ព័ត៌មានជាតិ
ថ្នាក់ដឹកនាំសាលាភូមិន្ទរដ្ឋបាល ជ្រើសរើសយកវត្តអង្គរខាងជើង ជាចំណុចចាប់ផ្តើម នៃគម្រោងសាកល្បងការរៀបចំសួនទេសភាព វប្បធម៌ វត្តអារាម
សៀមរាប ៖ ថ្លែងក្នុងពិធីដាំកូនឈើនៅវត្តឥន្ទបត្តបុរីហៅវត្តអង្គរខាងជើង ស្ថិតក្នុងសង្កាត់នគរធំក្រុងសៀមរាប ខេត្តសៀមរាប នៅថ្ងៃទី២១ ខែតុលា ឆ្នាំ២០២១ លោក យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ និងជានាយកសាលាភូមិន្ទរដ្ឋបាល មានប្រសាសន៍ថា ការជួបជុំដាំកូនឈើនាពេលនេះ មានគោលបំណង២សំខាន់គឺ ទី១៖ ការដាំកូនឈើជាការរួមចំណែក នៃការរៀបចំសួនទេសភាព វប្បធម៌នៅក្នុងវត្តឥន្ទបត្តបុរីហៅអង្គរខាងជើង ដែលជាការរួមចំណែកយ៉ាងសំខាន់ក្នុងការអភិរក្ស និងអភិវឌ្ឍន៍ ក្នុងតំបន់រមណីយដ្ឋានអង្គរ និងជាចំណែកមួយជួយបំពេញបន្ថែម នូវកិច្ចប្រឹងប្រែងរបស់អាជ្ញាធរមូលដ្ឋាន និងអាជ្ញាធរជាតិអប្សរា នៅក្នុងក្របខណ្ឌ នៃការកែលំអ នូវបរិស្ថាននៅក្នុងតំបន់អង្គរក៏ដូចជាក្នុងខេត្តសៀមរាបបន្ថែមទៀត។
លោកបន្តថា ការដាំដើមឈើមានអត្ថន័យ និងប្រយោជន៍ច្រើនយ៉ាងសម្រាប់យើងទាំងអស់គ្នា ឈើបានផ្តល់ជាម្លប់ ផ្តល់នូវខ្យល់ដកដង្ហើមដែលមានគុណភាព ផ្តល់នូវឧកស៊ីហ្សែន ផ្តល់នូវអត្ថប្រយោជន៍សម្រាប់ការប្រើប្រាស់ក្នុងជីវភាពប្រចាំថ្ងៃ។ ការរួមគ្នាដាំដើមឈើនាពេលនេះជាការចូលរួមរំលឹកនិងតបស្នងសងគុណ ចំពោះធម្មជាតិដែលមានចំពោះយើង ។ ទី២៖ អាស្រ័យដោយទីតាំងភូមិសាស្ត្រតំបន់អង្គរជាតំបន់វប្បធម៌ ប្រវត្តិសាស្ត្រយូរអង្វែង នៃការកកើតព្រះពុទ្ធសាសនានៅខេត្តសៀមរាប ក៏ដូចជានៅក្នុងព្រះរាជាណាចក្រកម្ពុជាដំបូងគេ ហេតុនេះ ក្នុងនាមគណៈគ្រប់គ្រងសាលាភូមិន្ទរដ្ឋបាល បានសម្រេចយក ទីតាំងវត្តឥន្ទបត្តបុរី ជាចំណុចចាប់ផ្តើម នៃគម្រោងសាកល្បងការរៀបចំសួនទេសភាព វប្បធម៌ ស្របគ្នាជាមួយនឹងការគិតគូរ និងពិចារណា លើគម្រោងសាកល្បងនេះ ដោយគ្រោងនឹងជ្រើសរើសទីតាំង នៃទីអារាមណាមួយចំនួន ក្នុងក្របខ័ណ្ឌទូទាំងប្រទេស ដើម្បីរៀបចំសួនទេសភាពវប្បធម៌ជាបន្តទៅទៀត ដោយកន្លងមកគណៈគ្រប់គ្រងសាលា បានពិនិត្យ និងពិចារណាទៅលើវត្តមួយចំនួននៅខេត្តព្រៃវែង បាត់ដំបង ក្រចេះផងដែរ។
គម្រោងសាកល្បង នៃការរៀបចំសួនទេសភាពវប្បធម៌តាមវត្តអារាមជាគម្រោងមួយមានតម្លៃផ្សារភ្ជាប់ព្រះពុទ្ធសាសនា វប្បធម៌ ប្រវត្តិសាស្ត្ររបស់កម្ពុជា ជាមួយនឹង សាសនាដទៃៗទៀតដែលមានតាំងពីយូរលង់ណាស់មកហើយ រួមរស់ជាមួយគ្នាដោយសុខដុមរមនា ហើយយើងទាំងអស់គ្នានៅតែបន្តការរក្សាតម្លៃក្នុងការលើកកម្ពស់ព្រះពុទ្ធសាសនា លើកកម្ពស់វប្បធម៌ជាតិ ក៏ដូចជាការលើកកម្ពស់នូវភាពសុខដុមរមនានៅក្នុងសង្គមជាតិទាំងអស់គ្នា។ កាតព្វកិច្ចរបស់យើងទាំងអស់គ្នាគឺបន្តថែរក្សាសន្តិភាពដើម្បីបន្តការអភិវឌ្ឍប្រកបដោយចេរភាព។
