ម្តាយឪពុក នៅកោះកុង ត្រេក អរពេលកូនៗ បានទទួលថ្នាំវ៉ាក់សាំង បង្ការជំងឺកូវីដ១៩

ក្រុមម្តាយឪពុក និងអាណាព្យាបាលកុមារៗ នៅខេត្តកោះកុង នាំគ្នាបង្ហាញក្តីត្រេកអរសប្បាយរីករាយជាខ្លាំងពេលដែលកូនចៅៗ របស់ខ្លួនបានចាក់វ៉ាក់សាំងបង្ការជំងឺកូវីដ១៩ ពីរាជរដ្ឋាភិបាលកម្ពុជា។

ដូចតាមការគ្រោងទុក នៅខេត្តកោះកុង កំពុងដំណើរការចាក់វ៉ាក់សាំងសម្រាប់កុមារអាយុចាប់ពី ៦ ឆ្នាំ ដល់១២ឆ្នាំ ក្រោយពីមានការសម្រេចអនុញ្ញាតពីសម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។

និយាយពីក្រុមឪពុកម្តាយ ព្រមទាំងបណ្តាអាណាព្យាបាលកុមារ នៅក្នុងក្រុងខេមរភូមិន្ទ និងបណ្តាស្រុកផ្សេងទៀត បង្ហាញអារម្មណ៍រីករាយជាខ្លាំងគ្មានអ្វីប្រៀបផ្ទឹមបានពេលឃើញកូនចៅរបស់ពួកគាត់បានចាក់វ៉ាក់សាំងបង្ការជំងឺ កូវីដ១៩ដូចមនុស្សចាស់ ឬមនុស្សពេញវ័យដ៏ទៃទៀតដែរ។

អ្នកស្រី ស ស្រីអូន រស់នៅភូមិ៤ សង្កាត់ដងទង់ និងលោក ជិន វណ្ណឌី រស់នៅភូមិ១ សង្កាត់ស្មាច់មានជ័យ ក្រុងខេមរភូមិន្ទ លើកឡើងនៅថ្ងៃទី១៧ ខែកញ្ញា ឆ្នាំ២០២១នេះថា ការនាំកូនៗមកចាក់វ៉ាក់សាំងនេះដោយការស្ម័គ្រចិត្តគ្មានការបង្ខិតបង្ខំពីណាម្នាក់ទេ ព្រោះយល់ថា មានតែវ៉ាក់សាំងទេដែលអាចជួយឱ្យកូនៗរួចផុតការឆ្លងជំងឺកូវីដ១៩បច្ចុប្បន្នបានយ៉ាងមានប្រសិទ្ធិភាពបំផុត។

តំណាងអាណាព្យាបាលទាំងពីររូបខាងលើ រំពឹងថា នៅពេលដែលកូនៗបានចាក់វ៉ាក់សាំង ពួកគេនឹងមានសុខភាពល្អ ហើយអាចចូលរៀននៅតាមសាលារដ្ឋនិងឯកជនបានឆាប់ៗដែរ។

បន្ថែមលើនេះ ពួកគាត់ ថ្លែងអំណរអរគុណយ៉ាងជ្រោលជៅជូនសម្តេចតេជោ ដែលបានយកចិត្តទុកដាក់ខ្ពស់លើការផ្តល់វ៉ាក់សាំងដល់ក្រុមកុមារតូចៗ ក្រោយចាក់ថ្នាំរួចបន្តអនុវត្តវិធានការសុខាភិបាល៣កុំ៣ការពារជាប្រចាំមិនអាចធ្វេសប្រហែសបានឡើយ។

យោងតាមទិន្នន័យរបស់មន្ទីរសុខាភិបាលខេត្តកោះកុង បង្ហាញថា មានកុមារា កុមារីចំនួន១៦.៧៥៥នាក់ ដែលនឹងត្រូវមកទទួលបានថ្នាំវ៉ាក់សាំងបង្ការការពារជំងឺកូវីដ១៩។

ទាក់ទិននឹងការយុទ្ធនាការចាក់វ៉ាក់សាំងចាក់វ៉ាក់សាំងនេះដែរ កន្លងទៅ មន្រ្តីជំនាញបានចាក់វ៉ាក់សាំងដល់ក្រុមកុមារអាយុ១២ដល់១៧ឆ្នាំបានប្រមាណ១ម៉ឺន៤ពាន់តាមការកំនត់អស់ហើយ ដោយពួកគេសុទ្ធតែមានសុខភាពល្អប្រសើរក្រោយចាក់រួច។

លោកវេជ្ជបណ្ឌិត ទៅ ម៉ឹង ប្រធានមន្ទីរសុខាភិបាលខេត្តកោះកុង ឱ្យដឹងថា ដំណើរការចាក់វ៉ាក់សាំងសម្រាប់កុមារអាយុ៦ឆ្នាំដល់១២ឆ្នាំ ធ្វើឡើងរយៈពេល៨ថ្ងៃចាប់ពីថ្ងៃទី១៧ដល់ថ្ងៃទី២៣ ខែកញ្ញា នៅតាមទីតាំងដែលបានកំណត់រួចរាល់។

ដូច្នេះលោកជឿជាក់ថា អាណាព្យាបាលឪពុកម្តាយរបស់កុមារ នឹងនាំកូនៗរបស់ខ្លួនមកទទួលវ៉ាក់សាំងបង្ការការពារកូវីដ១៩ឱ្យបានគ្រប់ៗគ្នា។

ទីតាំងផ្តល់ការចាក់វ៉ាក់សាំងនេះដែលអាចទទួលសេវាបាន រួមមាន៖

១-សាខាកាកបាទក្រហមកម្ពុជាខេត្ត ស្ថិតនៅក្នុងក្រុងខេមរភូមិន្ទ

២-មណ្ឌលសុខភាពនាងកុក ស្រុកមណ្ឌលសីមា

៣-មណ្ឌលសុខភាពត្រពាំងរូង ស្រុកកោះកុង

៤-មណ្ឌលសុខភាពឬស្សីជ្រុំ ស្រុកថ្មបាំង

៥-មណ្ឌលសុខភាពអណ្តូងទឹក ស្រុកបូទុមសាគរ និងឃុំជីផាត

៦-មណ្ឌលសុខភាពភ្ញីមាស ស្រុកគិរីសាគរ

៧ -សាលាបឋមសិក្សាបឹងព្រាវ ស្រុកស្រែអំបិល។

លោកវេជ្ជបណ្ឌិត ទៅ ម៉ឹង ក៏វាយតម្លៃជាបឋមដែរថា ល្បឿននៃការស្ម័គ្រចិត្តនាំកុមារមកចាក់វ៉ាក់សាំងនៅមណ្ឌលសាខាកាកបាទក្រហមខេត្ត គឺមានចំនួនច្រើនគួរឱ្យកត់សម្គាល់យោងតាមស្មារតីទទួលខុសត្រូវចំពោះអាណាព្យាបាលម្នាក់ៗ៕

អត្តបទៈ សិរីវឌ្ឍនៈ