បញ្ជូនប្រធានសហគមន៍ស្វាយចេកថ្មីមកតុលាការរឿងលួចលក់ដីអ្នកដទៃ

ប្រធានសហគមន៍ស្វាយចេកថ្មី ត្រូវបានសមត្ថកិច្ចនគរបាលការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ ចាប់ខ្លួនបញ្ជូនមកសាលាដំបូង នៅព្រឹកថ្ងៃទី២៩ ខែកក្ដដា ឆ្នាំ២០២១នេះ ពាក់ព័ន្ធបទល្មើសលួចលក់ និងរំលោភកាន់កាប់អចលនវត្ថុអ្នកដ៏ទៃ ។

ជនដែលរងបទចោទប្រកាន់ខាងលើនេះឈ្មោះ ខៀវ ផល្លី ភេទប្រុស អាយុ៥០ឆ្នាំ មានទីលំនៅភូមិស្វាយ​ចេក សង្កាត់គោករការ ខណ្ឌព្រែកព្នៅ រាជធានីភ្នំពេញ ។

មុនធ្វើការចាប់ខ្លួនឈ្មោះ ខៀវ ផល្លី ត្រូវបានតុលាការសាលាដំបូងរាជធានីភ្នំពេញ ចេញដីកាបង្គាប់ឲ្យចូលខ្លួនឆ្លើយនៅក្នុងសំណុំរឿងព្រហ្មទណ្ឌរបស់សាលាដំបូងរាជធានីភ្នំពេញ ពាក់ព័ន្ធនឹងបទល្មើសលួចលក់ដីអ្នកដ៏ទៃចំនួនពីរលើកកន្លងមកហើយ តែបុគ្គលរូបនេះគេចវេសមិនព្រមចូលឆ្លើយតាមដីការបង្គាប់របស់ចៅក្រមស៊ើបសួរសាលាដំបូងរាជធានីភ្នំពេញ ទើបតុលាការសម្រេចចេញដីការបង្គាប់ឲ្យសមត្ថកិច្ចសាធារណៈនាំខ្លួនឈ្មោះ ខៀវ ផល្លី ចូលមកកាន់សាលាដំបូងរាជធានីភ្នំពេញ តែម្ដង ដោយសារជនត្រូវចោទរឹងរូសមិនព្រមចូលខ្លួនតាមការកោះហៅរបស់តុលាការជាច្រើនលើកពាក់ព័ន្ធនឹងអំពើល្មើសកែនគ្នាច្រើននាក់ចូលទៅចាប់យកដីដែលមានម្ចាស់ត្រឹមត្រូវ និងប្រឆាំងបំរាមរបស់អាជ្ញាធរមូលដ្ឋាន ៕

អត្ថបទ ៖ មករា