អាជ្ញាធរក្រុងប៉ោយប៉ែតញាប់ដៃជើងដោះស្រាយបញ្ចៀសទឹក និងជម្លៀសពលរដ្ឋ

លោក គាត ហ៊ុល អភិបាលក្រុងប៉ោយប៉ែត បានដឹកនាំក្រុមការងារចុះពិនិត្យស្ថានភាពទឹកក្នុងក្រុងប៉ោយប៉ែត ដើម្បីពិនិត្យលទ្ធភាពដោះស្រាយបញ្ជៀសទឹកចេញ និងជម្លៀសពលរដ្ឋដែលទឹកជន់លិចលំនៅដ្ឋានមកកាន់ទីទួលសុវត្ថិភាព។

ការចុះពិនិត្យនេះដោយសារប៉ុន្មានថ្ងៃចុងក្រោយនេះមានភ្លៀងធ្លាក់ជារៀងរាល់ថ្ងៃ ធ្វើឱ្យជំនន់ទឹកភ្លៀងវាយលុកក្រុងប៉ោយប៉ែតបង្កឱ្យជន់លិចហេដ្ឋារចនាសម្ព័ន្ធមួយចំនួនក្នុងក្រុងប៉ោយប៉ែត ជាពិសេសប្រជាពលរដ្ឋដែលរស់នៅតាមអូរព្រំដែនកម្ពុជាថៃ កំពុងត្រូវបានអាជ្ញាធរដោយមានកងកម្លាំងទាហាន ប៉ូលិស ប៉េអឹម បានចូលរួមជម្លៀសមកពីទួលសុវត្ថិភាពជាបណ្ដើរៗហើយ។

លោក គាត ហ៊ុល អភិបាលក្រុងប៉ោយប៉ែតបានឱ្យដឹងនៅថ្ងៃទី២០ ខែកញ្ញានេះថា ជាបឋមមកដល់ពេលនេះមានប្រជាពលរដ្ឋ ៤០ គ្រួសារត្រូវបាជម្លៀសមរកទីទទួលសុវត្ថភាព។ ពលរដ្ឋដែលត្រូវជម្លៀសគឺមានពីសង្កាត់ប៉ោយប៉ែត ២២ គ្រួសារ សង្កាត់ផ្សារកណ្តាល ១៨ គ្រួសារ ចំណុចដែលជម្លៀសគឺ ភូមិក្បាលស្ពានមួយ និងភូមិក្បាលកោះ មកដាក់នៅសាលារៀនកូរ៉េដែលមានទីទួលខ្ពស់ជាងគេ និងជិតផ្ទះពួកគាត់។ ចំណែកផ្សារកណ្តាលចំនួន ១៨ គ្រួសារជម្លៀសពីចំនុច ៤២ ជាប់អូរព្រំដែនមកដាក់នៅ បូរីKN នៅជិតផ្ទះពួកគាត់ដែរ ដោយទីទួលសុវត្ថភាពនេះ ខាងបូរីបានឱ្យពួកគាត់នៅលើផ្លូវបេតុង ហើយមានភ្លើង និងបន្ទប់ទឹកប្រើប្រាស់គ្រប់គ្រាន់។

ជាមួយនឹងការជន់លិចនេះ ជំនន់ទឹកភ្លៀងបានបន្តហូរកាត់ផ្លូវជាតិលេខ ៥៨ ឆ្លងកាត់រង្វងមូលនៃផ្លូវជាតិលេខ ៥ ចំនុចមុខច្រកអន្តរជាតិស្ទឹងបត់ទៅត្បូង។ ជាការដោះស្រាយបន្ទាន់ លោកអភិបាលបានប្រើគ្រឿងចក្រអេស្កាចំនួន ៣ គ្រឿងដើម្បីរំដោះទឹកចេញ។ ម្យ៉ាងទៀតបើភ្លៀងឈប់ ទឹកនឹងស្រកទៅវិញ។

អត្ថបទ៖ ពៅ