ព័ត៌មានជាតិ

ឃាត់ខ្លួនជនសង្ស័យម្នាក់ ខណៈកំពុងជិះម៉ូតូរកកន្លែងលក់

បានផុស

២ years មុន

នៅ

ថ្ងៃព្រហស្បតិ៍ ១៤ តុលា ២០២១

ដោយ

ជនសង្ស័យម្នាក់ត្រូវបានកម្លាំងសមត្ថកិច្ចនគរបាលប៉ុស្ដិ៍រដ្ឋបាលស្ទឹងមានជ័យទី១ ធ្វើការឃាត់ខ្លួនបញ្ជូនឲ្យកម្លាំងនគរបាលប៉ុស្ដិ៍ស្រះចក នៃអធិការនគរបាលខណ្ឌដូនពេញ ខណៈដែលកំពុងជិះម៉ូតូរកកន្លែងលក់ បន្ទាប់ពីលួចបានពីមូលដ្ឋានសង្កាត់ស្រះចក កាលពីថ្ងៃទី១២ ខែតុលា ឆ្នាំ២០២១។

មន្ត្រីប៉ុស្តិ៍នគរបាលរដ្ឋបាលស្រះចកនៃអធិការដ្ឋាននគរបាលខណ្ឌដូនពេញបានឲ្យដឹងថា ជនសង្ស័យត្រូវបានកម្លាំងនគរបាលប៉ុស្តិ៍ស្ទឹងមានជ័យ១ឃាត់ខ្លួនបញ្ជូនមកមូលដ្ឋានកើតហេតុកាលពីថ្ងៃទី១៣ខែតុលា ឆ្នាំ២០២១ក្រោយពីធ្វើសកម្មភាពលួចនៅចំណុចតារាងបាល់ម្តុំបឹងកក់ក្នុងសង្កាត់ស្រះចកខណ្ឌដូនពេញ កាលពីថ្ងៃ១២ខែតុលាឆ្នាំ២០២១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចបានឲ្យដឹងថា ជនសង្ស័យឈ្មោះ ពេជ្រ សីហា ភេទប្រុស អាយុ៣៤ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅផ្ទះជួល សង្កាត់អូរឡាំពិច ខណ្ឌបឹងកេងកង រាជធានីភ្នំពេញ។

សមត្ថកិច្ចបានដកហូតម៉ូតូមួយគ្រឿងម៉ាក Keeway ពណ៌ស គ្មានស្លាកលេខ និងដែកកែច្នៃសំប៉ែតចុងស្រួចមួយ និងសោលេខ៨ រាងអក្សរ L (អិល)មួយ សម្រាប់កាច់បំបែក ក ម៉ូតូ)។ ចំណែកជនរងគ្រោះពុំទាន់រកឃើញ និងមកដាក់ពាក្យបណ្តឹងនៅឡើយ។

កាលពីថ្ងៃទី១២ ខែតុលា ឆ្នាំ២០២១ វេលាម៉ោង១៨និង១៥នាទី ជនសង្ស័យឈ្មោះ ពេជ្រ សីហា បានដើរចូលក្នុងបឹងកក់មកដល់ចំណុចក្រោយតារាងបាល់ទាត់ ផ្លូវលេខ១៥៩ ភូមិ១ សង្កាត់ស្រះចក ឃើញម៉ូតូម៉ាក Keeway ពណ៌ស គ្មានស្លាកលេខ ចតទុកចោលលើចិញ្ចើមផ្លូវបានធ្វើសកម្មភាពលួចអូសម៉ូតូនោះទៅដល់ម្តុំស្តុបដីអ៊ិនយកសោលេខ៨ និងដែកកែច្នៃសំប៉ែតចុងស្រួចកាច់បំបែកកុងតាក់ រួចធាក់បញ្ឆេះជិះទៅរកកន្លែងលក់រហូតដល់ចំណុចរបងវត្តស្ទឹងមានជ័យ ផ្លូវបេតុង ភូមិមានជ័យ សង្កាត់ស្ទឹងមានជ័យទី១ ត្រូវបានកម្លាំងល្បាតនគរបាលប៉ុស្តិ៍ស្ទឹងមានជ័យទី១ មានការសង្ស័យហៅធ្វើការត្រួតពិនិត្យរកឃើញដែកកែច្នៃសំប៉ែតចុងស្រួច និងសោរលេខ៨ រាងអក្សរ L (អិល) យកទៅសាកសួរ លុះនៅថ្ងៃទី១៣ ខែតុលា ឆ្នាំ២០២១ ម៉ោង១៣ និង០០នាទី កម្លាំងប៉ុស្តិ៍នគរបាលរដ្ឋបាលស្ទឹងមានជ័យទី១ បានយកជនសង្ស័យ រួមនឹងវត្ថុតាងមកប្រគល់ឲ្យប៉ុស្តិ៍នគរបាលរដ្ឋបាលស្រះចកធ្វើការសាកសួរបន្ត។