ព័ត៌មានជាតិ

អាជ្ញាធរខេត្តកោះកុង ក្រែងរម្លឹកដល់មន្ត្រីត្រូវប្រើរថយន្តសង្គ្រោះបន្ទាន់ឱ្យចំគោលដៅ

បានផុស

៣ years មុន

នៅ

ថ្ងៃអង្គារ ២៧ កក្កដា ២០២១

ដោយ

កោះកុង ៖ លោកស្រីអភិបាលខេត្តកោះកុង ណែនាំឱ្យមន្ត្រីជំនាញថ្នាក់ក្រោមចាំបាច់យកប្រើរថយន្តសង្គ្រោះបន្ទាន់ទៅប្រើប្រាស់ឱ្យចំគោលដៅធ្វើយ៉ាងស្រោចស្រង់អាយុជីវិតពលរដ្ឋបានទាន់ពេលវេលា ជៀសវាងប្រព្រឹត្តអំពើខុសឆ្គងផ្ទុយនឹងច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការក្រើនរម្លឹករបស់លោកស្រី មិថុនា ភូថង អភិបាលខេត្តកោះកុងយ៉ាងដូច្នេះធ្វើឡើងកាលពីព្រឹកថ្ងៃទី២៧ ខែកក្កដា ឆ្នាំ២០២១ក្នុងពិធីប្រគល់រថយន្តសង្គ្រោះបន្ទាន់ចំនួន៣ទៅមន្ត្រីសុខាភិបាលចំនួន៣គ្រឿង ដោយមន្ទីរពេទ្យខេត្ត មណ្ឌលសុខភាពត្រពាំងរូង និងមន្ទីរពេទ្យស្រុកស្រែអំបិលជាអ្នកទទួលយកទៅប្រើប្រាស់។

លោកស្រីអភិបាលខេត្ត សង្ឃឹមថា អាជ្ញាធរ និងមន្ត្រីជំនាញ នឹងរថយន្តទៅប្រើប្រាស់ក្នុងផ្តល់សេវាដឹកជញ្ជូនឱ្យបានឆាប់រហ័សអំឡុងពេលមានប្រជាពលរដ្ឋជំងឺធ្ងន់ធ្ងរ ឬគ្រោះថ្នាក់ណាមួយកើតមានឡើងនៅក្នុងមូលដ្ឋានរបស់ខ្លួន ក្នុងន័យលើកកម្ពស់វិស័យសុខាភិបាល ព្រមទាំងទទួលបានទំនុកចិត្តពីសាធារណជន និងពលរដ្ឋ។

លោកវេជ្ជបណ្ឌិត ទៅ ម៉ឹង ប្រធានមន្ទីរសុខាភិបាលខេត្តកោះកុង បានឱ្យដឹងដែរថា រថយន្តសង្គ្រោះបន្ទាន់ចំនួន៣គ្រឿងខាងលើគឺបានមកពីជំនួយឧបត្ថម្ភរបស់រាជរដ្ឋាភិបាល និងប្រជាជនជប៉ុនផ្តល់មកក្រសួងសុខាភិបាលកន្លងទៅ។ ហើយក្រោយទទួលបាន លោកវេជ្ជបណ្ឌិត អញ្ជើញលោកស្រីអភិបាលខេត្តប្រគល់ចែងជូនទៅអាជ្ញាធរមន្ត្រីសុខាភិបាលបន្ត។

ចំណែកលោកស្រី អ៊ិន សុភី អភិបាលរងស្រុកកោះកុង និងលោក ម៉ែន សាម៉េត នាយករដ្ឋបាលមន្ទីរពេទ្យបង្អែកខេត្តកោះកុង បានសម្តែងនូវការអរគុណជាខ្លាំងពេលទទួលបានរថយន្តសង្គ្រោះបន្ទាន់ដ៏ថ្មីស្រឡាងនេះ។

អាជ្ញាធរស្រុកកោះកុង និងមន្ត្រីជំនាញសុខាភិបាលខេត្ត ប្តេជ្ញាចិត្តទុកថា ពួកគាត់នាំយករថយន្តពេទ្យទាំងនេះទៅប្រើប្រាស់ឲ្យចំគោលដៅពិតប្រាកដ ដាច់ខាតមិនធ្វើខុសច្បាប់ឡើយ ព្រោះបច្ចុប្បន្នតម្រូវការមានមធ្យោបាយដឹកជញ្ជូនអ្នកជំងឺជាកត្តាមិនខ្វះបានទេ។

លោកស្រី អ៊ិន សុភី និយាយថា មូលដ្ឋានស្រុកកោះកុងរបស់លោកស្រី គឺពលរដ្ឋរស់នៅរាយប៉ាយដាច់ស្រយោល ខ្លះនៅដែនកោះ នៅពេលមានរថយន្តគឺនឹងជួយស្រួលដល់ការសង្គ្រោះព្យាបាលជំងឺបានទាន់ពេលវេលា បើធៀបនឹងពេលមិនទាន់មានរថយន្ត។ ទោះមានរថយន្ត លោកស្រី មានបំណងស្នើសុំជាទូកសង្គ្រោះបន្ទាន់ផងដែរ៕

អត្តបទ ៖ សិរីវឌ្ឍនៈ