ចាប់ជនសង្ស័យគ្រឿង​ញៀន​៣នាក់ដកហូតលុយ​១៥លាន​រៀល និងសម្ភារថ្នាំញៀនមួយចំនួន​

ជនសង្ស័យ​ប្រុស​ស្រី​៣នាក់​ត្រូវ​សមត្ថកិច្ច​នគរបាល​ចាប់​ឃាត់ខ្លួន ក្នុងករណី​ជួញដូរ​គ្រឿងញៀន​ដោយបាន​ដកហូត​ថ្នាំញៀន​ចំនួន៥១កញ្ចប់ លុយ១៥លាន​រៀល​ និង​សម្ភារៈ​មួយចំនួនទៀត​។

​ករណី​បង្ក្រាប​គ្រឿងញៀន​ខាងលើនេះ​បានធ្វើ​ឡើងនៅ​ថ្ងៃទី​៣១ ខែសីហា ឆ្នាំ​២០២១ នៅក្នុង​ភូមិ​ឧទុម្ពរ​ឃុំ​ស្វាយជ្រុំ ស្រុក​រលាប្អៀរ ខេត្តកំពង់ឆ្នាំង។​

សមត្ថកិច្ច​នគរបាល​ប្រឆាំង​គ្រឿងញៀន​ស្រុករលាប្អៀរ បាន​អោយដឹងថា ក្រោម​បញ្ជារ​លោកស្នង​ការ និង​មានការ​សម្របសម្រួល​នីតិវិធី​ពី​ឯកឧត្តម​ព្រះ​រា​អាជ្ញា កម្លាំង​ជំនាញ​សហការ​ជាមួយ​កម្លាំង​អន្តរាគមន៍​ពិសេស និង​កម្លាំង​អធិការនគរបាល​ស្រុក​រលាប្អៀរ បាន​បង្ក្រាប​ករណីរក្សាទុកជួញដូរ សមគំនិត នឹង​ផ្ដល់​ទីតាំង នៅ​ភូមិ​ឧទ​ម្ព​រ ឃុំ​ស្វាយជ្រុំ​ ស្រុក​រលាប្អៀរ ឃាត់​ជនសង្ស័យ​ប្រុស​ស្រី​ចំនួន៣នាក់ និង​ដកហូត​ប្រាក់​ចំនួន១៥​លាន​​រៀល ថ្នាំ​ញៀន​ចំនួន៥១កញ្ចប់ ទម្ងន់៣១,១១ ក្រាម ទូរ​សព្ទ២គ្រឿង និង​ឧ​បករណ៍​វេច​ខ្ចប់​ថ្នាំញៀន និង​ឧបករណ៍ប្រើប្រាស់​សម្រាប់​ជក់​ថ្នាំញៀនមួយចំនួន​ផងដែរ​។​

ជនសង្ស័យ​ប្រុស​ស្រី​ទាំង៣នាក់​ខាងលើ​ត្រូវបាន​សមត្ថកិច្ច​ជំនាញ​កសាង​សំណុំរឿងបញ្ជូនទៅ​តុលា ការ​ដើម្បី​ចាត់ការ​បន្ត​តាម​និតិ​វិធី​៕

អត្ថបទ៖ ឈៀង​ថា​រិ​ទ្ធ​