ព័ត៌មានជាតិ
អំណោយផ្ទះមនុស្សធម៌ទី២ នៅខេត្តកំពង់ចាម ត្រូវបានផ្តល់ជូនគ្រួសារ មានជីវភាពក្រីក្រ
(កំពង់ចាម)៖ លោក អ៊ុន ចាន់ដា ប្រធានគណៈកម្មាធិការសាខាកាកបាទក្រហមកម្ពុជា ខេត្តកំពង់ចាម និងព្រះសីលសំវរ ប៊ត តាំងឆេង ព្រះនាគមុនីមេគណខេត្តកំពង់ចាម និងមន្ត្រីពាក់ព័ន្ធមួយចំនួនទៀត បាននិមន្ត និងអញ្ជើញប្រគល់ផ្ទះបន្ទាប់ទី២ ជាកម្មវិធីផ្ទះមនុស្សធម៌ខេត្ត ក្រោមកិច្ចសហការរវាងសាខាកាកបាទក្រហមកម្ពុជា ខេត្ត និងសាលាគណខេត្ត ជូនជនមានពិការភាព និងមានជីវភាពក្រីក្រម្នាក់ឈ្មោះ ឆែក ភ័ក្ត្រ អាយុ៣១ឆ្នាំ រស់នៅ ភូមិព្រែកទក់ ឃុំខ្ពបតាងួន ស្រុកស្ទឹងត្រង់ ខេត្តកំពង់ចាម។
សូមជម្រាបថា លោក ឆែក ភ័ក្ត្រ មានប្រពន្ធ និងកូនស្រី២នាក់ក្នុងបន្ទុក។ ដើមឡើយបុរសរូបនេះ មានមុខរបរជាជាងផ្សារដែក។ ជាអកុសលកាលពី២ឆ្នាំមុន ពេលកំពុងផ្សារដំបូលផ្ទះគេ ស្រាប់តែឆក់ចរន្តអគ្គិសនី បណ្តាលឲ្យជើងទាំង២គាត់រលាករលួយ ហើយទីបំផុតត្រូវកាត់ចោលក្រោមជង្គង់ ធ្លាក់ខ្លួនពិការ និងបាត់បង់សមត្ថភាពពលកម្ម រហូតមក។
ក្រៅពីការជួយឧបត្ថម្ភរបស់រដ្ឋ តាមរយៈប័ណ្ណក្រីក្រ១, អម្រែកមេគ្រួសារ បានធ្លាក់មកលើស្ត្រីជាប្រពន្ធ ដែលធ្លាប់ជាមេផ្ទះ បង្ខំចិត្តដើរស៊ីឈ្នួលជម្រះស្មៅ ឬមើលថែចំការតាមរដូវ ដើម្បីបានកម្រៃប្រចាំថ្ងៃ ចិញ្ចឹមប្តីពិការ និងកូនស្រីទាំង២។ ដោយលទ្ធភាពខ្សត់ខ្សោយ, គ្រួសារនេះរស់នៅក្នុងកូនខ្ទមទ្រុឌទ្រោម ដែលបិទបាំងដោយដែកសង្កសី, ស្លឹកចាស់ៗ ដែលប្រជាពលរដ្ឋអ្នកជិតខាងផ្តល់ឲ្យ។
ដោយមើលឃើញពីស្ថានភាពលំបាកនេះ លោក អ៊ុន ចាន់ដា ប្រធានគណៈកម្មាធិការសាខាកាកបាទក្រហមកម្ពុជា ខេត្តកំពង់ចាម បានសម្រេចផ្តល់ជូនផ្ទះឈើខ្ពស់ផុតពីដី ប្រក់ស័ង្កសី (ទំហំ៤ម×៦ម) ១ខ្នង ជូនលោក ឆែក ភ័ក្ត្រ និងគ្រួសារ សម្រាប់ស្នាក់នៅតទៅមុខទៀត។
