ក្រសួងកសិកម្ម ប្រាប់ពីមូលហេតុមួយចំនួននាំឱ្យ តម្លៃជី និងថ្នាំកសិកម្មបន្តឡើងថ្លៃ

ក្រសួងកសិកម្ម រុក្ខាប្រមាញ់ និងនេសាទ បានបង្ហាញពីកក្តាមួយចំនួនដែលធ្វើឱ្យតម្លៃជី និងថ្នាំកសិកម្មនៅកម្ពុជាបន្តឡើងថ្លៃ បង្កផលប៉ះពាល់ដល់ការបង្កបង្កើនផល និងការដាំដុះដំណាំផ្សេងៗរបស់ប្រជាកសិករ។ 

បើតាមក្រសួងកសិកម្ម បានបង្ហាញថា កត្តាដែលបណ្តាលឱ្យតម្លៃជី និងថ្នាំកសិកម្មនៅកម្ពុជាបន្តឡើងថ្លៃ គឺដោយសារនៅបណ្តាប្រទេសផលិតថ្នាំកសិកម្ម និងជីកសិកម្មនាំចេញ មានបញ្ហារអាក់រអួលផ្នែកផលិតកម្មដូចជា វត្ថុធាតុដើមមានការខ្វះខាតក្នុងការផ្គត់ផ្គង់ពីប្រទេសផលិតធំៗ មានដូចជា ប្រទេសចិន ប្រទេសម៉ាឡេស៊ី និងប្រទេសអារ៉ាប់។

ផលិតកម្មជីកសិកម្មត្រូវបានកាត់បន្ថយដោយកម្លាំងពលកម្មថយចុះ ដោយបញ្ហានៃការរីករាលដាលជំងឺកូវីដ-១៩ ដូចជានៅក្នុងប្រទេសចិន ប្រទេសថៃ និងប្រទេសវៀតណាម។ ការដឹកជញ្ជូនប្រើពេលវេលាយូរ និងមានតម្លៃខ្ពស់ដោយមានបញ្ហារីករាលដាលជំងឺកូវីដ-១៩។

ក្រសួងបានបន្តថា ក្រៅពីការបញ្ជាទិញពីប្រទេសកម្ពុជា នៅបណ្តាប្រទេសផ្សេងៗក៏បានបញ្ជាទិញដែរ ដូចនេះការផ្គត់ផ្គង់មិនគ្រប់តាមតម្រូវការ។ ការចំណាយលើការរៀបចំវេចខ្ចប់ឡើងវិញ ក៏ជាបន្ទុកមួយទៀត ដែលត្រូវការសំបកវេចខ្ចប់បោះពុម្ពជាភាសាខ្មែរ។

ចំណែកក្រុមហ៊ុនផ្គត់ផ្គង់ជី-ថ្នាំកសិកម្មមួយចំនួនធំ មិនបានទៅទិញដល់រោងចក្រផលិតផ្ទាល់ ដោយទិញតាមរយៈឈ្មួញកណ្តាល ជាហេតុធ្វើឱ្យជី-ថ្នាំកសិកម្មថ្លៃជាងតម្លៃនៅរោងចក្រផលិត។ ជាមួយគ្នានេះ តម្រូវការជីកសិកម្មក្នុងស្រុកមានក៏ការកើនឡើងច្រើនដែរ។

កក្តាទាំងនេះហើយទើបបានបណ្តាលឱ្យតម្លៃជី និងថ្នាំកសិកម្មនៅកម្ពុជាបន្តឡើងថ្លៃនាពេលបច្ចុប្បន្ននេះ៕

អត្ថបទ៖ សំអឿន