ព័ត៌មានជាតិ

រកឃើញអ្នកឆ្លងជំងឺកូវីដ ពាក់ព័ន្ធនឹងផ្សារ KRD ស្រុកកំរៀង កើនឡើងជាង៤០០នាក់ហើយ

បានផុស

៣ years មុន

នៅ

ថ្ងៃពុធ ១៥ កញ្ញា ២០២១

ដោយ

អាជ្ញាធរស្រុកកំរៀង បានឲ្យដឹងថា តួលេខអ្នកឆ្លងជំងឺកូវីដ១៩ ពាក់ព័ន្ធនឹងផ្សារខេអឌី(KRD) ស្រុកកំរៀង បានកើនឡើងចំនួនជាង៤០០នាក់ ខណៈដែលអាជ្ញាធរ និងមន្ត្រីសុខាភិបាលកំពុង តែបន្តយកសំណាក លើអ្នកភូមិនិងអាជីវករពាក់ព័ន្ធបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សុខ គឹមខុន អភិបាលស្រុកកំរៀង បានបញ្ជាក់ថា គិតត្រឹមល្ងាចថ្ងៃ ទី១៤ខែកញ្ញា តួលេខអ្នកពាក់ព័ន្ធនឹងផ្សារ K R D មានអ្នកឆ្លងកើនឡើងដល់ ៤០៧នាក់ក្នុង នោះស្ត្រី២៣២នាក់ ក្នុងចំណោមអ្នកមកយកសំណាកចំនួន១១៧៦នាក់ ស្ត្រី៦៣៩នាក់។ លោកអភិបាលស្រុកបានឲ្យដឹងថា បច្ចុប្បន្ន អាជ្ញាធរនិងមន្ត្រីសុខាភិបាលកំពុងបន្ត យកសំណាកលើអ្នកពាក់ព័ន្ធបន្ថែមទៀត ខណៈដែលប្រជាពលរដ្ឋខ្លះកំពុងសម្ងំនៅក្នុងផ្ទះ មិនព្រមចេញមកយកសំណាក។

លោកបានអំពាវនាវឲ្យប្រជាពលរដ្ឋនិងអាជីវករទាំងអស់ ដែលពាក់ព័ន្ធសហការមកយក សំណាកឲ្យបានលឿន និងគ្រប់គ្នា ដើម្បីកុំឲ្យឆ្លងចូលសហគមន៍កាន់តែច្រើនថែមទៀត។

លោក សុខ គឹមខុន បន្ថែមថា មូលហេតុដែលមានការផ្ទុះជំងឺកូវីដ១៩ ក្នុងផ្សារKRD ក្នុងភូមិអូដារលើ ស្រុកកំរៀង និងរាលដាល់ដល់ភូមិទាំងមូលនេះ ដោយសារតែប្រជាពលរដ្ឋម្នាក់ បានចូលទៅទិញទំនិញនៅទឹកដីថៃ យកមកលក់នៅផ្សារKRD នេះរហូតដល់ថ្ងៃទី០៧ ខែកញ្ញា គាត់មានអាការៈខុសធម្មតា ក៏ពិនិត្យសំណាកឃើញមានកូវីដ១៩ និងក្រោយមករកឃើញ ប្រជាពលរដ្ឋម្នាក់ទៀត ដែលទៅទិញទំនិញនៅផ្សារថៃដែរ មានវិជ្ជមានកូវីដ១៩ផងដែរ។

ដោយឃើញដូច្នេះអាជ្ញាធរ និងមន្ត្រីសុខាភិបាល ចាប់ផ្តើមពិនិត្យសំណាកលើប្រជាពលរដ្ឋ និង អាជីវករដែលចេញចូលទៅទិញទំនិញ នៅផ្សារថៃយកមកលក់នៅផ្សារKRDនេះ ទើបឃើញជាបន្តបន្ទាប់កាន់តែច្រើនឡើង រហូតដល់បិទខ្ទប់ភ្លាមៗនៅទីតាំងផ្សារនេះ និងបន្តបិទភូមិអូរដា លើទាំងមូលតែម្តង រហូតដល់មានការជូនដំណឹងជាថ្មី ដើម្បីទប់ស្កាត់កុំឲ្យឆ្លងរាលដាលទៅភូមិ ផ្សេងៗទៀត៕

អត្ថបទ៖ សោ និយមរ័ត្ន