ព័ត៌មានជាតិ

សាលាក្រុងណែនាំអ្នកជំងឺកូវីដព្យាបាលតាមផ្ទះ ត្រូវទុកដាក់សំរាមឱ្យបានត្រឹមត្រូវចៀសវាងចម្លងជំងឺដល់អ្នកដទៃ

បានផុស

៣ years មុន

នៅ

ថ្ងៃសៅរ៍ ១០ កក្កដា ២០២១

ដោយ

សាលារាជធានីភ្នំពេញបានធ្វើការណែនាំដល់អ្នកជំងឺកូវីដ-១៩កម្រិតស្រាលដែលសម្រាកព្យាបាលថែទាំនៅតាមផ្ទះ ត្រូវទុកដាសំរាមឱ្យបានត្រឹមត្រូវ ដើម្បីចៀសវាងការចម្លងជំងឺដល់អ្នកដទៃ។

យោងតាមសេចក្តីជូនដំណឹងស្ដីពីការទុកដាក់សំរាមរបស់អ្នកជំងឺកូវីដ១៩កម្រិតស្រាល ដែលសម្រាកព្យាបាលថែទាំនៅតាមផ្ទះបានឱ្យដឹងថា ដើម្បីគ្រប់គ្រងសំរាមដែលបង្កើតឡើងដោយអ្នកជំងឺកូវីដ១៩នៅ តាមផ្ទះឱ្យបានល្អ និងដើម្បីចៀសវាងការឆ្លងបន្តដល់អ្នកដទៃ ព្រមទាំងងាយស្រួលដល់ប្រតិបត្តិករប្រមូលសំរាមក្នុងការប្រមូលនិងដឹកជញ្ជូននោះ រដ្ឋបាលរាជធានីភ្នំពេញសូមណែនាំដល់អ្នកជំងឺត្រូវទុកដាក់សំរាមនៅក្នុងស្បោងឱ្យបានត្រឹមត្រូវ និងដាច់ដោយឡែកពីសំរាមរបស់អ្នកផ្សេងទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ត្រូវធ្វើការបាញ់ថ្នាំ ឬអាកុលសម្លាប់មេរោគកូវីដ១៩ទាំងសំរាមខាងក្នុងនិងខាងក្រៅស្បោងហើយទុកដាក់សំរាមដាច់ដោយឡែកលើសពី៧២ម៉ោងទើបអាចបញ្ចេញមកខាងក្រៅបានត្រូវដាក់សំរាមនៅក្នុងស្បោងពណ៌លឿងឬសរសេរស្លាកសញ្ញាបញ្ជាក់នៅលើស្បោងដើម្បីងាយស្រួលក្នុងការប្រមូល។ ត្រូវប្រើប្រាស់ស្បោងសំរាមដែលមានចំណុះ១៥គីឡូក្រាមដើម្បីផ្ទុកបរិមាណសំរាមឱ្យបានរយៈពេល៥ថ្ងៃយ៉ាងតិចដើម្បីចៀសវាងបញ្ចេញសំរាមរៀងរាល់ថ្ងៃ។

សាលារាជធានីភ្នំពេញបានបញ្ជាក់ថា ក្នុងករណីដែលមិនសហការ និងមិនអនុវត្តតាមការណែនាំខាងលើហើយបង្កឱ្យមានការឆ្លងជំងឺកូវីដបុគ្គលដែលប្រព្រឹត្តត្រូវទទួលខុសត្រូវតាមច្បាប់ច្បាប់ស្ដីពីវិធានការទប់ស្កាត់ការឆ្លងរាលដាលជំងឺកូវីដ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀតដែលមានចែងថា «អំពើចម្លងដោយចេតនានៅជំងឺកូវីដ១៩ដល់អ្នកដទៃតាមគ្រប់មធ្យោបាយត្រូវផ្ដន្ទាទោសដាក់ពន្ធនាគារពី៥ឆ្នាំដល់១០ឆ្នាំ»និងលិខិតបទដ្ឋានពាក់ព័ន្ធដែលមានជាធរមាន។

លោកវេជបណ្ឌិត ងីមានហេង ប្រធានមន្ទីរសុខាភិបាលរាជធានីភ្នំពេញ បានមានប្រសាសន៍ថា គិតត្រឹមថ្ងៃទី៩ ខែកក្កដា ឆ្នាំ២០២១មានអ្នកព្យាបាលជំងឺកូវីដ-១៩នៅតាមផ្ទះនៅរាជធានីភ្នំពេញបានកើនឡើងដល់ចំនួន៩១៥នាក់ហើយហើយក្នុងចំនួននេះ មានអ្នកជាសះស្បើយពីជំងឺនេះ ចំនួន២៦៨នាក់និងមានអ្នកកំពុងព្យាបាលចំនួន៦៤៧នាក់ ស្រីចំនួន៣១៧នាក់។

លោកវេជ្ជបណ្ឌិត បានបន្តទៀតថា «ការកើនឡើងនូវចំនួនអ្នកព្យាបាលជំងឺកូវីដ-១៩ នៅតាមផ្ទះនៅប៉ុន្មានថ្ងៃនេះ ដោយសារតែយើងបានលើកទឹកចិត្តអោយពួកគាត់បានព្យាបាលជំងឺកូវីដ-១៩នៅតាមផ្ទះ»។

លោកបន្តថា ចំពោះអ្នកជំងឺដែលមាននឹងកំពុងព្យាបាលនៅតាមមណ្ឌលពួកគាត់អាចសុំការអនុញ្ញាត សូមប្តូរទៅព្យាបាលនៅតាមផ្ទះវិញបានតែត្រូវមានកិច្ចសន្យាមួយ ជាមួយក្រុមការងារដោយភ្ជាប់នូវ លក្ខខណ្ឌច្បាប់មួយចំនួនហើយយើងជាអ្នករាយការណ៍ទៅអាជ្ញាធរមូលដ្ឋាន ដើម្បីគ្រប់គ្រងមើលខុសត្រូវពួកគាត់៕

អត្ថបទ ៖ សំអឿន