ទីធ្លាសម្រាប់ហាត់ប្រាណ នៅចន្លោះគល់ស្ពានច្បារអំពៅ សាងសង់រួចរាល់ហើយ

ទីធ្លាសម្រាប់ហាត់ប្រាណមួយកន្លែង ត្រូវបានអាជ្ញាធរខណ្ឌច្បារអំពៅសាងសង់រួចរាល់ហើយ។ ដូច្នេះប្រជាពលរដ្ឋ​ដែល​រស់នៅប៉ែកខាងលិច ស្ពានព្រះមុនីវង្សចាស់ដ-ថ្មី អាចទៅហាត់ប្រាណ ចាប់ពីថ្ងៃទី២០ ខែតុលានេះ តទៅ។

យោងតាមប្រភពពីលោក យ៉ិន វុធ ចៅសង្កាត់ច្បារអំពៅទី២ បានឲ្យកម្ពុជាថ្នីដឹងថា ទីធ្លាសម្រាប់ហាត់ប្រាណ ដែលស្ថិតនៅចំចន្លោះ គល់ស្ពានព្រះមុនីវង្សចាស់-ថ្មី ក្នុងខណ្ឌច្បារអំពៅ រាជធានីភ្នំពេញ បានសាងសង់រួចរាល់ និងមានភាពធំទូលាយ ហើយថែមទាំងមានបន្ទប់អនាម័យ ដ៏ទំនើបទៀតផង។

លោក យ៉ិន វុធ បានបញ្ជាក់ទៀតថា ទីធ្លាសម្រាប់ហាត់ប្រាណនេះ​គឺចាប់ផ្តើមសាងសង់ឡើង​​ ក្នុងពេលដែលលោក ចេង មុនីរ៉ា មកកាន់តំណែងជាអភិបាល នៃគណៈអភិបាលខណ្ឌច្បារអំពៅ។ ព្រោះលោកអភិបាលខណ្ឌ បានឃើញ ប្រជាពលរដ្ឋរស់នៅច្បារអំពៅ តែងតែនាំគ្នាយកផ្លូវសាធារណៈជាកន្លែង សម្រាប់ហាត់ប្រាណបង្កឲ្យប៉ះពាល់ដល់ការធ្វើដំណើរ ហើយងាយនិងគ្រោះថ្នាក់ ខណៈដែលយានយន្តខ្លះមិនដឹងថា មានមនុស្សមកហាត់ប្រាណ​ លើផ្លូវសាធារណៈនោះ។

ក្នុងនោះ លោកចៅសង្កាត់ច្បារអំពៅទី១ និងទី២ តំណាងឲ្យប្រជាពលរដ្ឋ ដែលនិយមហាត់ប្រាណ លើផ្លូវសាធារណៈ សូមថ្លែងអំណរគុណដល់លោក ចេង មុនីរ៉ា អភិបាល នៃគណៈអភិបាលខណ្ឌច្បារអំពៅ ដែលបានផ្តួចផ្តើមសាងសង់ទីធ្លាសម្រាប់ហាត់ប្រាណ ដល់អ្នករស់នៅច្បារអំពៅ ដែលពីមុនមកមិនធ្លាប់មាន នោះទេ៕​

អត្ថបទ៖ នរា