ស្ពាន​​ព្រះមុនីវង្ស ចាស់ថ្មី ធ្លាប់​តែ​កកស្ទះចរាចរណ៍ ពេលនេះស្ងប់ស្ងាត់

អាជ្ញាធរសង្កាត់ច្បារអំពៅទី១និងទី២ ខណ្ឌច្បារអំពៅរាជធានីភ្នំពេញបានឲ្យដឹងថា នៅថ្ងៃទី៤ខែធ្នូនេះទិដ្ឋភាពលើកំណាត់ស្ពានព្រះមុនីវង្សចាស់ ថ្មី មានភាពស្រឡះ ខុសផ្លែកពីមុនៗ ដែលមាន​ការ​កកស្ទះចរាចរណ៍សឹងគ្រប់ម៉ោង។

តាមប្រភពពីលោក ជូ ចាន់នី ជំនួយការសាលាសង្កាត់ច្បារអំពៅទី២បានឲ្យដឹងថា នៅព្រឹកថ្ងៃទី៤ ខែធ្នូនេះការធ្វើចរាចរណ៍លើកំណាត់ស្ពានព្រះមុនីវង្សចាស់ក្នុងភូមិសាស្រ្តសង្កាត់ច្បារអំពៅទី២មានភាពស្ងប់ស្ងាត់ខុសផ្លែកពីមុនកកស្ទះចរាចរណ៍សឹងគ្រប់ម៉ោង។

ដោយប៉ែកខាងស្ពានព្រះមុនីវង្សថ្មី ក្នុងភូមិសាស្រ្តសង្កាត់ច្បារអំពៅទី១វិញលោក ពៅ ហួត ចៅសង្កាត់ច្បារអំពៅ​ទី១បានប្រាប់ថា ថ្ងៃនេះការធ្វើចរាចរណ៍លើកំណាត់ស្ពានព្រះមុនីវង្សថ្មីពិតជាស្ងប់ស្ងាត់មែន ព្រោះតែបងប្អូនប្រជាពលរដ្ឋលោកមិនចេញពីផ្ទះព្រោះខ្លាចឆ្លងជំងឺកូវីដ១៩។ លោកចៅសង្កាត់សូមគាំទ្ រនិងសូមកោតសសើដល់បងប្អូនប្រជាពលរដ្ឋក្នុងមូលដ្ឋានសង្កាត់ច្បារអំពៅទី១ ដែលភាគច្រើនលោកមិនចេញពីផ្ទះសម្បែង ដោយមិនចាំបាច់ឲ្យអាជ្ញាធរដាក់ចេញនូវវិធានការណ៍បិទភូមិនោះ។ចំពោះពាក្យចចាមអារាមថា មានការបិទផ្លូវឬបិទភូមិនោះគឺពុំពិតឡើយ។

ក្នុងនោះលោកចៅសង្កាត់ក៏ដូចជាប្រជាពលរដ្ឋក្នុងសង្កាត់ច្បារអំពៅទី១ក៏ដូចជាក្នុងខណ្ឌច្បារអំពៅសូមឲ្យសមត្ថកិច្ច​ជួយ​ចាត់វិធានការណ៍តាមផ្លូវច្បាប់ ចំពោះបណ្តាញសង្គមណា ដែលមានចេតនាបំភ្លៃពត័មានពីការបិទផ្លូវនិងបិទភូមិនោះ។ ចំពោះប្រភពពីប្រជាពលរដ្ឋភាគច្រើនក្នុងខណ្ឌច្បារអំពៅបានប្រាប់កម្ពុជាថ្មីថា គ្មានការបិទភូមិ ឬបិទផ្លូវដូចពាក្យចចាមអារាមដែលកំពុងឆ្លៀតពេលបំផុសជាប្រយោជន៍ឲ្យអ្នកលេងសង្គមហ្វេសប៊ុកគាំទ្រនូវព័ត៌មានរបស់ហ្វេសប៊ុកនោះ ព្រោះថា ប្រជាពលរដ្ឋលោកសុខចិត្តរស់នៅក្នុងផ្ទះរៀងៗខ្លួនដើម្បីកុំឲ្យសមាជិកក្នុងគ្រួសារមានឆ្លងជំងឺនេះ។ដូច្នេះសូមបញ្ឈប់ការបំភ្លៃពត័មាននេះបន្តទៀត។ព្រោះប្រជាពលរដ្ឋលោកមិនចង់ចេញពីផ្ទះដោយខ្លួនឯង ដោយគ្មានការបំភិតបំភ័យឬមានការគំរាមកំហែងពីអាជ្ញាធរនិងសមត្ថកិច្ចណាមួយឡើយ៕

នរា