លោក យក់ ប៊ុនណា មានប្រសាសន៍បន្ថែមថា ការចូលរួមដាំកូនឈើ គឺជាការចូលរួមតបស្នងសងគុណដល់បុព្វការីជន ដែលបានប្រឹងប្រែងក្នុងការកសាងប្រទេសជាតិឱ្យមានការរីកចម្រើនរហូតមកដល់សព្វថ្ងៃ និងជាគំរូសម្រាប់យុវជនជំនាន់ក្រោយនៅក្នុងការប្រឹងប្រែងកសាងសង្គមជាតិរបស់យើងជាបន្តទៅទៀត។
សូមជម្រាបថា កូនឈើចម្រុះប្រភេទចំនួន២ពាន់ដើម ត្រូវបានរួមគ្នាដាំនៅចំណុចព្រៃរិចរិលក្បែរវត្តឥន្ទបត្តបុរីហៅវត្តអង្គរខាងជើង ក្រោមការរៀបចំរបស់គណៈគ្រប់គ្រងវត្ត ដឹកនាំដោយ ព្រះចរណសោភ័ណ បណ្ឌិត គង់ សុភាព ថិតប្បញ្ញោ ព្រះរាជាគណ:ថ្នាក់កិត្តិយស ព្រះគ្រូចៅអធិការវត្តឥន្ទបត្តបុរីអង្គរខាងជើង សហការជាមួយអាជ្ញាធរជាតិអប្សរា។
ពិធីដាំប្រព្រឹត្តិទៅក្រោមព្រះវត្តមាន គណ:គ្រប់គ្រងវត្ត ភិក្ខុសាមណេរ និងវត្តមានរបស់ ឯកឧត្តម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ និងជានាយកសាលាភូមិន្ទរដ្ឋបាល ព្រមទាំង គណៈគ្រប់គ្រងសាលា និងលោកគ្រូអ្នកគ្រូ កម្មសិក្សាការីមន្ត្រីជាន់ខ្ពស់ក្រុមទី១វេនព្រឹក, លោកស្រី យូ សុភា អភិបាលរងខេត្ត តំណាងលោក ទៀ សីហា អភិបាលនៃគណៈអភិបាលខេត្តសៀមរាបរួមជាមួយថ្នាក់ដឹកនាំអង្គភាពមន្ទីរមួយចំនួនក្នុងខេត្ត, ឯកឧត្តម ឡុង កុសល អគ្គនាយករង តំណាង លោក ហង់ ពៅ អគ្គនាយកអាជ្ញាធរជាតិអប្សរា និងសហការី សរុបចំនួនប្រមាណជា២០០ អង្គ/នាក់៕
ដោយ ៖ គឿនវេត
-
ព័ត៌មានជាតិ៦ ថ្ងៃ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ៣ ថ្ងៃ ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
ព័ត៌មានជាតិ៣ ថ្ងៃ ago
បណ្ឌិត គិន ភា៖ «ហេតុអីមិនបន្ទោសអ្នកបោកគេ បែរជាបន្ទោសអ្នកត្រូវគេបោកទៅវិញ?»
-
ព័ត៌មានជាតិ៤ ថ្ងៃ ago
កម្ពុជានឹងមានភ្លៀងធ្លាក់ ១៥% ដល់ថ្ងៃទី ២៧ ដំណាច់ខែមីនា
-
ជីវិតកម្សាន្ដ១ សប្តាហ៍ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»
-
ព័ត៌មានជាតិ៤ ថ្ងៃ ago
ដីជាង ៤៣ ហិកតា នៅភូមិសាស្ត្រភ្នំ ១៥០០ ត្រៀមដាំស្ដារព្រៃឈើឡើងវិញ
-
សេដ្ឋកិច្ច៥ ថ្ងៃ ago
មន្ត្រីជាន់ខ្ពស់ធនាគារជាតិ៖ ក្រដាសប្រាក់ ៥ម៉ឺន រៀល មានគូសឆ្នូតកណ្តាលអាចប្តូរយកប្រាក់ថ្មីបានដោយឥតគិតថ្លៃ
-
សន្តិសុខសង្គម៤ ថ្ងៃ ago
បឋម៖ អគ្គិភ័យកំពុងឆេះផ្ទះពលរដ្ឋក្នុងបុរីពិភពថ្មីកំបូល