ព័ត៌មានជាតិ
អច្ឆរិយខេត្តកំពត ប្រាសាទបុរាណ ៣ កន្លែង លាក់ខ្លួនក្នុងរូងភ្នំ កម្រភ្ញៀវទៅដល់
មានភ្នំ មានសមុទ្រ និងធម្មជាតិស្រស់បំព្រង នេះជាសក្តានុពលខេត្តកំពត។ ក្រៅពីសម្បត្តិធម្មជាតិច្រើនអនេក ខេត្តកំពតនៅសេសសល់សំណង់ប្រាសាទបុរាណមួយចំនួនទៀត បើទោះបីមិនច្រើនដូចខេត្តមួយចំនួនទៀតក្តី។
បើតាមលោកមាឃ វុទ្ធី ប្រធានការិយាល័យបេតិកភណ្ឌខេត្តកំពតបានប្រាប់គេហទំព័រកម្ពុជាថ្មីថា ខេត្តកំពតនៅសេសសល់ប្រាសាទបុរាណតិចតួចណាស់។ ប្រាសាទនៅសល់រូបរាងមានចំនួន ៤ សុទ្ធតែមានអាយុកាលរាប់ពាន់ឆ្នាំ។
បើតាមមន្រ្តីវប្បធម៌រូបនេះ លក្ខណៈសម្បត្តិពិសេសរបស់ប្រាសាទបុរាណក្នុងខេត្តកំពត ក្នុងចំណោមប្រាសាទសេសសល់នៅរូបរាងចំនួន ៤ មានប្រាសាទ ៣ ត្រូវបានសាងសង់ក្នុងល្អាងភ្នំ ខុសពីប្រាសាទនៅតាមខេត្តនិងតំបន់ដទៃទៀត។
ប្រាសាទភ្នំឈ្ងោកលក្ខណ:ពិសេសត្រង់ថា ប្រាសាទនេះត្រូវបានកសាងឡើងដោយឥដ្ឋនៅក្នុងរូងភ្នំ ស្ថិតនៅខ្ពស់ពីដីយ៉ាងហោចណាស់ក៏៤០ម៉ែត្រដែរ។ ប្រាសាទភ្នំឈ្ងោកស្ថិតនៅចម្ងាយប្រហែល ៨គីឡូម៉ែត្រពីទីរួមខេត្តកំពត ដោយធ្វើដំណើតាមផ្លូវជាតិលេខ៣៣ ទៅខេត្តកែប និងមានចម្ងាយ២៧ គីឡូម៉ែត្រតាមផ្លូវជាតិលេខ៣។
លោកបញ្ជាក់ថា បើតាមការស្រាវជ្រាវរបស់អ្នកបុរាណវិទូ ភ្នំឈ្ងោកមានគុហាសរុប១២១ គុហា ក្នុងនោះមានគុហាធំៗចំនួន៨ និងគុហាតូចៗចំនួន១១៣។ នៅពេលដែលឈានជើងចូលក្នុងប្រាសាទឥដ្ឋនេះ នឹងប្រទះឃើញលិង្គថ្មធម្មជាតិមួយដុះចេញពីបាតភ្នំ ស្ថិតនៅចំកណ្តាលប្រាសាទ។ លក្ខណៈពិសេសនេះហើយ ធ្វើឱ្យប្រាសាទនេះមានមហិទ្ធិឬទ្ធិ និងកេរ្តិ៍ឈ្មោះល្បីល្បាញក្នុងអតីតកាល និងជាបូជនីយដ្ឋានយ៉ាងសំខាន់ក្នុងសម័យដើមដែលជនជាតិខ្មែរនៅកាន់ព្រហ្មញ្ញសាសនា។
ប្រាសាទមួយទៀតសាងសង់នៅរូងភ្នំដែរគឺប្រាសាទភ្នំខ្យង។ ប្រាសាទភ្នំខ្យងជាប្រាសាទតូចមួយ សាងសង់ឡើងតាំងពីចុងសតវត្សរ៍ទី៦ និងដើមសតវត្សរ៍ទី៧ មកម៉្លេះ គឺមុនសម័យអង្គរទៅទៀត។ ប្រាសាទភ្នំខ្យងកម្រមានគេដឹង ហើយក៏គ្មានភ្ញៀវហ៊ានចូលមើល លុះត្រាមានអ្នកស្រុកភូមិនាំចូលទៅ។
ចំណែកប្រាសាទគុហាព្រះ ឬប្រាសាទភ្នំទទុង ក៏សាងសង់នៅក្នុងរូងភ្នំ សង់បែរមុខទៅទិសខាងលិច ដែលមានប្រាង្គធ្វើអំពីឥដ្ឋ និងថ្មបាយក្រៀម ហើយស៊ុមទ្វារធ្វើពីថ្មថ្លើម អណ្តើក។ នៅខាងមុខប្រាសាទនេះមានលិង្គធម្មជាតិដូចប្រាសាទ ភ្នំឈ្ងោក និងភ្នំខ្យងដែរ និងមានទរបង្ហូរទឹកនៅជ្រុងខាងជើង។
