធរសង្កាត់វាលស្បូវបានចុះទៅបិទទីតាំងជាច្រើនកន្លែងក្នុងមូលដ្ឋានសង្កាត់វាលស្បូវ ខណ្ឌច្បារអំពៅ រាជធានីភ្នំពេញ បន្ទាប់ពីមានប្រជាពលរដ្ឋឆ្លងជំងឺកូវីដ-១៩។

តាមប្រសាសន៍លោកស្រី យន់ សុផល ចៅសង្កាត់វាលស្បូវ  បានឱ្យដឹងថា លោកស្រីបានដឹកនាំកម្លាំងចុះបិទទីតាំងធ្វើ​ចត្តាឡីស័កចំនួន៣ទីតាំងស្ថិតក្នុងភូមិវាលស្បូវ និងភូមិក្តីតាកុយ បន្ទាប់ពីមានអ្នកឆ្លងជំងឺកូវីដ-១៩ ត្រូវបានបញ្ជូនទៅព្យាបាល ហើយអ្នកពាក់ព័ន្ធត្រូវឱ្យធ្វើចត្តាឡីស័កក្នុងផ្ទះរយៈពេល១៤ថ្ងៃ។

លោកស្រីចៅសង្កាត់បានបញ្ជាក់ទៀតថា ក្នុងអំឡុងដើមខែកក្កដានេះក្នុងសង្កាត់វាលស្បូវមានអ្នកឆ្លងជំងឺកូវីដ-១៩ សឹងគ្រប់ភូមិ។ ក្នុងនាមជាចៅសង្កាត់វាលស្បូវលោកស្រីសំណូមពរដ៏ទទូចសុំឱ្យប្រជាពលរដ្ឋចូលរួមគោរពតាមសេចក្តីជូនដំណឹងរបស់ក្រសួងសុខាភិបាលឱ្យបានខ្ជាប់ខ្ជួន ពិសេសត្រូវអនុវត្ត៣កុំនិង៣ការពារឱ្យបានគ្រប់ៗគ្នាដើម្បីបង្ការខ្លួនពីជំងឺដ៏កាចសាហាវនេះ៕

អត្ថបទ៖ នរា