ព័ត៌មានជាតិ
សាលារៀនចំនួន៦ នៅកម្ពុជាទទួលបានពានរង្វាន់ជាតិ “សាលាមេត្រីបរិស្ថាន”
រាជធានីភ្នំពេញ ថ្ងៃទី២១ ខែកញ្ញា ឆ្នាំ២០២១ – សាលារៀនចំនួន៦ ក្នុងចំណោមសាលារៀនចំនួន៤៨ នៅកម្ពុជាបានទទួលពានរង្វាន់ «សាលាមេត្រីបរិស្ថានជាតិ» ពីក្រសួងអប់រំ យុវជន និងកីឡា និង ក្រសួងបរិស្ថាន ក្រោមកិច្ចសហការរបស់ក្រុមហ៊ុន Smart Axiata ជាមួយនិងការទទួលស្គាល់អំពីការលើកកម្ពស់និរន្តរភាពបរិស្ថានរបស់សាលារៀនក្នុងប្រតិបត្តិការ និងការបង្រៀនរបស់ពួកគេ។
សាលាបឋមសិក្សាចំនួន ៣ ដែលត្រូវបានជ្រើសរើសសម្រាប់ពានរង្វាន់គឺ៖
១. សាលាបឋមសិក្សា វត្តចែង ខេត្តបាត់ដំបង (ជ័យលាភីមាស)
២. សាលាបឋមសិក្សា ក្រវ៉ាន់ ខេត្តសៀមរាប (ជ័យលាភីប្រាក់)
៣. សាលាបឋមសិក្សា ឈើខ្លឹម ខេត្តត្បូងឃ្មុំ (ជ័យលាភីសំរិទ្ធ)
វិទ្យាល័យចំនួន ៣ ដែលត្រូវបានជ្រើសរើសសម្រាប់ពានរង្វាន់គឺ៖
១. វិទ្យាល័យ ហ៊ុន សែន មិត្តភាព ខេត្តព្រះសីហនុ (ជ័យលាភីមាស)
២. វិទ្យាល័យ ហ៊ុន សែន សម្ភៈបុរៈ ខេត្តក្រចេះ (ជ័យលាភីប្រាក់)
៣. វិទ្យាល័យ ចំណេះទូទៅ និងបច្ចេកទេស ព្រះបាទសម្តេចព្រះបរមនាថ នរោត្តម សីហមុនី ខេត្តកំពង់ឆ្នាំង (ជ័យលាភីសំរិទ្ធ)។
ដោយហេតុថា សាលារៀនមួយចំនួនត្រូវបានបើកឡើងវិញ ជាមួយនិងវិធានការដ៏ខ្ជាប់ខ្ជួន ក្នុងការប្រយុទ្ធប្រឆាំងជំងឺរាតត្បាតជាសកលកូវីដ១៩ ពានរង្វាន់សាលាមេត្រីបរិស្ថាន គឺជាការក្រើនរំលឹកដ៏ទាន់ពេលវេលាមួយ អំពីការអប់រំដល់យុវជនកម្ពុជាអំពីសារៈសំខាន់នៃការការពារបរិស្ថាន ដែលសំខាន់ជាងពេលណាៗទាំងអស់។
សាលារៀនជ័យលាភីទាំងអស់ត្រូវបានជ្រើសរើសដោយក្រុមអ្នកជំនាញមកពីក្រសួងអប់រំ យុវជន និងកីឡា និង ក្រសួងបរិស្ថាន ដោយផ្អែកលើលក្ខណៈវិនិច្ឆ័យសំខាន់ៗចំនួន ៤ ចំនុច៖ តើសាលារក្សាប្រតិបត្តិការបៃតងដោយរបៀបណា តើការសិក្សាអំពីបរិស្ថានត្រូវបានដាក់បញ្ចូលទៅក្នុងកម្មវិធីសិក្សា និងសកម្មភាពក្រៅកម្មវិធីសិក្សាក្នុងសាលាដោយរបៀបណា តើការអនុវត្តកម្មវិធីនិរន្តរភាពរបស់សាលាមានប្រសិទ្ធភាពយ៉ាងដូចម្តេច តើសាលាបានបញ្ចូលកម្មវិធីអប់រំបរិស្ថានរបស់ពួកគេទៅក្នុងសហគមន៍មូលដ្ឋានតាមរយៈភាពជាដៃគូ និងកិច្ចខិតខំប្រឹងប្រែងដោយរបៀបណា។
ឯកឧត្តម ជួប ប៉ារីស៍ អគ្គនាយក នៃអគ្គនាយកដ្ឋានចំណេះដឹង និងព័ត៌មានបរិស្ថាន នៃក្រសួងបរិស្ថានបានមានប្រសាសន៍ថា “ការប្រឡងប្រណាំងកម្មវិធីពានរង្វាន់សាលាមេត្រីបរិស្ថាន មានគោលបំណងលើកទឹកចិត្តសិស្សានុសិស្សឱ្យខិតខំរៀនសូត្រដើម្បីកសាងអនាគតដ៏រុងរឿង និងបណ្ដុះគំនិតឱ្យស្រឡាញ់បរិស្ថានដើម្បីចូលរួមចំណែកដល់ការអភិវឌ្ឍប្រកបដោយចីរភាពនៅក្នុងប្រទេសកម្ពុជា”។
សាលាជ័យលាភីចំនួន៦ ទទួលបានរង្វាន់សាច់ប្រាក់ចំនួន ៥ លានរៀល ៤ លានរៀល និង ៣ លានរៀល សម្រាប់ជ័យលាភីមាស ប្រាក់ និង សំរិទ្ធ រៀងៗខ្លួន ដែលនឹងត្រូវប្រើដើម្បីពង្រីកកិច្ចខឹតខំប្រឹងប្រែងនៃកម្មវិធីនិរន្តភាព និងការអនុវត្តកម្មបរិស្ថានល្អបំផុត។
