ព័ត៌មានជាតិ

ប្រមុខកាទូតផ្ញើសារអបអរសាទរក្នុងឱកាសខួបអនុស្សាវរីយ៍លើកទី៦៥ នៃទំនាក់ទំនងការទូតរវាងកម្ពុជា-ហុងគ្រី

បានផុស

៣ years មុន

នៅ

ថ្ងៃចន្ទ ២០ កញ្ញា ២០២១

ដោយ

លោកឧបនាយករដ្ឋមន្ដ្រី ប្រាក់ សុខុន រដ្ឋមន្ដ្រីការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា បានផ្ញើសារអបអរសាទរជូនចំពោះលោក Péter Szijjártó រដ្ឋមន្ដ្រីការបរទេស និងពាណិជ្ជកម្ម នៃប្រទេសហុងគ្រី ក្នុងឱកាសខួបអនុស្សាវរីយ៍លើកទី៦៥ នៃការបង្កើតទំនាក់ទំនងការទូតរវាងព្រះរាជាណាចក្រកម្ពុជា និងប្រទេសហុងគ្រី នេះបើយោងតាមលិខិតដែលក្រសួងការបរទេស និងសហប្រតិបត្តិការអន្តរជាតិ ទើបផ្សព្វផ្សាយនៅថ្ងៃនេះ។

លិខិតរបស់លោកឧបនាយករដ្ឋមន្ដ្រី ប្រាក់ សុខុន បានកត់សម្គាល់ថា ចំណងមិត្តភាពមិត្តភាព និងកិច្ចសហប្រតិបត្តិការជិតស្និទ្ធរវាងកម្ពុជា និងហុងគ្រីត្រូវបានពង្រឹង និងពង្រីក យ៉ាងស៊ីជម្រៅលើវិស័យជាច្រើន ក្នុងរយៈពេលប៉ុន្មានឆ្នាំចុងក្រោយនេះ។ ដំណើរទស្សនកិច្ចកម្រិតខ្ពស់របស់មេដឹកនាំ នៃប្រទេសទាំងពីរក្នុងរយៈពេលចុងក្រោយនេះ រួមទាំងដំណើរទស្សនកិច្ចផ្លូវការផ្សេងៗទៀត បានពង្រឹងទំនាក់ទំនងរវាងប្រទេសទាំងពីរបន្ថែមទៀត។

លោកឧបនាយករដ្ឋមន្ដ្រី ប្រាក់ សុខុន ប្រទេសទាំងពីរបានបន្តផ្តល់ការគាំទ្រគ្នាទៅវិញទៅមកលើវេទិកាអន្តរជាតិ ហើយអ្វីដែលសំខាន់ជាងនេះទៅទៀតនោះ គឺវឌ្ឍនភាពក្នុងការជំរុញវិស័យសេដ្ឋកិច្ចពាណិជ្ជកម្ម អប់រំ វិស័យកសិកម្ម និងការទូត ដើម្បីផលប្រយោជន៍រួម នៃប្រទេស និងប្រជាជន។

ប្រមុខការទូតកម្ពុជាលើកឡើងទៀតថា រាជរដ្ឋាភិបាល និងប្រជាជនកម្ពុជា បានវាយតម្លៃខ្ពស់ចំពោះជំនួយមិនអាចកាត់ថ្លៃបាន ដែលផ្តល់ដោយរដ្ឋាភិបាលហុងគ្រីភ្លាមៗ បន្ទាប់ពីការរំដោះប្រទេសយើងចេញពីរបបប្រល័យពូជសាសន៍ និងការចូលរួមរបស់ហុងគ្រី ក្នុងប្រតិបត្តិការរក្សាសន្តិភាព អ៊ុនតាក់៕

ដោយ ៖ កោះកែវ