ក្តារមឈូសចំនួន១០០ បានដឹកទៅដល់ខេត្តរតនគិរីហើយ ដើម្បីត្រៀមសម្រាប់អ្នកស្លាប់ដោយ សារជំងឺកូវីដ

លោក ថង សាវុន អភិបាល នៃគណៈអភិបាលខេត្តរតនគិរី បានឲ្យដឹងនៅរសៀលថ្ងៃទី១២ ខែកក្កដា ឆ្នាំ២០២១​នេះថា ក្តារមឈូសចំនួន១០០ បានដឹកទៅដល់ខេត្តរតនគិរីហើយ ដើម្បីត្រៀមសម្រាប់អ្នកស្លាប់ដោយសារជំងឺកូវីដ-១៩ នៅក្នុងខេត្តមួយនេះ។

លោកអភិបាលខេត្តរតនគិរី បានសរសេរនៅលើគណនីហ្វេសប៊ុករបស់លោកថា «នេះមិនមែនជាការប្រមាថនោះឡើយ ប៉ុន្តែជាការគោរពចំពោះអ្នកស្លាប់ និងការត្រៀមទុកជាមុនលើស្ថានភាពនេះ ផ្អែកលើបទពិសោធន៍ដែលយើងទទួលបានកន្លងមកពីប្រទេសនានាទូទាំងសកល»។

ជាមួយគ្នានេះលោក ថង សាវុន បានអំពាវនាវដល់ប្រជាពលរដ្ឋទាំងអស់ បន្តអនុវត្តវិធានការ ៣កុំ ៣ការពារ ឲ្យបានខ្ចប់ខ្ជួន ហើយខេត្តរតនគិរី នឹងដំណើរការឡើងវិញជាជំហានៗ នូវសកម្មភាពសេដ្ឋកិច្ច ពាណិជ្ជកម្ម មុខរបរដែលទ្រទ្រង់ក្នុងជីវភាព រស់នៅប្រចាំថ្ងៃរបស់ប្រជាពលរដ្ឋ នៅពេលដែលស្ថានការគ្រប់គ្រងបាន៕ (ដោយ)៖ ឃួន សុភ័ក្រ