ក្រសួងមហាផ្ទៃ សម្រេចអនុ​ញ្ញាតឲ្យបង្កើត «គណបក្សសំឡេង សហគមន៍កម្ពុជា»

ក្រសួងមហាផ្ទៃ បានសម្រេចអនុញ្ញាតឲ្យបង្កើត «គណបក្សសំឡេង សហគមន៍​កម្ពុជា» ដែលសរសេរជាអក្សរកាត់​ថា “គ.ស.ស.ក” ដែលមានអាសយដ្ឋាន នៃទីស្នាក់ការកណ្ដាល ស្ថិតនៅផ្ទះលេខ០១៥ ផ្លូវជាតិ​លេខ១ ភូមិព្រែក​ធំ​២ សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ។

យោងតាមលិខិត របស់សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ផ្ញើជូនលោក សា លីម តំណាងស្ថាបនិក «គណបក្សសំឡេង សហគមន៍កម្ពុជា» នៅថ្ងៃទី៤ ខែសីហា ឆ្នាំ២០២១ បានបញ្ជាក់ថា ដើម្បីទទួលបានសុពលភាព និងអាចធ្វើសកម្មភាព បានដោយស្របច្បាប់ក្នុងឋានៈ ជានីតិបុគ្គល នៅក្នុងរយៈពេល​១៨០ថ្ងៃ បន្ទាប់ពីបានបង្កើតរួចហើយ គណបក្សនេះ ត្រូវរៀបចំបែបបទ និងបំពេញលក្ខខណ្ឌ ស្នើសុំចុះបញ្ជីនៅ​ក្រសួងមហាផ្ទៃ ស្របតាមកឋាខណ្ឌទី២ នៃមាត្រា៩ មាត្រា១៨ថ្មី មាត្រាថ្មី និងមាត្រា២០ នៃច្បាប់ ស្ដីពី គណបក្ស​ន​យោបាយ៕ (ដោយ)៖ ឃួន សុភ័ក្រ