ព័ត៌មានជាតិ

ឃុំខ្លួនថៅកែខ្សាច់ សិតត្បូចោទពីបទ « មិនបំពេញកាតព្វកិច្ចចំពោះឧបករណ៍អាចជួញដូរបាន »

បានផុស

៣ years មុន

នៅ

ថ្ងៃសៅរ៍ ៤ កញ្ញា ២០២១

ដោយ

ចៅក្រមស៊ើបសួរសាលាដំបូងរាជធានីភ្នំពេញ កាលពីល្ងាចថ្ងៃទី០៣ ខែកញ្ញា ឆ្នាំ២០២១ បានចេញដីកាសម្រេចឃុំខ្លួនថៅកែដេប៉ូខ្សាច់សិតត្បូ ដាក់ពន្ធនាគារជាបណ្ដោះអាសន្នក្រោមការចោទប្រកាន់ពីបទ « មិនបំពេញកាតព្វកិច្ចចំពោះឧបករណ៍អាចជួញដូរបាន » ។

ជនជាប់ចោទដែលត្រូវឃុំខ្លួនឈ្មោះ លាង សុងលី ភេទប្រុស មានទីលំនៅផ្ទះលេខ ២៧ ផ្លូវលេខ ២០អឺ ភូមិត្រពាំងល្វា សង្កាត់កកាប ខណ្ឌពោធិសែនជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចបានបញ្ជាក់ថា ការឃាត់ខ្លួនឈ្មោះ លាង សុងលី គឺអនុវត្តតាមដីកាបញ្ជាឲ្យចូលខ្លួនរបស់លោក ប្លង់ សុផលព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ លេខ ២៥៩ អយង ចុះថ្ងៃទី ២៤សីហា ឆ្នាំ២០២១ ដើម្បីធ្វើការសាកសួរលើបណ្ដឹងរបស់ឈ្មោះ តាំង ហ្គិចលៀង ដែលបានប្ដឹងពីបទ « មិនបំពេញកាតព្វកិច្ចចំពោះឧបករណ៍ដែលអាចជួញដូរបាន » ពាក់ព័ន្ធនិងករណីជំពាក់លុយកាក់ ប្រមាណ៤០ម៉ឺនដុល្លារ ហើយចេញសែកសងទៅម្ចាស់បំណុលវិញ ប៉ុន្តែសែកនោះគ្មានលុយសោះ ទើបតំណាងអយ្យការបានសម្រេចចោទប្រកាន់ជាផ្លូវការ ហើយបញ្ជូនសំណុំរឿងនិងជនត្រូវចោទអោយចៅក្រមចាត់ការតាមច្បាប់។

រហូតដល់ល្ងាចថ្ងៃទី០៣ ខែកញ្ញា ឆ្នាំ២០២១ ចៅក្រមស៊ើបសួរបានចេញដីកាសម្រេចឃុំខ្លួនឈ្មោះ លាង សុងលី ដាក់ពន្ធនាគារជាបណ្ដោះអាសន្នតាមការចោទប្រកាន់របស់តំណាងអយ្យការ៕

អត្ថបទ៖ មករា

Related Topics:ឃុំខ្លួន