សាលារៀនគ្រប់កម្រិត នៅភ្នំពេញជាង ៥០០ បើកដំណើរការឡើងវិញនៅព្រឹកនេះ

សាលារៀនរដ្ឋ និងឯកជន ចាប់ពីកម្រិតមតេយ្យសិក្សាដល់បឋមសិក្សា សរុបចំនួន ៥៣១ សាលា បានបើកដំណើរការឡើងវិញនៅព្រឹកថ្ងៃទី ១ ខែវិច្ឆិកា ឆ្នាំ២០២១នេះ។

លោក ហែម ស៊ីណារ៉េត ប្រធានមន្ទីរអប់រំយុវជន និងកីឡា រាជធានីភ្នំពេញមានប្រសាសន៍ថា ក្នុងចំណោមសាលា មតេយ្យសិក្សា និងបឋមសិក្សាទាំងនោះមានសាលាមតេយ្យរដ្ឋចំនួន១៨ សាលាសាលាបឋមសិក្សារដ្ឋចំនួន ១៦៣ សាលាសរុបចំនួន១៨១សាលា។ ចំណែកសាលាមតេយ្យសិក្សាឯកជនមានចំនួន ១៨ សាលា និងសាលាមឋមសិក្សាឯកជនមានចំនួន ៣៣២សាលា សរុបចំនួន៣៥០សាលា។

លោក ហែម ស៊ីណារ៉េតបានបន្តទៀតថា ការបើកសាលារៀន ក្រសួងតម្រូវឱ្យដាក់១ថ្នាក់ពី ១៥ ទៅ២០នាក់ប៉ុណ្ណោះ។ដូចនេះសាលានីមួយៗ ត្រូវបែងចែកសិស្សរៀនឆ្លាស់គ្នាយ៉ាងមិចដើម្បីធានាបានការសិក្សាបានទាំងអស់គ្នាហើយមិនមានការឆ្លងរាលដាលជំងឺកូវីដ១៩នៅក្នុងសាលា។

ប្រធានមន្ទីរអបរំបានបន្ថែមថា សម្រាប់ការបើកសាលានេះមិនមានគោលការណ៍យកសំណាករកជំងឺកូវីដ១៩ទៅលើលោកគ្រូអ្នកគ្រូនៅសាលារដ្ឋដូចកាលបើកសាលាដំបូងនៅថ្ងៃទី ១៥ កញ្ញា និងក្រោយបុណ្យភ្ជុំនោះទេ។

លោកបានឱ្យដឹងទៀតថាចំពោះសាលាឯកជនវិញអាស្រ័យទៅលើសាលានីមួយៗ។ ប៉ុន្តែសាលាមានធនធានច្រើនអាចនឹងធ្វើតេស្តទៅលើគ្រូមុនចូលបង្រៀន៕

អត្ថបទ៖ សំអឿន