ព័ត៌មានជាតិ

ក្រុមហ៊ុនផ្គត់ផ្គង់សម្ភារៈទឹកស្អាតអូស្ត្រាលី ចាប់ដៃជាមួយក្រុមហ៊ុន K&K Pipe លើកកម្ពស់សុវត្ថិភាពទឹកស្អាតនៅកម្ពុជា

បានផុស

៥ years មុន

នៅ

ថ្ងៃអាទិត្យ ៣១ តុលា ២០២១

ដោយ

Sorn Phanith

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របតាមទស្សនៈវិស័យ “ការទទួលបានទឹកស្អាត និងសុវត្ថិភាពសម្រាប់មនុស្សគ្រប់គ្នា” និងបង្កើនកិច្ចសហការពង្រីកប្រព័ន្ធចែកចាយសម្ភារៈផ្គត់ផ្គង់ និងរក្សាទឹកស្អាតនៅកម្ពុជា ក្រុមហ៊ុន Tiger Water Solutions និងក្រុមហ៊ុន K&K Pipe Cambodia បានចុះអនុស្សរណៈនៃការយោគយល់គ្នា (MoU) ដើម្បីជំរុញភាពជាដៃគូបង្កើនផលិតផលគ្រប់គ្រងប្រព័ន្ធទឹកស្អាតទៅកាន់ទីផ្សារកម្ពុជាឱ្យកាន់តែទូលំទូលាយ។ ពិធីនេះត្រូវបានរៀបចំឡើងនៅព្រឹកថ្ងៃព្រហស្បតិ៍ ទី២៨ ខែតុលា ឆ្នាំ២០២១ នៅការិយាល័យក្រុមហ៊ុន K&K Pipe Cambodia។

លោក គឹម ប៊ុណ្ណា អគ្គនាយកនៃក្រុមហ៊ុន K&K Pipe Cambodia Co. Ltd បានលើកឡើងថា ភាពជាដៃគូរវាងក្រុមហ៊ុនទាំងពីរ ជាការបើកទំព័រមួយថ្មីក្នុងវិស័យផ្គត់ផ្គង់ទឹកស្អាត វិស័យកសិកម្ម និងវិស័យឧស្សាហកម្ម។ ទន្ទឹមគ្នានេះដែរ ភាគជាដៃគូរវាងក្រុមហ៊ុនទាំងពីរនេះកើតឡើងបាន ដោយសារក្រុមហ៊ុនទាំងពីរមានទស្សនវិស័យ និងឆន្ទៈដូចគ្នា ផ្តោតសំខាន់លើការផលិតនូវផលិតផលទុយយោ PE និងអាងស្តុកទឹក ដែលមានគុណភាពខ្ពស់សម្រាប់ផ្គត់ផ្គង់ក្នុងទីផ្សារប្រទេសកម្ពុជា។

លើសពីនេះទៅទៀត លោកអគ្គនាយកនៃក្រុមហ៊ុន K&K Pipe Cambodia សង្ឃឹមថា ក្រុមហ៊ុនទាំងពីរនឹងគាំទ្រគ្នាទៅវិញទៅមកក្នុងការនាំយកផលិតផលទាំងពីរទៅកាន់ទីផ្សារអន្តរជាតិ។

ស្របគ្នានេះដែរ លោក Matthew Redshaw ប្រធានក្រុមហ៊ុន Tiger Water Solutions បានមានប្រសាសន៍ថា លោករីករាយដែលបានចូលរួមជាមួយ K&K Pipe Cambodia ព្រមទាំងជឿជាក់ថា ក្រុមហ៊ុនទាំងពីរនឹងគាំទ្រគ្នា ក្នុងការផ្តល់បច្ចេកវិទ្យាចុងក្រោយពីប្រទេសអូស្ត្រាលីចូលមកប្រទេសកម្ពុជា។

“ក្រុមហ៊ុនទាំងពីរឯកភាពនឹងការរៀបចំសកម្មភាពបណ្តុះបណ្តាលបច្ចេកទេសទៅវិញទៅមក និងមានផែនការផ្លាស់ប្តូរទស្សនកិច្ចសិក្សាទៅប្រទេសអូស្ត្រាលីនៅពេលស្ថានការនៃជំងឺកូវីដ-១៩ថមថយ ព្រមទាំងចូលរួមលើកកម្ពស់លទ្ធភាពទទួលបានទឹកស្អាត និងមានសុវត្ថិភាពសម្រាប់មនុស្សគ្រប់គ្នា” នេះជាការបញ្ជាក់បន្ថែមរបស់លោក Matthew Redshaw ប្រធានក្រុមហ៊ុន Tiger Water Solutions។

គួរបញ្ជាក់ផងដែរថា ក្រុមហ៊ុន Tiger Water Solutions ជាក្រុមហ៊ុនផលិតធុងទឹកតាមស្ដង់ដារបច្ចេកទេសរបស់ប្រទេសអូស្ត្រាលី និងចែកចាយនៅទូទាំងអាស៊ីអាគ្នេយ៍។ ក្រមហ៊ុននេះ មានបទពិសោធន៍ផលិតធុងត្រងទឹកភ្លៀង ផ្គត់ផ្គង់សម្ភារៈទឹកស្អាត កសាងអាងស្តុកទឹក តបណ្តាញទឹក កសាងប្រព័ន្ធធារាសាស្ត្រ តភ្ជាប់បណ្តាញអគ្គិសនី ព្រមទាំងគ្រប់គ្រងកាកសំណល់តាមស្តង់ដារបច្ចេកទេសអន្តរជាតិ។

ចំណែកក្រុមហ៊ុន K&K Pipe Cambodia ជាក្រុមហ៊ុនផលិតបំពង់ PE និងប្រព័ន្ធបំពង់សម្រាប់ឧស្សាហកម្មទឹក ប្រព័ន្ធធារាសាស្ត្រ និងកម្មវិធីឧស្សាហកម្មផ្សេងៗទៀតនៅកម្ពុជា។ តាមរយៈបទពិសោធន៍ជាង២០ឆ្នាំ ក្រុមហ៊ុនយល់យ៉ាងច្បាស់ពីបញ្ហាប្រឈមដែលឧស្សាហកម្មទឹកបានជួបប្រទះ។ ក្រុមហ៊ុនបានធ្វើការងារលើវិស័យទឹកស្អាតយ៉ាងសកម្ម សហការជាមួយអតិថិជន និងឧស្សាហកម្មនានា ដើម្បីផ្តល់ដំណោះស្រាយទឹកស្អាត ទឹកសុវត្ថិភាព និងគំនិតច្នៃប្រឌិតថ្មីនាពេលបច្ចុប្បន្ន និងទៅថ្ងៃអនាគត៕

Related Topics:ការចុះអនុស្សរណៈ

សេចក្ដីជូនដំណឹង៤ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា