កម្លាំងអាវុធហត្ថខេត្តស្ទឹងត្រែង បង្ក្រាបទីតាំងរុករករ៉ែ ខុសច្បាប់មួយកន្លែង និងឃាត់ខ្លួនមនុស្ស ៦នាក់

(ស្ទឹងត្រែង)៖ កម្លាំងអាវុធហត្ថខេត្ត ដោយមានការសម្របសម្រួលពីលោក ជា សុភក្រ្ត ព្រះរាជអាជ្ញា រងអមសាលាដំបូងខេត្តស្ទឹងត្រែង បានចុះបង្ក្រាបទីតាំងរុករករ៉ែខុសច្បាប់ មួយកន្លែងរកឃើញម៉ាស៊ីនខួង ចំនួន៣គ្រឿង និងឃាត់ខ្លួនជនសង្ស័យ ចំនួន៦នាក់។

សេចក្ដីរាយការណ៍បឋម ពីភ្នាក់ងារសារព័ត៌មានកម្ពុជាថ្មី ប្រចាំខេត្តស្ទឹងត្រែង បានឲ្យដឹងថា ទីតាំងរ៉ែខុសច្បាប់ដែលសមត្ថកិច្ចចុះបង្ក្រាបខាងលើ បានធ្វើឡើងនៅវេលាម៉ោង ៩និង៣០នាទីព្រឹក ថ្ងៃទី២៥ ខែកក្កដា ឆ្នាំ២០២១ ចំណុចត្រពាំងធំ ភូមិអន្លង់ស្វាយ ឃុំអូររ៉ៃ ស្រុកថាឡាបរិវ៉ាត់ ខេត្តស្ទឹងត្រែង។

ទីតាំងរ៉ែខុសច្បាប់ខាងលើ ត្រូវបានសមត្ថកិច្ចឲ្យដឹងថា បានលួចលាក់ដាក់ម៉ាស៊ីនខួង ដើម្បីយករ៉ែ បន្ទាប់ពីសមត្ថកិច្ចស៊ើបអង្កេតស្រាវជ្រាវដឹង ទើបឈានដល់ការរុករកឃើញ ម៉ាស៊ីនខួង(រ៉ែ) ចំនួន៣គ្រឿង និងបានឃាត់ខ្លួនជនសង្ស័យ ចំនួន៦នាក់។

កម្លាំងអាវុធហត្ថ បានបញ្ជាក់បន្ថែមថា ពេលនេះកំពុងតែបន្តរុករកម៉ាស៊ីនខួង និងសម្ភារៈបម្រើឲ្យបទល្មើសខុសច្បាប់បន្ថែមទៀត។ ចំណែកជនសង្ស័យ ចំនួន៦នាក់ សមត្ថកិច្ចមិនទាន់បង្ហាញអត្តសញ្ញាណនៅឡើយ ដោយកំពុងតែបន្តនីតិវិធីនៅឡើយ៕ (ដោយ)៖ ងិន លីម