មានសិលាចារឹកមួយឈ្មោះគុហាព្រះ (បច្ចុប្បន្នបានបាត់ទៅហើយ) ដែលតាមលក្ខណៈអក្សរនៃសិលាចារឹកចារឡើង ក្នុងរជ្ជកាលព្រះបាទយសោវរ្ម័នទី១ នាសតវត្សទី៩ ជាទ្វេភាសាគឺ ខ្មែរបុរាណ និងសំស្ក្រឹត។ បើយោងតាមសំណង់ប្រាសាទនៅក្នុងរូងភ្នំទទុង ប្រាសាទនេះត្រូវបានកសាងឡើងនៅក្នុងស.វ ទី៧ នៃគ.ស ក្រោមរជ្ជកាលនៃព្រះបាទឦសានវរ្ម័នទី១ នា សម័យចេនឡាដើម្បីឧទ្ទិសថ្វាយដល់ព្រះសិវៈ (ព្រះឥសូរ)។
ប្រាសាទនៅសល់រូបរាងចុងក្រោយគឺប្រាសាទវត្តប្រាសាទ។ ប្រាសាទវត្តប្រាសាទ ជាសំណង់ព្រហ្មញ្ញសាសនា។ ប្រាសាទវត្តប្រាសាទកសាងឡើងក្នុងសតវត្សន៍ទី ១១ ដោយព្រះបាទសូរ្យវរ្ម័នទី ១ ដែលមានអាយុកាលប្រហែល ១០០ ឆ្នាំមកហើយ។
ប្រាសាទវត្តប្រាសាទ មានតួប៉មមួយរាងបួនជ្រុង ធ្វើពីថ្មបាយក្រៀម ប្រវែង ៧ម៉ែត្រ និងមានកំពស់ពី៧ ទៅ ៨ ម៉ែត្រ បែរមុខទៅទិសខាងកើត គឺបែរមុខពីចំហៀងខាងក្រោយនៃព្រះវិហារ។ ប្រាសាទកំពុងទទួលរងការទ្រុឌទ្រោម ដោយសារមានឬសឈើមួយដើមដុះនៅខាងក្នុងតួប្រាសាទ អាចបណ្តាលឲ្យជញ្ជាំងប្រាសាទដួលរលំនៅថ្ងៃណាមួយមិនខាន។
ក្រៅពីប្រាសាទដែលនៅសេសសល់រូបរាងទាំង ៤ បើតាមមន្រ្តីផ្នែកបេតិកភណ្ឌ លោក មាឃ វុទ្ធី ខេត្តកំពតនៅសល់ប្រាសាទដែលបាក់បែកគ្មានរូបរាងមួយចំនួនទៀតដូចជា៖
-ប្រាសាទភ្នំនាងសេដាឱន នៅស្រុកទឹកឈូ
-ប្រាសាទភ្នំប្រាសាទ នៅស្រុកកំពង់ត្រាច
-ប្រាសាទព្រះឱង្កា នៅស្រុកអង្គរជ័យ
-ប្រាសាទភ្នំថ្មពួក នៅស្រុកឈូក
-គ្រឹះប្រាសាទរូងភ្នំផ្អាវ នៅស្រុកកំពង់ត្រាច
-គ្រឹះប្រាសាទរូបភ្នំដំរី នៅស្រុកកំពង់ត្រាច
ក្រៅពីនេះនៅមានស្ថានីយបុរេប្រវត្តិ ២ កន្លែង គឺស្ថានីយភ្នំល្អាង និងភ្នំក្បាលរមាស៕
អត្ថបទ៖ ប៊ុណ្ណារ៉ា
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សេដ្ឋកិច្ច១ សប្តាហ៍ ago
តាសក់ផ្អែម ៥ តោន របស់ កសិករម្នាក់ លក់ចេញអស់ ក្រោយសហគមន៍កសិកម្មជួយរកទីផ្សារ
-
ព័ត៌មានអន្ដរជាតិ១ សប្តាហ៍ ago
នាឡិកា ៦ គ្រឿងរបស់កូនពៅសេដ្ឋី ឥណ្ឌា ដែលខំសន្សំទុក មានមួយមេ Facebook ទាក់ចិត្តខ្លាំង
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៧ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៤ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