ក្រសួងបរិស្ថាន កំពុងអនុវត្តគម្រោង ប្រមូលសំណល់ថ្មពិល ដោយដាក់ធុងសំណល់ថ្មពិល នៅតាមទីតាំងមួយចំនួន

ដើម្បីទប់ស្កាត់ការសាយភាយសារធាតុគ្រោះថ្នាក់ ចូលទៅក្នុងបរិស្ថាន និងការពារសុខភាពមនុស្សពីផលប៉ះពាល់ ក្រសួងបរិស្ថានបាននឹងកំពុងអនុវត្តគម្រោង ប្រមូលសំណល់ថ្មពិល ដោយការដាក់ធុងសំណល់ថ្មពិលនៅតាមទីតាំងបុរី ផ្សារទំនើប ស្ថានីយ៍ប្រេងឥន្ធនៈ រួមមាន៖ ជីប ម៉ុង នរោម៉ល និងមណ្ឌល ជីប ម៉ុងបាក់ទូក បុរីប៉េង ហួត បឹងស្នោរ និងស្ថានីយប្រេងឥន្ធនៈភីធីធីវត្តនាគវ័ន បូកគោ ផ្សារតូច និងបឹងស្នោរ។ នេះបើយោងតាមការជូនដំណឹង​របស់ក្រសួងបរិស្ថា នៅថ្ងៃទី១៣ ខែកក្កដានេះ។​

ក្រសួងបរិស្ថាន បានបញ្ជាក់ថា ក្រសួងនឹងបន្តដាក់ធុងសំណល់ថ្មពិល នៅតាមទីតាំងផ្សេងទៀត ដើម្បីបង្កភាពងាយស្រួលដល់ប្រជាពលរដ្ឋ ក្នុងការយកសំណល់ថ្មពិលមកទុកដាក់បានត្រឹមត្រូវ និងលុបបំបាត់ការបោះសំណល់ថ្មពិលលាយលំជាមួយសំណល់ធម្មតា ប្រមូលសំណល់ថ្មពិល យកមកទុកដាក់ឲ្យបានត្រឹមត្រូវ។

លោក សាយ សំអាល់ រដ្ឋមន្ត្រីក្រសួងបរិស្ថាន បានសរសេរនៅលើទំព័រហ្វេសប៊ុកនៅថ្ងៃនេះដែរថា «ថ្មពិល ដែលអស់អាយុកាលក្នុងការប្រើប្រាស់ មានសារធាតុគ្រោះថ្នាក់។ សូមបោះបង់ចោលដោយសុវត្ថិភាព»។

ក្រសួងបរិស្ថាន បានថ្លែងអំណរគុណដល់ម្ចាស់ទីតាំង និងប្រជាពលរដ្ឋ ដែលបានផ្តល់កិច្ចសហការ និងការចូលរួមក្នុងការអនុវត្តគម្រោងប្រមូលសំណល់ថ្មពិល ដើម្បីបរិស្ថានយើង គ្មានសំណល់ថ្មពិល។ បន្ថែមពីលើនេះ ក្រសួងបរិស្ថាន ក៏បានអំពាវនាវដល់ប្រជាពលរដ្ឋទាំងអស់ បន្តការចូលរួម និងជួយផ្សព្វផ្សាយ អំពីគម្រោងប្រមូលសំណល់ថ្មពិលនេះ។

បើតាមក្រសួងបរិស្ថាន សំណល់ថ្មពិល ត្រូវបានចាត់ទុក ជាសំណល់គ្រោះថ្នាក់ ដោយសំណល់នេះ មានផ្ទុកទៅដោយ សារធាតុគ្រោះថ្នាក់ ដែលមានកម្រិតពុលខ្លាំង ដូចជា៖ បារត កាត់ម៉្ញូម នីកែល និងសំណ។

ដូចនេះការទុកដាក់ ឬបោះចោលសំណល់ថ្មពិល មិនបានត្រឹមត្រូវ នឹងបង្កឲ្យមានការសាយភាយសារគ្រោះថ្នាក់ ចូលទៅក្នុងបរិស្ថាន និងបង្កផលប៉ះពាល់ធ្ងន់ធ្ងរ ដល់សុខភាពមនុស្ស ដូចជា៖ ទី១. បង្កឱ្យខូចតម្រងនោម ធ្វើឱ្យថយចុះសារធាតុចិញ្ចឹមក្នុងឆ្អឹង។ ទី.២ បង្កឱ្យខូចប្រព័ន្ធប្រសាត ខូចចលនាសាច់ដុំ បាត់បង់ការចងចាំ។ ទី៣. បង្កឱ្យកើតជំងឺមហារីក ខូចប្រព័ន្ធភាពស៊ាំ បំផ្លាញកោសិកា។ ទី៤.បង្កការរលូតគភ៌ ធ្វើឱ្យទារកកើតមិនមានភាពប្រក្រតី។ ទី៥. បង្កវិរូបកាយទារកដែលទើបកកើតក្នុងផ្ទៃ ឬ ទារកក្នុងផ្ទៃ៕ (ដោយ)៖ ឃួន សុភ័ក្រ