កម្ពុជាត្រៀមរៀបចំយុទ្ធនាការថ្នាក់ជាតិ​ចុះអប់រំពលរដ្ឋ​ទប់ស្កាត់ការចម្លង​វីរុសកូវីដ១៩

លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានឱ្យដឹងថា​នៅ​ថ្ងៃ​ខាង​មុខឆាប់ៗ​នេះ អនុគណៈកម្មការអប់រំ បណ្ដុះបណ្ដាល និងទំនាក់ទំនងសារធារណៈ នឹងរៀប​ចំ​ឱ្យ​មានយុទ្ធនាការជាតិ អប់រំទៅលើការរួមគ្នាទប់ស្កាត់ជំងឺកូវីដ១៩ ក្រោមប្រធានបទរួមគ្នា​ដើម្បីទប់​ស្កាត់​ការចម្លងនូវវីរុស​កូវីដ​១៩។

លោកជំទាវថ្លែងថា “បណ្ដារាជធានីខេត្តទាំង ២៥ នឹងត្រូវចាប់ផ្ដើមយុទ្ធនាការនេះរួមគ្នា ហើយ​ថ្ងៃ​ខែយើងនឹងប្រាប់ក្នុងពេលឆាប់ៗខាងមុខនេះ ហើយយើងកំពុងតែចាត់​ចែងរៀបចំពីព្រោះ​ត្រូវ​ការ​ពេល​វេលា សម្រាប់រៀបចំនូវសម្ភារអប់រំមួយចំនួន ហើយនិងនីតិវិធីនៃការ​ធ្វើយុទ្ធនា​ការ​ជាតិ”។

យ៉ាង​ណាលោកជំទាវបញ្ជាក់ថា ក្នុងពេលបច្ចុប្បន្ន ការជួបជុំគ្នាច្រើនក៏មិនអាចធ្វើឡើងបានទេ ដូច្នេះ​ត្រូវ​មានវិធានការ នឹងបែបបទ នៃការធ្វើយុទ្ធនាការជាតិ ប្រកបដោយការទទួលខុសត្រូវ ដោយ​ឈរ​លើ​គោលការកាត់បន្ថយការចម្លងវីរុសកូវីដ១៩។

លោក ជំទាវ ឱ វណ្ណឌីន បញ្ជាក់ថា វីរុសអាល់ហ្វា និងដែលតា កំពុងតែដើរតួនាទីសំខាន់ណាស់ ដែលកំពុងតែវ៉ៃលុកនៅកម្ពុជា។ ប្រសិនបើយើងមិនរួមគ្នានោះទេ វីរុសកូវីដនឹងបន្តការ​វ៉ៃលុកចូល​ទៅ​ក្នុងសហគមន៍ ដែលបច្ចុប្បន្នមានការចូលជាបណ្ដើរៗទៅហើយ។

នៅពេលដែលយើងឈឺ មានវីរុសកូវីដ១៩ ចូលទៅក្នុងសរីរាងរបស់យើង វាវ៉ៃលុកទៅលើសួតរ​របស់យើង ហើយ​នៅពេលដែលសួតឈឺ វាពិបាកនឹងការជួយគាំពារ ពីព្រោះធ្វើឱ្យបងប្អូន ខ្វះអុក​ស៊ីសែន ធ្វើឱ្យយើងឆាប់វិវត្តទៅរកសេចក្ដីស្លាប់លឿន៕