ព័ត៌មានជាតិ

កម្ពុជាស្នើភាគីថៃ ជួយព្យាបាលពលករខ្មែរ ដែលឆ្លងជំងឺកូវីដ-១៩ ក្នុងរយៈពេលកំពុងស្វែងរកការងារធ្វើ

បានផុស

៣ years មុន

នៅ

ថ្ងៃពុធ ២៥ សីហា ២០២១

ដោយ

ការស្នើនេះ ធ្វើឡើងក្នុងកិច្ចប្រជុំពិភាក្សាការងារ និងអភិវឌ្ឍន៍សម្ព័ន្ធមេត្រីភាព កម្ពុជា-ថៃ តាមប្រព័ន្ធបញ្ជូនរូបភាពនិងសំឡេង (VTC) នៅទីបញ្ជាការយោធភូមិភាគទី៥ នាព្រឹកថ្ងៃទី២៥ ខែសីហា ឆ្នាំ២០២១នេះ ដែលកិច្ចប្រជុំនេះ ភាគីកម្ពុជាដឹកនាំដោយលោកឧត្តមសេនីយ៍ទោ សេង ធារិន មេបញ្ជាការរង នាយសេនាធិការយោធភូមិភាគទី៥ និងមន្ត្រីចំណុះខេត្តបាត់ដំបង ខេត្តបន្ទាយមានជ័យ ហើយភាគីថៃដឹកនាំដោយលោកឧត្តមសេនីយ៍ត្រី ក្រៃភព ឆៃយ៉ាក់ផាន់ នាយសេនាធិការកងទ័ពភូមិភាគទី១ និងមន្ត្រីរាជការ ខេត្តស្រះកែវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងកិច្ចប្រជុំបានលើកបញ្ហាចំនួន៤ រួមមាន៖

ទី១. ការការពារ និងទប់ស្កាត់ពលករឆ្លងដែន និងការរៀបចំការងារសម្រាប់ពលករ។

ទី២. បញ្ហាគ្រឿងញៀន ខ្លឹមសារទី៣ បញ្ហាផ្ទុះជំងឺកូវីដ-១៩ ក្នុងស្ថានការណ៍បច្ចុប្បន្ន និងខ្លឹមសារទី៤ បញ្ហាល្បែងភ្នាល់តាមអនឡាញ។

នៅក្នុងឱកាសនោះ លោកឧត្តមសេនីយ៍ទោ សេង ធារិន បានស្នើឱ្យភាគីថៃជួយព្យាបាលពលករកម្ពុជា ដែលវិជ្ជមានជំងឺកូវិដ-១៩ ជាពិសេសពលករ ដែលកំពុងស្វែងរកការងារធ្វើក្នុងប្រទេសថៃ និងស្នើភាគីថៃ ជួយសម្របសម្រួលករណីពលករខ្មែរឆ្លងដែនខុសច្បាប់ មិនបានប្រព្រឹត្តទោសធ្ងន់ធ្ងរ សូមបញ្ជូនខ្លួនពលករទាំងនោះត្រឡប់មកកម្ពុជាវិញ និងជួយទប់ស្កាត់មិនឱ្យមានមេខ្យល់រង់ចាំទទួលពលករខុសច្បាប់ពីកម្ពុជា។

ជាមួយគ្នានោះដែរ ភាគីទាំងពីរបានស្នើសុំឲ្យកម្លាំងសមត្ថកិច្ច កងកម្លាំងប្រដាប់អាវុធនៅជួរមុខ និងស្ថាប័នជំនាញ ដែលមានការពាក់ព័ន្ធ រួមគ្នាពិចារណា ដើម្បីកំណត់ជាគោលការណ៍សម្រាប់ធ្វើការដោះស្រាយបញ្ហាផ្សេងៗ តាមព្រំដែនឱ្យសមស្របជាប្រទេសមានភូមិផងរបងជាមួយគ្នា។

បន្ថែមពីនោះ ភាគីទាំងពីរ ក៏បានពិភាក្សាគ្នា ដោយយកចិត្តទុកដាក់ និងផ្អែកលើទស្សនៈផលប្រយោជន៍រួមរបស់ប្រទេសទាំងពីរ ពិសេសប្រជាពលរដ្ឋ ដែលរស់នៅតាមបរិវេណព្រំដែនកម្ពុជា-ថៃ៕

ដោយ ៖ កោះកែវ