អត្រាចាក់វ៉ាក់សាំងបង្ការជំងឺកូវីដ-១៩ដល់ពលរដ្ឋកម្ពុជាបានជិត៦០%
Connect with us
Helistar Cambodia - Helicopter Charter Services

ព័ត៌មានជាតិ

អត្រាចាក់វ៉ាក់សាំងបង្ការជំងឺកូវីដ-១៩ដល់ពលរដ្ឋកម្ពុជាបានជិត៦០%

បានផុស

នៅ

ភ្នំពេញ៖ គិតត្រឹមយប់ថ្ងៃទី១៨ ខែកក្កដា ឆ្នាំ២០២១នេះ ប្រទេសកម្ពុជាបានចាក់វ៉ាក់សាំងការពារជំងឺកូវីដ-១៩ដល់ប្រជាពលរដ្ឋដែលមានអាយុចាប់ពី១៨ឆ្នាំឡើងទៅ បានចំនួនជិត៦លាននាក់ ឬស្មើនឹងជិត៦០ភាគរយនៃផែនការសរុប​១០លាននាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមក្រសួងសុខាភិបាលបានឱ្យដឹងថា គិតចាប់ពីថ្ងៃទី១០ ខែកម្ភៈ រហូតមកដល់ថ្ងៃទី១៨ ខែកក្កដា ឆ្នាំ២០២១​នេះមានអ្នកស្ម័គ្រចិត្តចាក់វ៉ាក់សាំងចំនួន ៥,៩៧៥,៩៧៣នាក់ ក្នុងនោះស្រីចំនួន ២,៩៧៨,៧៨៧នាក់។ ជាមួយគ្នានេះមានអ្នកដែលគ្រូពេទ្យអនុញ្ញាតចាក់ចំនួន ៥,៩១២,៥៤៥នាក់ ស្រីចំនួន ២,៩៤៥,៦៨២នាក់ ស្មើនឹង៥៩.១៣ភាគរយ​ធៀបនឹងគោលដៅ១០លាននាក់។ ចំណែកអ្នកដែលគ្រូពេទ្យមិនអនុញ្ញាតឱ្យចាក់ចំនួន ៦៣,៤២៨នាក់ ក្នុងនោះស្រី​ចំនួន ៣៣,១០៥នាក់ ចំណែកអ្នកចាក់ដូសទី២បានចំនួន ៤,១៣១,០៥៧នាក់ ក្នុងនោះស្រីចំនួន ១,៩៩៩,៥៧០៣នាក់។

បច្ចុប្បន្ននេះយុទ្ធនាការចាក់វ៉ាក់សាំងជូនប្រជាពលរដ្ឋដែលមានអាយុចាប់ពី១៨ឆ្នាំឡើងទៅបានពង្រីកវិសាលភាពនៅទូទាំងប្រទេសហើយ ខណៈរាជធានីភ្នំពេញបានបិទបញ្ចប់យុទ្ធនាការចាក់វ៉ាក់សាំងកាលពីថ្ងៃទី៨ ខែកក្កដាកន្លងទៅនេះ។

តាមគម្រោងរដ្ឋាភិបាលនឹងចាក់វ៉ាក់សាំងការពារជំងឺកូវីដ-១៩ ជូនដល់ប្រជាពលរដ្ឋគោលដៅ១០លាននាក់ឱ្យគ្រប់នៅចុងឆ្នាំ២០២១នេះ ឬនៅដើមឆ្នាំ២០២២ខាងមុខ ដោយសារការផ្គត់ផ្គង់វ៉ាក់សាំងបានលឿន។

គួរបញ្ជាក់ថាបច្ចុប្បន្ននេះកម្ពុជាទទួលបានវ៉ាក់សាំងការពារជំងឺកូវីដ-១៩ សរុបចំនួន១៦លាន២ម៉ឺន៤ពាន់ដូសក្នុងនោះវ៉ាក់សាំងប្រភេទស៊ីណូហ្វាមមានចំនួន៥លាន២សែនដូស ក្នុងនោះបញ្ជាទិញ៣លានដូស និងផ្តល់ជំនួយ២លា២សែនដូស។ វ៉ាក់សាំងស៊ីណូវ៉ាក់ចំនួន១០លាន៥សែនដូស និងវ៉ាក់សាំងកូវីលសែលរបស់ក្រុមហ៊ុនអាស្ត្រាហ្សេណេកាតាមរយៈគម្រោងកូវ៉ាក់ចំនួន៣២៤,០០០ដូស។

ក្រៅពីនេះវ៉ាក់សាំង១លានដូសទៀតនឹងមកដល់នៅចុងខែកក្កដានេះ ខណៈ៣លានដូសទៀតនឹងមកដល់នៅខែសីហាខាងមុខ ហើយរាជរដ្ឋាភិបាលគ្រោងបញ្ជាទិញ១លានដូសបន្ថែមទៀត ដែលធ្វើឱ្យចំនួនវ៉ាក់សាំងសរុបប្រមាណជាង២១លានដូសសម្រាប់ចាក់ដល់ប្រជាពលរដ្ឋគោលដៅ១០លាននាក់។

ជាមួយគ្នានេះដែររដ្ឋាភិបាលនឹងមានផែនការចាក់វ៉ាក់សាំងការពារជំងឺកូវីដ-១៩ដល់កុមារ និងយុវវ័យអាយុចាប់ពី១២ឆ្នាំដល់១៧ឆ្នាំ ប្រមាណជិត២លាននាក់ជាបន្តបន្ទាប់ទៀតនាពេលខាងមុខនេះ៕

អត្ថបទ៖ សំអឿន

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម

Helistar Cambodia - Helicopter Charter Services