ទឹកជំនន់ នៅក្បាលស្ទឹងសង្កែ កំពុងជន់ជោរលិចផលដំណាំ

យោងតាមប្រភពពីអាជ្ញាធរ ដែលរស់នៅប៉ែកខាងលើ បានបញ្ជាក់ថា ប្រជាពលរដ្ឋដែលរស់នៅក្នុងក្រុងបាត់ដំបង ក៏ដូចជាតាមបណ្តាស្រុកមួយចំនួនដែលស្ថិតនៅជាប់ដងស្ទឹងសង្កែ គួរត្រៀមលក្ខណៈប្រុងប្រយ័ត្នឱ្យបានខ្ពស់ ដោយសារតែនៅព្រឹកថ្ងៃទី១១ ខែតុលា នេះ ប្រភពទឹកដែលនៅប៉ែកខាងលើស្ទឹងកំពុងហក់ឡើងខ្លាំងគួរឱ្យព្រួយបារម្ភ។

ប្រភពដដែលបានបន្តថា នៅព្រឹកនេះ ចម្ការដំណាំរបស់ប្រជាពលរដ្ឋមួយចំនួន ដូចជាដើមម្រេច ដើមសាវម៉ាវ និងដើមធុរេន ។ល។ ដែលស្ថិតក្នុងភូមិអូរតាទៀក ឃុំតាតោក ស្រុកសំឡូត មានការលិចលង់ជាបណ្តើរៗហើយ ដោយសារទឹកជំនន់ដែលគេសង្ស័យថា អាចជន់មកពីប្រទេសថៃ។

ដោយឡែកនៅក្នុងក្រុងបាត់ដំបងនាព្រឹកនេះដែរ គេសង្គេតឃើញថា សន្ទុះទឹកស្ទឹងសង្កែមានការប្រែប្រួល ដោយចាប់ផ្តើមជន់ហើយ ដូច្នេះវាអាចនឹងហក់ឡើងខ្លាំងជាងនេះប្រសិនបើទឹកនៅឯក្បាលស្ទឹងមានការកើនឡើងបែបនេះ។ ប៉ុន្តែបើទោះជាយ៉ាងនេះក្តី ក៏គេនៅមិនទាន់បានទទួលសេចក្តីប្រកាសអំពីមន្ទីរជំនាញនៅឡើយទេ៕

អត្ថបទ៖ សោ និយមរ័ត្ន