លោកស្រី ប៉ាង ដានី អនុប្រធានអចិន្ត្រៃយ៍សាខា និងជាប្រធានក្រុមការងារប្រតិបត្តិ និងវាយតម្លៃនៃកម្មវិធី ផ្តល់ផ្ទះមនុស្សធម៌ខេត្ត បានឲ្យដឹងថា សម្រាប់ផ្ទះមនុស្សធម៌១ខ្នងនេះ ត្រូវចំណាយទឹកប្រាក់ចំនួន៩,៨០០,០០០រៀល។ ក្នុងនោះសាខាបដិភាគចំនួន១,០០០,០០០រៀល, លោកអ៊ុន ចាន់ដា ឧបត្ថម្ភ១,០០០,០០០រៀល, ព្រះមេគណខេត្ត ចំនួន១,០០០,០០០រៀល, ក្រៅពីនោះជាការចូលរួមបំពេញបន្ថែម របស់សប្បុរសជន និងក្រុមការងារចលនាកៀរគរ និងគ្រប់គ្រងមូលនិធិនៃកម្មវិធី។
លោក អ៊ុន ចាន់ដា បានក្រើនរំលឹកដល់អ្នកចូលរួម និងប្រជាពលរដ្ឋទាំងអស់ ត្រូវបង្កើនការប្រុងប្រយ័ត្នការពារខ្លួនឲ្យបានទ្វេដងថែមទៀត ក្នុងការចូលរួមទប់ស្កាត់ការឆ្លងរាតត្បាតនៃជំងឺកូវីដ-១៩ ទាំងអស់គ្នា ដោយបុគ្គលម្នាក់ៗ ក៏ដូចជាក្រុមគ្រួសារនីមួយៗ រួមទាំងអ្នកដែលបានចាក់វ៉ាក់សាំងរួចហើយក្តី ត្រូវតែយកចិត្តទុកដាក់អនុវត្ត ឲ្យបានខ្ជាប់ខ្ជួននូវវិធានសុខាភិបាល ៣ការពារ ៣កុំ ដើម្បីជៀសឲ្យផុតពីការឆ្លងរាលដាល នៃជំងឺដ៏កាចសាហាវកូវីដ-១៩ នេះ។
អំណោយមនុស្សធម៌ ដែលផ្តល់ជូនគ្រួសារលោក ឆែក ភ័ក្ត្រ សម្រាប់ការឡើងផ្ទះថ្មីនេះ រួមមាន៖ អង្ករ៥០គក្រ, ត្រីខ១០កំប៉ុង, ទឹកត្រី៦ដប, ទឹកស៊ីអ៊ីវ ៦ដប, មី១កេស, ឃីត១សម្រាប់, អាវយឺត៨, សម្ភារផ្ទះបាយមួយចំនួន និង ថវិកា២០០,០០០រៀល។
ចំណែកប្រជាពលរដ្ឋខ្វះខាតជីវភាព ចំនួន១៣គ្រួសារផ្សេងទៀត ដែលបានចូលរួមនាពេលនោះ ក៏ទទួលបានអំណោយមនុស្សធម៌ ក្នុង១គ្រួសារ រួមមាន៖ អង្ករ ត្រីខ ឃីត មី ទឹកត្រី ទឹកស៊ីអ៊ីវ និងអាវយឺត ព្រមទាំងថវិកាចំនួន ២០,០០០រៀលផងដែរ៕ (ដោយ)៖ ហុង ម៉េងហៀ
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៣ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សេដ្ឋកិច្ច១ សប្តាហ៍ ago
តាសក់ផ្អែម ៥ តោន របស់ កសិករម្នាក់ លក់ចេញអស់ ក្រោយសហគមន៍កសិកម្មជួយរកទីផ្សារ
-
ព័ត៌មានអន្ដរជាតិ១ សប្តាហ៍ ago
នាឡិកា ៦ គ្រឿងរបស់កូនពៅសេដ្ឋី ឥណ្ឌា ដែលខំសន្សំទុក មានមួយមេ Facebook ទាក់ចិត្តខ្លាំង
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៦ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៤ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៤ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