លោក ថូម៉ាស ហ៊ុន (Thomas Hundt) នាយកប្រតិបត្តិក្រុមហ៊ុន Smart Axiata មានប្រសាសន៍ថា “ការអប់រំ និងបរិស្ថានគឺជាវិស័យអាទិភាពពីរដ៏សំខាន់សម្រាប់ពួកយើងនៅក្រុមហ៊ុន Smart ហើយយើងមានមោទនភាពដែលបានគាំទ្រកម្មវិធីពានរង្វាន់នេះ ដោយបានដាក់បញ្ចូលវិស័យទាំងពីរនេះជាវិស័យអាទិភាពដែលនាំមកនូវផលវិជ្ជមានជាច្រើនប្រកបដោយអត្ថន័យ។ តាមរយៈការទទួលស្គាល់សាលាទាំងនេះសម្រាប់ការអនុវត្តប្រកបដោយភាពច្នៃប្រឌិត និងនិរន្តរភាព យើងសង្ឃឹមថា ពួកយេីងនឹងក្លាយជាផ្នែកមួយនៃការផ្លាស់ប្តូរក្នុងជំនាន់មួយ ដែលយុវជនកម្ពុជាស្ថិតនៅជួរមុខនៃការប្រយុទ្ធ ដើម្បីអភិរក្សបេតិកភ័ណ្ឌធម្មជាតិដ៏កម្ររបស់ព្រះរាជាណាចក្រ និងធ្វើឱ្យមានផលវិជ្ជមានពិតប្រាកដ ក្នុងការកាត់បន្ថយផលប៉ះពាល់នៃការប្រែប្រួលអាកាសធាតុ”។
ពានរង្វាន់សាលាមេត្រីបរិស្ថានជាតិ ត្រូវបានធ្វើឡើងតាំងពីឆ្នាំ២០១៧ បន្ទាប់ពីប្រទេសកម្ពុជាបានអនុម័តសេចក្តីណែនាំថ្នាក់ជាតិ ស្តីអំពីពានរង្វាន់សាលាមេត្រីបរិស្ថាន ដោយអនុលោមតាមគោលការណ៍ណែនាំ និងពានរង្វាន់សាលាមេត្រីបរិស្ថានអាស៊ាន ដែលជាឯកសារយោង និងស្តង់ដារតំបន់សម្រាប់សាលារៀនដែលមិនប៉ះពាល់ដល់បរិស្ថានក្នុងតំបន់។
សម្រាប់ព័ត៌មានបន្ថែមអំពីកម្មវិធីទំនួលខុសត្រូវសង្គមនិងកម្មវិធីនិរន្ដរភាពរបស់ក្រុមហ៊ុន Smart សូមតាមដានលើទំព័រហ្វេសប៊ុក Smart For Cambodia www.facebook.com/smartforcambodia។
សូមបញ្ជាក់ថា ក្រុមហ៊ុន Smart Axiata Co., Ltd. ជាប្រតិបត្ដិករទូរគមនាគមន៍ចល័តឈានមុនគេក្នុងព្រះរាជាណាចក្រកម្ពុជា។ បច្ចុប្បន្នក្រុមហ៊ុនបាននិងកំពុងបម្រើអតិថិជនចំនួន ៧.៥ លាននាក់ ស្ថិតក្រោមស្លាកសញ្ញា “Smart”។ Smart Axiata គឺជាក្រុមហ៊ុនបុត្រសម្ព័ន្ធរបស់ក្រុមហ៊ុនមេ មានឈ្មោះថា “Axiata Group Berhad” ដែលជាក្រុមហ៊ុនផ្ដល់សេវាទូរគមនាគមន៍ធំជាងគេបង្អស់មួយក្នុងទ្វីបអាស៊ី៕
-
ព័ត៌មានជាតិ៥ ថ្ងៃ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ៣ ថ្ងៃ ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
ព័ត៌មានជាតិ៣ ថ្ងៃ ago
បណ្ឌិត គិន ភា៖ «ហេតុអីមិនបន្ទោសអ្នកបោកគេ បែរជាបន្ទោសអ្នកត្រូវគេបោកទៅវិញ?»
-
ព័ត៌មានអន្ដរជាតិ១ សប្តាហ៍ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ៣ ថ្ងៃ ago
កម្ពុជានឹងមានភ្លៀងធ្លាក់ ១៥% ដល់ថ្ងៃទី ២៧ ដំណាច់ខែមីនា
-
ជីវិតកម្សាន្ដ១ សប្តាហ៍ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»
-
សេដ្ឋកិច្ច៤ ថ្ងៃ ago
មន្ត្រីជាន់ខ្ពស់ធនាគារជាតិ៖ ក្រដាសប្រាក់ ៥ម៉ឺន រៀល មានគូសឆ្នូតកណ្តាលអាចប្តូរយកប្រាក់ថ្មីបានដោយឥតគិតថ្លៃ
-
ព័ត៌មានជាតិ៣ ថ្ងៃ ago
ដីជាង ៤៣ ហិកតា នៅភូមិសាស្ត្រភ្នំ ១៥០០ ត្រៀមដាំស្ដារព្រៃឈើឡើងវិញ