ព័ត៌មានជាតិ

ការដឹកជញ្ជូនទំនិញតាមផ្លូវអាកាសរយៈពេល៥ខែ ឆ្នាំ២០២១កើនឡើងជាង៥ ភាគរយ, ខណៈការដឹកជញ្ជូនអ្នកដំណើរធ្លាក់ចុះ៩២ ភាគរយ

បានផុស

៣ years មុន

នៅ

ថ្ងៃអង្គារ ២០ កក្កដា ២០២១

ដោយ

ភ្នំពេញ ៖ នៅក្នុងរយៈពេល៥ ខែឆ្នាំ ២០២១ នេះការដឹកជញ្ជូនទំនិញផ្សេងៗតាមផ្លូវអាកាសហាក់មានភាពប្រសើរឡើងវិញជាបណ្ដើរៗ ពោលគឺបើប្រៀបធៀប រយៈពេលដូចគ្នាក្នុងឆ្នាំ ២០២០មានការកើនឡើងប្រមាណជាង ៥ ភាគរយខណៈការដឹកជញ្ជូនអ្នកដំណើរបន្តធ្លាក់ចុះប្រមាណ៩២ ភាគរយ។ នេះបើយោង លោក ស៊ីន ចាន់សិរីវុត្ថា រដ្ឋលេខាធិការដ្ឋានអាកាសចរស៊ីវិលឲ្យអ្នកសារព័ត៌មានបានដឹងនៅថ្ងៃទី១៩ ខែកក្កដានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊ីន ចាន់សិរីវុត្ថា បានលើកឡើងថា ការធ្លាក់ចុះនៃការដឹកជញ្ជូនផ្លូវអាកាសនេះមិនមែនតែកម្ពុជានោះទេ គឺវាមានលក្ខណៈជាសាកលតែម្តង។ លោកបន្តថា ផលប៉ះពាល់ជាសាកលមកលើចរាចរណ៍អ្នកដំណើរតាមផ្លូវអាកាស ការធ្លាក់ចុះជាសាកលនៃចំនួនអ្នកដំណើរតាមផ្លូវអាកាស(ទាំងអន្តរជាតិនិងក្នុង ស្រុក)គឺពី ៦០ ភាគរយនៅឆ្នាំ២០២០។ ចំណែកកម្ពុជាកិតមកដល់ឆមាសទី១ ឆ្នាំ២០២១ នេះនៅតែបន្តធ្លាក់ចុះគឺមានរហូតដល់ទៅ ៩២ភាគរយ។ តែការដឹកជញ្ជូនតាមផ្លូវអាកាសហាក់មានភាពប្រសើរឡើងវិញបន្តិចគឺមានកំណើនប្រមាណ ២៦ ភាគរយបើប្រៀបធៀប ៦ ខែឆ្នាំ២០២០។

លោក ស៊ីន ចាន់សិរីវុត្ថា បានមានប្រសាសន៍ឲ្យដឹងថា ទោះបីជាកម្ពុជាស្ថិតនៅក្នុងកាលៈទេសៈនៃការរាលដាលជំងឺ១៩ ខ្លាំងក៏ពិតមែនប៉ុន្តែតម្រូវការប្រើ ប្រាស់ទំនិញចាំបាច់នៅតែកើនឡើងទោះមិនមានការកើនឡើងច្រើនដូចពីកាលពីពេលមិនទាន់ផ្ទុះជំងឺកូវីដ។ លោកបានអះអាងថាការកើនឡើងនៃការដឹកជញ្ជូនទំនិញតាមផ្លូវអាកាសនៅនៅរយៈពេល៦នេះ ដោយសារតែការទិញលក់ទំនិញតាមអនឡាញពីក្រៅប្រទេសមានសកម្មភាពកើនឡើងច្រើន និងមាន តម្រូវការប្រើប្រាស់បន្ទាន់។

លោក ស៊ីន ចាន់សិរីវុត្ថា បានព្យាករណ៍ថា ការស្ដារឡើងវិញវិស័យអាកាសចរណ៍អាចនៅឆ្នាំអំឡុងឆ្នាំ ២០២៣ និង ២០២៤ ព្រោះមកដល់ពេលនេះហើយ យើងនៅតែមិនទាន់ដឹងច្បាស់ថាវ៉ាក់សាំងកូវីដ១៩ អាចមានប្រសិទ្ធភាពកម្រិតណានៅឡើយផង។ ហើយបើតាមការព្យាករណ៍របស់ក្រុមហ៊ុនអាកាសចរណ៍ ធំៗក៏ដូចក្រុមហ៊ុនផលិតយន្តហោះប៊ូអ៊ីង បានព្យាករណ៍ថាវិស័យអាកាសចរណ៍អាចរីកចម្រើនឡើងវិញក្នុងរង្វង់ឆ្នាំ ២០២៣ ទៅឆ្នាំ ២០២៤។

ជុំវិញទៅនឹងការដឹកជញ្ជូនទំនិញតាមអាកាសនេះដែរ លោកឧកញ៉ា ស៊ិន ចន្ធី ប្រធានសមាគមភស្តុរភាកម្មកម្ពុជា ធ្លាប់បានឲ្យដឹងដែរថាក្រៅពីការបិទខ្ទប់នៅ តាមបណ្តាប្រទេសមួយចំនួននៅលើពិភពលោកនិងក្នុងតំបន់ដោយសារតែការរាតត្បាតជំងឺកូវីដ១៩ ហើយនោះកត្តាមួយទៀតគឺការដឹកជញ្ជូនតាមកប៉ាល់ មានការឡើងថ្លៃនិងត្រូវប្រើពេលយូរផងនោះក៏អាចធ្វើឲ្យមានតម្រូវការកើនឡើងលើការដឹកជញ្ជូនទំនិញតាមផ្លូវអាកាសផងដែរ។

សូមបញ្ជាក់ថា បច្ចុប្បន្ននេះនៅកម្ពុជាមានក្រុមហ៊ុនដែលកំពុងដំណើរការជើងហោះហើរសរុបចំនួន២៤ក្រុមហ៊ុនដោយក្នុងនោះមានក្រុមហ៊ុនដឹកជញ្ជូនអ្នក ដំណើរក្នុងស្រុកចំនួន០៥, ក្រុមហ៊ុនជើងហោះហើរពីចិនចំនួន០៧, តៃវ៉ាន់ចំនួន០២,សិង្ហបុរីចំនួន០២និងកូរ៉េខាងត្បូងចំនួន០២ខណៈដែលក្រុមហ៊ុនមាន ជើងហោះសម្រាប់ដឹកជញ្ជូនទំនិញវិញមានចំនួន ០៦ក្រុមហ៊ុន ។ នេះបើតាមតួលេខពីរដ្ឋលេខាធិការដ្ឋានអាកាសចរស៊ីវិល៕

ដោយ ៖ ណារី