សាលារៀនគ្រប់កម្រិត ក្នុងខេត្តបន្ទាយមានជ័យ បើកដំណើរការ ដូចការគ្រោងទុក វាលែងតែតំបន់ហានិភ័យខ្ពស់

សាលារៀន​គ្រប់​កម្រិត​ទាំង​អស់ទូទាំង​ខេតបន្ទាយមានជ័យ នៅថ្ងៃទី ១ ខែវិច្ឆិកា បានបើកដំណើរការបង្រៀនសិស្សឡើងវិញ​ដូច​មានការគ្រោងទុក​ ក្នុងនោះមានសាលា​សារដ្ឋ និង​ឯកជនមានចំនួន​ ៥១២។

ចំណែកសាលារៀន​នៅ​តំបន់​ហានិភ័យ​ខ្ពស់​ចំណុច​ខ្លះ​នៃ​ស្រុក​ទាំង​ ៧ និង​នៅ​ទូទាំង​ក្រុង​សិរីសោភ័ណ នៅ​មិនទាន់​បើក​ដំណើរការ​នៅឡើយ​នោះទេ។

​លោក ឈូ ប៊ុន​រឿង ប្រធាន​មន្ទីរអប់រំ យុវជន និង​កីឡា ខេត្តបន្ទាយមានជ័យ បាន​ប្រាប់​អ្នកយកព័ត៍មានឲ្យដឹងថា ពេលដែលបើកសាលារៀនឡើងវិញ មន្ទីរអប់រំ និង​រដ្ឋបាលខេត្ត ពិសេស​សាលារៀន​នីមួយៗ ​ត្រូវអនុវត្ត​ផែនការ​នេះ​ឲ្យបាន​សម្រេច។​

លោក​បានបញ្ជាក់​ឲ្យ​ដឹង​បន្តទៀតថា ការបើក​ដំណើរការ​សាលារៀន​ឡើងវិញ​គ្រប់​កម្រិត​នេះ​ បន្ទាប់ពី​ក្រសួង​អប់រំ​ បានធ្វើ​ការវាយតម្លៃ​លើ​ដំណើរ​ការបង្រៀន និង​រៀន​តាម​បណ្តុះ​សម្រាប់​គ្រឹះស្ថានសិក្សា​សាធារណៈ និង​ឯកជន ក្នុងភូមិ​សាស្ត្រ​ដែលមាន​ហានិភ័យ​ទាប​ប្រមាណ ​៣០​ភាគរយ ប្រកបដោយ​សុវត្ថិភាព និង​ប្រុងប្រយ័ត្ន​។​

ការបើក​ដំណើរការ​បង្រៀន​ឡើងវិញ​គ្រប់​សាលា​គ្រប់​កម្រិត​ដោយ​កំណត់​១​ថ្នាក់ មាន ១៥ ទៅ ២០​នាក់ និង​ផ្លាស់​វេន​គ្នា និង​បន្ត​អនុវត្ត​នូវ​គម្លាត​សុ​វត្តិភាព និង​វិធានការ​សុខាភិបាល​ចាំបាច់​នានា​ចំពោះ​ភូមិសាស្ត្រ​ណា​មាន​ហានិភ័យ​ទាប​។ ចំពោះ​ភូមិសាស្ត្រ​ដែលមាន​ហានិភ័យ​មធ្យម និង​ខ្ពស់​ផ្តល់​អាទិភាព​ទៅលើ​សិស្ស​ថ្នាក់​ទី ​៩ និង​ទី​១២ ហើយ​កម្រិត​ថ្នាក់​ផ្សេងទៀត​នៅ​មធ្យមសិក្សា និង​បឋមសិក្សា ឱ្យ​រៀន​នៅតាម​សាលារៀន​៕

អត្ថបទ៖ វ៉ាន់ ណាង