ព័ត៌មានជាតិ
អាជីវកម្មទេសចរណ៍៩០ ភាគរយបានបិទទ្វារ តែការប្រកាសក្ស័យធនមានចំនួនតិចតួច
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានអះអាងថា រហូតមកដល់ពេលនេះ អាជីវកម្មទេសចរណ៍៩០ ភាគរយបានបន្តបិទទ្វារ ដោយសារតែការរីករាលដាល នៃជំងឺកូវីដ-១៩ ហើយនៅសល់១០ភាគរយ បានប្តូរទៅបម្រើសេវាកម្មផ្សេងៗគួបផ្សំ ដោយបម្លែងខ្លួនទៅជាការលក់ដូរ និងដឹកជញ្ជូនអីវ៉ាន់ផ្សេងៗ តែការប្រកាសក្ស័យធនតែម្តងមានចំនួនតិចតួចណាស់។
បើតាមលោកស្រី ឆាយ ស៊ីវលីន បរិយាកាសទេសចររហូតមកដល់ពេលនេះ នៅតែមានសភាពតានតឹងដដែល ដោយសារតែមានការរឹតត្បិតផ្សេងៗ ហើយបើទោះបីជាមានការបន្ធូរបន្ថយបន្តិចក្តី ភ្ញៀវទេសចរ ក៏ដូចជាប្រជាពលរដ្ឋក្នុងស្រុក នៅតែមិនទាន់ហ៊ានចេញដើរកម្សាន្តនៅឡើយ ដោយសារតែព្រួយបារម្ភទៅលើមេរោគបំប្លែងខ្លួនថ្មី និងការចាក់វ៉ាក់សាំងនៅមិនទាន់រួចរាល់នៅឡើយ ដូច្នេះពួកគាត់នៅមានការប្រយ័ត្នប្រយែង ដែលធ្វើឱ្យអាជីវកម្មទេសចរណ៍នៅតែយ៉ាប់យ៉ឺនដដែល។
លោកស្រីប្រធានសមាគមទីភ្នាក់ងារទេសចរណ៍កម្ពុជារូបនោះ បានឲ្យដឹងថា “មកដល់ពេលនេះសមាជិក សមាគម មានការព្យួរការងារ ឬក៏បិទទ្វារមានស្ទើរតែទាំងអស់ទៅហើយ ដែលមានប្រមាណ៨៥ ទៅ៩០ភាគរយ ដែលបានបិទទ្វារ មិនមានសកម្មភាពអ្វីទាំងអស់ ហើយអ្នកដែលនៅប្រមាណ១០ ភាគរយនៅបម្រើសេវាកម្មផ្សេងៗគួបផ្សំ ដោយបំលែងខ្លួនទៅជាការលក់ឥវ៉ាន់ ឬដឹកជញ្ជូនអីវ៉ាន់ផ្សេងៗ ដូច្នេះចំនួន៩០ ភាគរយ ដែលគាត់គ្មានសេវាផ្សេង បិទទ្វារតែម្ដង”។
តែទោះជាយ៉ាងណា លោកស្រី ឆាយ ស៊ីវលីន អះអាងថា ការប្រកាសក្ស័យធនតែម្តង មិនមានច្រើនទេ។ ជាមួយគ្នានោះ លោកស្រីបានសំណូមពរឲ្យទម្លាក់កម្ចីណាមួយមកដល់ទីភ្នាក់ងារទេសចរណ៍ ដើម្បីឲ្យពួកគាត់បន្តនិរន្តរភាពតទៅទៀត ដើម្បីជួយរក្សាទុកអ្នកជំនាញទេសចរណ៍។ លោកស្រីថា វិស័យទេសចរណ៍នេះ ដែលអាចប្រតិបត្តិបានលុះត្រាតែមានអ្នកជំនាញ ត្រូវទៅប្រកួតប្រជែងទៅដណ្ដើមទីផ្សារនៅក្នុងលើឆាកអន្តរជាតិ ដូច្នេះយើងត្រូវរក្សាពួកគាត់ទុក ដោយការចិញ្ចឹមពួកគាត់ ពីព្រោះគាត់ត្រូវការចិញ្ចឹមជីវភាព ហើយប្រសិនបើយើងកាត់ចោល គាត់នឹងទៅរកការងារផ្សេង ហើយនៅពេលស្ថានការណ៍ប្រសើរឡើង យើងត្រូវការគាត់ តែយើងមិនអាចហៅគាត់មកវិញបាន។
