ព័ត៌មានជាតិ

តំបន់បិទខ្ទប់ទូទាំងខេត្តសៀមរាប ត្រូវបានបើកឡើងវិញ រមណីយដ្ឋានអង្គរអាចទស្សនបាននៅអំឡុងបុណ្យភ្ជុំបិណ្ឌ

បានផុស

២ years មុន

នៅ

ថ្ងៃព្រហស្បតិ៍ ៣០ កញ្ញា ២០២១

ដោយ

នៅក្នុងឱកាសឈប់សំរាកថ្ងៃបុណ្យភ្ជុំបិណ្ឌខាងមុខនេះ ភ្ញៀវទេសចរជាតិ និងអន្តរជាតិ អាចធ្វើដំណើរទៅកំសាន្តនៅតាមតំបន់ទាំងអស់ នៃរមណីយដ្ឋានប្រាសាទអង្គរបានធម្មតាឡើងវិញ ពីព្រោះអាជ្ញាធរខេត្ត នឹងបើកឡើងវិញនូវតំបន់ដែលបានបិទខ្ទប់ទាំងអស់ទូទាំងខេត្ត នេះបើតាមការបញ្ជាក់ពីមន្ត្រីជាន់ខ្ពស់ខេត្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សុខ កុល នាយករដ្ឋបាល និងជាអ្នកនាំពាក្យរដ្ឋបាលខេត្តសៀមរាបបានប្រាប់កម្ពុជាថ្មីនារសៀលថ្ងៃទី៣០ ខែកញ្ញា នេះថា អាជ្ញាធរខេត្តនឹង នឹងចេញសេចក្តីសម្រេចបើកតំបន់ក្រហម ក៏ដូចជាតំបន់លឿងទុំ នៅក្នុងភូមិសាស្ត្រខេត្តសៀមរាបទាំងមូលឡើងវិញ។ លោកថា ការសម្រេចបែបនេះ ដោយយោងតាមអនុសាសន៍របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ហើយកិច្ចការនេះ រដ្ឋបាលខេត្ត និងខិតខំអនុវត្តវិធានការផ្សេងៗដូចជា ៣កុំ ៣ការពារ ជាដើម ដើម្បីទប់ស្កាត់ការរីករាល នៃជំងឺកូវីដ១៩ ។

លោក សុខ កុល អះអាងថា ការធ្វើបែបនេះ ដើម្បីឲ្យប្រជាពលរដ្ឋចេះរស់នៅក្នុងគន្លងថ្មី ក្នុងបរិបទកូវីដ ហើយប្រសិនបើយើងបន្តបិទតទៅទៀត ក៏ធ្វើឲ្យប៉ះពាល់សេដ្ឋកិច្ចរបស់ប្រជាពលរដ្ឋផងដែរ។

ចំណែកលោក ឡុង កុសល អ្នកនាំពាក្យអាជ្ញាធរអប្សរាបានបញ្ជាក់ថា ទីតាំងដែលបានលុកដោននោះ មានដូចជាអង្គរវត្ត ប្រាសាទបាយ័ន ប្រាសាទតាព្រហ្ម និងតំបន់ប្រាសាទមួយចំនួន ដែលស្ថិតនៅក្នុងក្រុងសៀមរាប។ លោកឲ្យដឹងដែរថា តំបន់ប្រាសាទ ដែលមិនមានការបិទខ្ទប់រួមមាន តំបន់ប្រាសាទ ដែលស្ថិតនៅតំបន់រលួស ម្ដុំប្រាសាទបន្ទាយសំរែ និងប្រាសាទបន្ទាយស្រី ជាដើម។

សូមបញ្ជាក់ថា កាលពីថ្មីៗនេះ តំបន់មួយចំនួន នៃរមណីយដ្ឋានប្រាសាទអង្គរ ត្រូវបានបិទខ្ទប់តាមវិធានការរបស់រដ្ឋបាលខេត្ត ដើម្បីទប់ស្កាត់ការរីករាលដាល នៃជំងឺកូវីដ១៩ ហើយអាជ្ញាធរអប្សរា បានសហការជាមួយអាជ្ញាធរខេត្ត ទប់ស្កាត់មិនឲ្យមានការចេញចូលទៅក្នុងតំបន់ដែលមានការបិទខ្ទប់នោះទេផងដែរ។

