ពលរដ្ឋ​ប្រទះឃើញ​គ្រាប់​មិនទាន់​ផ្ទុះជាច្រើន​គ្រាប់​ នៅ​ក្នុង​ដីចម្ការ​

មន្ដ្រីនគរបាល រដ្ឋបាល​ឃុំ​អូរ​ស្វាយ នៃ​អធិការដ្ឋាន​នគរបាល ខេត្ត​ឧ​ត្ត​រ​មានជ័យ បាន​ឲ្យ​ដឹងថា នៅ​ថ្ងៃទី​១៧ ខែកក្កដា ឆ្នាំ​២០២១ វេលា​ម៉ោង​០៩​និង​០០​នាទី​មាន​ប្រជាពលរដ្ឋ​ឈ្មោះ អ៊ឹម ម៉ារ៉េត ភេទ​ប្រុស អាយុ​៥១​ឆ្នាំ កសិករ រស់នៅ​ទំនប់​អភិវឌ្ឍន៍ ឃុំ​អូរ​ស្វាយ ស្រុក​ត្រពាំង​ប្រាសាទ ខេត្ត​ឧ​ត្ត​រ​មានជ័យ បាន​ប្រទះឃើញ​គ្រាប់​យុទ្ធភណ្ឌ​មិនទាន់​ផ្ទុះ​ក្នុង​ដីចម្ការ​របស់គាត់ ចំនួន​១៣​គ្រាប់ មាន​ដូចខាងក្រោម​៖

-​គ្រាប់​B៦០ ចំនួន ០១​គ្រាប់​

-​គ្រាប់​DK៨០ ចំនួន ០៥​គ្រាប់​

-​គ្រាប់​B៤០ ចំនួន ០៤​គ្រាប់​

-​ក្បាល​ផ្ទុះ​B៤០ ចំនួន ០៣​គ្រាប់
​

​នៅត្រង់ចំណុច​ខាងកើត​ភូមិ​ទំនប់​អភិវឌ្ឍន៍​ចម្ងាយ​៣០០​ម៉ែត្រ ហើយ​បានមក​រាយការណ៍​ជូន​ប៉ុស្តិ៍នគរបាល រដ្ឋបាល​ឃុំ​អូរ​ស្វាយ។ ក្រោយពី​ទទួល​បាន​ព័ត៌មាន​កម្លាំង​ប៉ុស្តិ៍​បាន​ចុះ​ទៅ​ពិនិត្យ​ដល់​កន្លែង​ទីតាំង​គ្រាប់ និង​សន្និដ្ឋាន​ថា ​ជា​គ្រាប់​សេសសល់​ពី​សម័យ​សង្គ្រាម។

​សំណល់គ្រឿងផ្ទុះសល់ពីសម័យសង្គ្រាមនៅមានច្រើនកប់ក្នុងដី។ ប្រជាពលរដ្ឋនៅតាមតំបន់ ដាច់ស្រយាល ងាយរងគ្រោះថា្នក់ពិសេសក្មេង​តូចៗ។ ការជីកគាស់កាយរុករានដីព្រៃធ្វើ​ចម្ការ ងាយ និង​គ្រោះ​ថ្នាក់ដោយសារយុទ្ធភ័ណ្ឌមិនទាន់ផ្ទុះ។ យើងរួមគ្នាទប់ស្កាត់ ការគ្រោះ ថ្នាក់ បណ្តាលមកពីសំណល់គ្រឿងផ្ទុះ​សល់​ពី​សម័យ​សង្គ្រាម ក្នុង​សហគមន៍យើងទាំងអស់គ្នា។

​ពេលឃើញគ្រាប់មិនទាន់ផ្ទុះ សូម​កុំប៉ះពាល់វា ហើយ​រាយការណ៍ជូនភូមិ-​ឃុំប៉ុស្តិ៍នគរបាល នៅក្នុងមូលដ្ឋានរបស់អ្នក។ បច្ចុប្បន្ន​គ្រាប់​ទាំងអស់នេះ សមត្ថកិច្ច​យើង​បាន​រាយការណ៍​ជូន អង្ក​ការដោះមីន​កម្ពុជា យកទៅ​កម្ទេច​ចោល​នៅ​កន្លែង​ ដែល​មាន​សុវត្ថិភាព​រួចរាល់​អស់ហើយ​៕​

អត្ថបទ៖ ចាន់ ធី​