ព័ត៌មានជាតិ

ចាប់ពីដើមខែរហូតដល់ថ្ងៃទី២៧ ខែកញ្ញា មានពលករថៃលួចឆ្លងដែនមកធ្វើការនៅកាស៊ីណូអនឡាញ ៣៧៩នាក់

បានផុស

២ years មុន

នៅ

ថ្ងៃអង្គារ ២៨ កញ្ញា ២០២១

ដោយ

ពលករថៃ ដែលល្មើសច្បាប់ខាងលើនេះ ត្រូវបានសមត្ថកិច្ចថៃ ចាត់វិធានការផាកពិន័យរដ្ឋបាលលើជនជាតិខ្លួន ដែលល្មើសលួចឆ្លងដែនចេញចូល ដោយខុសច្បាប់មកកម្ពុជាយ៉ាងចាស់ដៃមុន និងអនុវត្តចត្តាឡីស័ក១៤ថ្ងៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមប្រភពព័ត៌មានពីខេត្តស្រះកែវ ប្រទេសថៃ បានឲ្យដឹងថា រយៈពេលចុងក្រោយនេះយោធានិងតម្រួតថៃ បានចាត់វិធានការរឹតបណ្តឹងលើប្រជាពលរដ្ឋរបស់ខ្លួន ដែលបានលួចឆ្លងដែនមកធ្វើការនៅក្នុងប្រទេសកម្ពុជា ដោយគ្មានច្បាប់អនុញ្ញាតទោះចេញឬចូលក៏ដោយចុះ។ ប្រភពខាងលើបន្តថា ពាក់ព័ន្ធនិងវិធានការរឹតបណ្តឹងនេះ ស្របពេលកាលពីថ្ងៃទី២៧ ខែកញ្ញា ឆ្នាំ២០២១ កន្លងមកនេះ កម្លាំងសមត្ថកិច្ចកម្ពុជា បានឃាត់ខ្លួនជនជាតិថៃជាច្រើនបន្តបន្ទាប់ ដែលពួកគេបានឆ្លងដែនចូលក្នុងទឹកដីកម្ពុជា ហើយបានប្រគល់ទៅឲ្យសមត្ថកិច្ចថៃវិញ គ្រាដែលពួកគេឆ្លងដែនចូលមកទឹកដីកម្ពុជា តាមច្រករបៀងនានា ដើម្បីស្វែងរកធ្វើការនៅក្នុងកាស៊ីណូអនឡាញ ក្នុងក្រុងប៉ោយប៉ែត ឬនៅក្នុងក្រុងភ្នំពេញ។

ប្រភពដដែលបានបញ្ជាក់ដែរថា ថ្មីៗនេះក្រោយពីភាគីកម្ពុជាបាននាំខ្លួនពលរដ្ឋថៃជាច្រើននាក់ទៅប្រគល់ឲ្យតម្រួតថៃ ដែលឈរជើងនៅចំណុចច្រកអន្តរជាតិខ្លងលឹក ស្រុកអារញ្ញប្រាថេត ខេត្តស្រះកែវ សមត្ថកិច្ចថៃ បានចាត់វិធានការសុខាភិបាល ដោយពិន័យជាទឹកប្រាក់ក្នុង១នាក់ចំនួន៨០០បាត មុនបញ្ជូនទៅកាន់មណ្ឌលធ្វើចត្តាឡីស័ក១៤ថ្ងៃ។

អាជ្ញាធរនិងសមត្ថកិច្ចថៃ នៅក្នុងខេត្តស្រះកែវ ក៏បានបង្ហាញនូវចំនួនជនជាតិរបស់ខ្លួន ដែលល្មើសលួចឆ្លងដែនមកខាងទឹកដីប្រទេសកម្ពុជា ដើម្បីរកការងារធ្វើដោយគ្មានច្បាប់អនុញ្ញាតចាប់តាំងពីដើមខែកញ្ញា មកទល់នឹងថ្ងៃទី២៧កញ្ញានេះ ពលករថៃដែលឆ្លងដែនចូលក្នុងប្រទេសកម្ពុជាសរុបចំនួន៣៧៩នាក់ ជាចំនួនដែលសមត្ថកិច្ចថៃ ចាប់បាននិងខាងភាគីកម្ពុជាចាប់បានហើយប្រគល់ឱ្យសមត្ថកិច្ចថៃ ហើយសមត្ថកិច្ចថៃនិយាយថា សម្រាប់ករណីលួចឆ្លងដែនតាមរយៈមេខ្យល់ អាចនឹងមានច្រើនជាងចំនួនខាងលើ៕

អត្ថបទ៖ សៅ សារិទ្ធ

Related Topics:កម្ពុជា-ថៃ