វិស័យទេសចរណ៍ ត្រូវបានរាជរដ្ឋាភិបាលកម្ពុជាចាត់ទុកថា ជាឧស្សាហកម្មគ្មានផ្សែង និងជាមាសបៃតង ដែលបានរួមចំណែកសម្រាប់ផលិតផលក្នុងស្រុកសរុបរបស់កម្ពុជាប្រមាណ១៣ភាគរយ ប៉ុន្តែដោយសារការរីករាលដាលនៃជំងឺកូវីដ១៩ បានធ្វើឲ្យវិស័យមួយនេះធ្លាក់ចុះយ៉ាងខ្លាំង។ ជាមួយគ្នានោះ ក្រសួងទេសចរណ៍ ក៏បានចង្អុលបង្ហាញនូវផែន ដើម្បីការស្តារ និងលើកស្ទួយវិស័យទេសចរណ៍កម្ពុជាឡើងវិញផងដែរ ប៉ុន្តែដើម្បីសម្រេចបាននូវចក្ខុវិស័យនេះ ផែនការស្តារ និងលើកស្ទួយវិស័យទេសចរណ៍ បានដាក់ចេញនូវវិធានគោលនយោបាយអន្តរាគមន៍ ក្នុងរយៈពេលខ្លី មធ្យម និងវែង ជា៣ដំណាក់កាល។
បើតាមក្រសួងទេសចរណ៍ ក្នុងដំណាក់កាលនីមួយៗមានការដាក់ចេញនូវយុទ្ធសាស្ត្រ និងផែនការសកម្មភាពអនុវត្ត ដោយអនុលោមទៅតាមសសរស្ដម្ភ៤ គឺបេតិកភណ្ឌវប្បធម៌ ទេសចរណ៍តំបន់ឆ្នេរ អេកូទេសចរណ៍ និងភាពជាប្រជាជនខ្មែរ រួមទាំងគោលដៅយុទ្ធសាស្ត្រចំនួន៣ គឺសេដ្ឋកិច្ច និងការងារក្នុងវិស័យទេសចរណ៍ ការផ្សព្វផ្សាយ និងការជំរុញទេសចរណ៍ក្នុងស្រុក និងអន្តរជាតិ និងអភិបាលកិច្ចក្នុងវិស័យទេសចរណ៍៕
ដោយ ៖ កោះកែវ
-
ព័ត៌មានជាតិ៤ ថ្ងៃ ago
ផ្លូវកាត់ថ្មីតភ្ជាប់ពីខេត្តបាត់ដំបង មកសមុទ្រខេត្តកោះកុងសម្រេចបានជាង ៨០%
-
សន្តិសុខសង្គម៣ ថ្ងៃ ago
ព័ត៌មានបឋម៖ ស្វាមីម្ចាស់ប្រេន Lakamo ត្រូវក្រុមចោរចូលចាប់ជម្រិត និងបាញ់សម្លាប់ដល់ក្នុងផ្ទះ
-
ជីវិតកម្សាន្ដ៦ ថ្ងៃ ago
កូនស្រីពៅតារាហុងកុង Michael បង្ហោះរូបអាក្រាតកាយសារជាថ្មី
-
ព័ត៌មានជាតិ៥ ថ្ងៃ ago
ស្អែក ថ្ងៃទី១០ ខែមេសា រូបសំណាកសេះសមុទ្ទ នឹងសម្ពោធជាផ្លូវការ
-
ព័ត៌មានអន្ដរជាតិ៧ ថ្ងៃ ago
ការស្ទង់មតិ ៖ សង្ក្រាន្តឆ្នាំនេះ ប្រជាជន ថៃ រាងពិបាកចាយវាយ ព្រោះម្នាក់ៗសុទ្ធតែជាប់បំណុលគេច្រើន
-
ព័ត៌មានជាតិ៤ ថ្ងៃ ago
ជនរងគ្រោះស្នាក់នៅមជ្ឈមណ្ឌលឱកាសខ្ញុំ ទទួលបានភាពសប្បាយរីករាយក្នុងពិធីសង្រ្កាន្តឆ្នាំថ្មី
-
ជីវិតកម្សាន្ដ៤ ថ្ងៃ ago
ក្រោយផ្ទុះការរិះគន់មិនឲ្យតម្លៃក្រុម Hashtag band ថ្ងៃសង្ក្រាន្ត គណៈគ្រប់គ្រងសាលាចេញសេចក្ដីបំភ្លឺ
-
ជីវិតកម្សាន្ដ៦ ថ្ងៃ ago
ករុណា ពេជ្រ ហួសចិត្តអ្នក Troll សើចចំអក សេះសមុទ្រ បាញ់ទឹក នៅខេត្តកំពត