ព័ត៌មានជាតិ
ឧបការី អ.ស.ប ធ្វើទស្សនកិច្ចស្វែងយល់ការងារ នៅសារៈមន្ទីរប្រល័យពូជសាសន៍ទួលស្លែង
ក្នុងកំឡុងពេល បំពេញទស្សនកិច្ចផ្លូវការនៅកម្ពុជា លោក Khaled Khkary ឧបការីអគ្គលេខាធិការ អង្គការសហប្រជាជាតិ អ.ស.ប កាលពីរសៀលនាថ្ងៃទី ១២ ខែវិច្ឆិកា ឆ្នាំ ២០២១ បានចាប់អារម្មណ៍ខ្ពស់ទៅធ្វើទស្សនកិច្ចស្វែងយល់ការងារ នៅសារៈមន្ទីរប្រល័យពូជសាសន៍ទួលស្លែង។
នៅក្នុងដំណើរទស្សនកិច្ចនេះ ក៏មានការចូលរួមអមដំណើរពីលោក កែវ រ៉េមី រដ្ឋមន្ត្រីប្រតិភូអមនាយករដ្ឋមន្ត្រី និងជា អនុប្រធានអចិន្ត្រៃយ៍ នៃក្រុមការងាររាជរដ្ឋាភិបាលសម្រាប់ទ្រទ្រង់ដំណើរការ របស់អង្គជំនុំជម្រះវិសាមញ្ញក្នុង តុលាការកម្ពុជា (អ.វ.ត.ក) ហៅកាត់ថា សាលាក្តីខ្មែរក្រហម លោកស្រី Pauline Tamesis អ្នកសម្របសម្រួលរបស់អ.ស.បប្រចាំកម្ពុជា, លោក ក្រាញ់ តូនី ប្រធានរដ្ឋបាលស្តីទីនៃអ.វ.ត.ក. លោក ថោង សុជាតិ មន្ត្រីជាន់ខ្ពស់នៃ អ.វ.ត.ក. និងលោក ហង្ស និស្ស័យ ប្រធានសារៈមន្ទីរប្រល័យពូជសាសន៍ទួលស្លែង។
ក្រោយពីលោកប្រធានសារៈមន្ទីរប្រល័យពូជសាសន៍ទួលស្លែង បានរៀបរាប់យ៉ាងលម្អិតទាក់ទងទៅ នឹងព្រឹត្តិការណ៍ និងអំពើសាហាវព្រៃផ្សៃ ដែលបានកើតឡើងនៅក្នុងគុកទួលស្លែង ក្រោមការគ្រប់គ្រងរបស់ ឌុច ដែលជាអ្នកទទួលខុសត្រូវខ្ពស់បំផុត នៅក្នុងសំណុំរឿង០០១ នៃ អ.វ.ត.ក លោក Khaled Khkary បានសម្ដែងនូវសមានទុក្ខ និងការឈឺចាប់ជាមួយជនរងគ្រោះទាំងអស់ ដែលបានស្លាប់នៅក្នុងគុកទួលស្លែង ព្រមទាំងសម្ដែងនូវសមានចិត្តជាមួយលោក ប៊ូ ម៉េង និង ជុំ មី ដែលជាអ្នករស់រានមានជីវិតពីគុកទួលស្លែង។
ឆ្លៀតក្នុងឪកាសនោះដែរ លោក កែវ រ៉េមី បានជម្រាបជូនលោកឧបការីអគ្គលេខាធិការ អ.ស.ប. អំពីការគាំទ្ររបស់រាជរដ្ឋាភិបាល និងអំពីសមិទ្ធផល ដែលបាននិងកំពុងសម្រេចបានដោយអ.វ.ត.ក។ ជាពិសេសលោកក៏បានគូសបញ្ជាក់អំពីលក្ខណៈពិសេសរបស់អ.វ.ត.ក រួមមាន៖ ទី១- តុលាការនេះកូនកាត់នេះ បានកាត់សេចក្ដីមេដឹកនាំជាន់ខ្ពស់នៃរបបខ្មែរក្រហមចំពោះឧក្រិដ្ឋកម្ម ដែលបានកើតឡើងនៅក្នុងប្រទេស របស់ខ្លួន។ ទី២- តុលាការក៏បានអនុញ្ញាតឲ្យជនរងគ្រោះចូលរួម ក្នុងដំណើរការកាត់សេចក្ដី ក្នុងនាមជាដើមបណ្តឹងរដ្ឋប្បវេណី ដែលតុលាការអន្តរជាតិដ៏ទៃទៀត មិនបានធ្វើដូចតុលាការនេះទេ។
ទី៣- គំរូកាត់សេចក្ដី របស់តុលាការកូនកាត់នេះ ត្រូវបានអន្តរជាតិទទួលស្គាល់ ក្នុងការរក្សាបាននូវអធិបតេយ្យភាពទាំងស្រុងរបស់កម្ពុជា ហើយមានប្រទេសមួយចំនួនដូចជា៖ បង់ក្លាដែស ស្រីលង្កា កែនយ៉ា សេណេកាល និងអាហ្រ្វិកកណ្ដាល មកដកស្រង់បទពិសោធន៍ និងយកទៅរៀបចំបង្កើតតុលាការប្រហាក់ប្រហែលគ្នា។ និងទី៤-តុលាការកូនកាត់នេះ ក៏បានកាត់សេចក្ដីផ្តល់យុត្តិធម៌ ដល់ជនរងគ្រោះទាំងអស់ នៅក្នុងរបបប្រល័យពូជសាសន៍ខ្មែរក្រហម និងរក្សាបាននូវការបង្រួបបង្រួមជាតិ ព្រមទាំងបានចំណាយតិចប្រមាណ ២២លានដុល្លារអាមេរិកក្នុងមួយឆ្នាំ។ ចំណែកឯតុលាការអន្តរជាតិផ្សេងទៀត ចំណាយអស់ប្រមាណ ១០០លានដុល្លារអាមេរិក ក្នុងមួយឆ្នាំ។
ជាការឆ្លើយតប លោកឧបការី បានសម្តែងការអរគុណ ចំពោះអ្នកពាក់ព័ន្ធទាំងអស់ ក្នុងការទទួលរៀបចំទស្សនកិច្ចនេះបានយ៉ាងល្អប្រសើរ និងវាយតម្លៃខ្ពស់ ចំពោះសមិទ្ធផលការងារ ដែលកំពុងស្រេចបាន ដោយសាលាក្ដីខ្មែរក្រហម។ ជាងនេះទៅទៀត លោកឧបការី ក៏បានលើកឡើងថា កម្ពុជាពិតជាសម្រេចបាននូវ សមិទ្ធផលទាំងនោះប្រកបដោយភាពម្ចាស់ការក្នុងការគ្រប់គ្រង (Ownership) និងការដឹកនាំ (Leadership) ប្រកបដោយការទទួលខុសត្រូវខ្ពស់៕
អត្ថបទ៖ កោះកែវ
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៣ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សេដ្ឋកិច្ច១ សប្តាហ៍ ago
តាសក់ផ្អែម ៥ តោន របស់ កសិករម្នាក់ លក់ចេញអស់ ក្រោយសហគមន៍កសិកម្មជួយរកទីផ្សារ
-
ព័ត៌មានអន្ដរជាតិ១ សប្តាហ៍ ago
នាឡិកា ៦ គ្រឿងរបស់កូនពៅសេដ្ឋី ឥណ្ឌា ដែលខំសន្សំទុក មានមួយមេ Facebook ទាក់ចិត្តខ្លាំង
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៦ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៤ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៤ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