តំបន់ដែលបានបិទខ្ទប់នោះ មាននៅក្នុងភូមិសាស្ត្រក្រុងសៀមរាប ដែលរួមមាន៖

ទី១- សង្កាត់ស្លក្រាម (គ្រប់ភូមិទាំងអស់)

ទី២- សង្កាត់ស្វាយដង្គំ (ភូមិតាភុល ភូមិមណ្ឌល១ ភូមិស្វាយដង្គំ ភូមិស្ទឹងថ្មី និងភូមិគ្រួស)

ទី៣- សង្កាត់គោកចក (ភូមិត្រពាំងសេះ ភូមិនគរក្រៅ ភូមិទក្សិណខាងត្បូង និងភូមិវាល)

ទី៤- សង្កាត់ជ្រាវ (ភូមិខ្នារ)

ទី៥- សង្កាត់សាលាកំរើក (ភូមិតាវៀន)

ទី៦- សង្កាត់ស្រង៉ែ (ភូមិព្រៃធំ និងភូមិស្រង៉ែ)

ទី៧- សង្កាត់ទឹកវិល (ភូមិសណ្តាន់)

ចំពោះវិធានការក្នុងការទប់ស្កាត់ការរីករាលដាលនៃជំងឺកូវីដ១៩ សម្រាប់ពិធីបុណ្យភ្ជំបិណ្ឌខាងមុខនេះ លោក ឡុង កុសល បានបញ្ជាក់ថា “៣កុំ ៣ការពារ” នេះ គឺជាវិធានការចាំបាច់ដែលគ្រប់គ្នាត្រូវអនុវត្ត ស្របតាមការណែនាំរបស់ក្រសួងសុខាភិបាល ដូច្នេះអ្នកចូលទៅទស្សនានៅរមណីយដ្ឋានអង្គរចាំបាច់ណាស់វិធានការនេះ។ ដោយឡែកមន្ត្រី បុគ្គលិក របស់អាជ្ញាធរអប្សរា ដែលមានការពាក់ព័ន្ធ នៅក្នុងតំបន់រមណីយដ្ឋានអង្គរ ពួកគាត់ក៏ត្រូវតែបំពេញដូចគ្នាដែរ។

លោកថា “យើងត្រូវចូលរួមអនុវត្តទាំងអស់គ្នា ហើយនេះ គឺជាអ្វីដែលយើងត្រូវបំពេញទាំងអស់គ្នា បើអនុវត្តបាន ការធ្វើដំណើរកម្សាន្តរបស់ពួកគាត់ ក៏នឹងមានសុវត្ថិភាពទាំងអស់គ្នាផងដែរ ប៉ុន្តែបើពួកគាត់អនុវត្តមិនបាន គឺនឹងជួបនូវបញ្ហាប្រឈមជាក់ជាមិនខាន”។ ជាមួយគ្នានោះ លោកបានអំពាវនាវឲ្យពួកគាត់នៅពេលធ្វើដំណើរមកកំសាន្តនៅរមណីយដ្ឋានអង្គរ តាមផ្នែកខ្លះ ដែលមិនមានការបិទខ្ទប់នោះ គឺសូមអនុវត្តឲ្យបានជាដាច់ខាតនូវ ៣កុំ ៣ការពារ។

គួររំលឹកថា នៅថ្ងៃទី០៥ ទី០៦ និងទី០៧ ខែតុលា ខាងមុខនេះ គឺជាឱកាសឈប់សម្រាកសម្រាប់ពិធីបុណ្យភ្ជំបិណ្ឌរបស់មន្ត្រីរាជការ កម្មករ កម្មការិនី និយោជិត នៅតាមរោងចក្រ សហគ្រាសទាំងអស់ ហើយដោយសារាជរដ្ឋាភិបាលបានផ្អាកមិនឲ្យមានការជួបជុំនៅក្នុងឱកាសបុណ្យភ្ជុំបិណ្ឌនៅតាមវត្តអារាមនោះ ប្រជាពលរដ្ឋអាចនឹងធ្វើដំណើរកម្សាន្តនៅតាមតំបន់រមនីយដ្ឋាននានាទូទាំងប្រទេស ដែលក្នុងនោះ នៅរមណីយដ្ឋានប្រាសាទអង្គរ ក៏នឹងមានប្រជាពលរដ្ឋ ក៏ដូចជាភ្ញៀវជាតិ អន្តរជាតិនានាទៅទស្សនាកំសាន្តច្រើនផងដែរ៕

ដោយ ៖ កោះកែវ