ព័ត៌មានជាតិ

លោកស្រី លីអាយលែន ចាត់ទុកកម្ពុជាជាជើងឯកក្នុងការគ្រប់គ្រងជំងឺកូវីដ១៩

បានផុស

២ years មុន

នៅ

ថ្ងៃចន្ទ ១៥ វិច្ឆិកា ២០២១

ដោយ

លោក ស្រី វេជ្ជបណ្ឌិត លី អាយលែនប្រធានអង្គការសុខភាពពិភពលោកប្រចាំនៅកម្ពុជាបានមានប្រសាសន៍ថា ប្រទេសកម្ពុជាគឺជាប្រទេសជើងឯកមួយដែលអាចរក្សាតុល្យភាពការគ្រប់គ្រងហានិភ័យជំងឺកូវីដ១៩និងការបើកសេដ្ឋកិច្ចនិងសង្គមឡើងវិញប្រកបដោយចីរភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងប្រាប់អ្នកសារព័ត៌មាននៅព្រលានយន្តហោះភ្នំពេញអន្តរជាតិ នៅល្ងាចថ្ងៃទី១៥ វិច្ឆិកាពេលអញ្ជើញទៅទទួលវ៉ាក់សាំង Astrazenecaជាង៣២ម៉ឺនដូសទៀត ផ្ដល់តាមរយៈយន្ដការកូវ៉ាក់ លោក ស្រី បានបន្តថា « វាជាពេលវេលាដ៏សមស្របមួយដែលកម្ពុជាបើកសេដ្ឋកិច្ចនិងសង្គមឡើងវិញខណៈប្រទេសនេះបានគ្រប់ក្រជំងឺកូវីដ១៩បានល្អប្រសើរ»។

លោកស្រីបានបន្តថា ការបើកប្រទេសឡើងវិញនេះ ដោយសារអាស្រ័យលើការចាក់វ៉ាក់សាំងព្រោះថា វ៉ាក់សាំងបានជួយកាត់បន្ថយពីជំងឺធ្ងន់ធ្ងរមកស្រាល ការស្លាប់និងការចម្លងផងដែរ។ ប៉ុន្តែវ៉ាក់សាំងមិនអាចជួយបាន១០០ភាគរយនិងមិនមែនជាដំណោះស្រាយ១០០ភាគរយដែរ។ ដូច្នេះតួនាទីបុគ្គលម្នាក់ៗមានសារសំខាន់ណាស់ក្នុងការធានាការចម្លងចូលក្នុងសហគមន៍របស់ខ្លួន។

លោកស្រីឱ្យដឹងទៀតថា «យើងកំពុងស្ថិតនៅក្នុងការរៀនសូត្រមួយថ្មីតើជោគជ័យឬបរាជ័យអាស្រ័យដោយមានការចូលរួមពីបុគ្គលម្នាក់។ បើមានការចូលរួមមានការគ្រប់គ្រងបានល្អនោះវានឹង ជោគជ័យតែបើមិនគ្រប់គ្រងបានល្អទេវានឹងធ្វើឱ្យមានករណីកើនឡើងនៃជំងឺកូវីដ១៩ឡើងវិញ»។

លោកស្រី រំពឹងថា « អង្គការសុខភាពពិភពលោកនឹងរើសបានម៉ូឌែលមួយល្អដែលជោគជ័យហើយខ្ញុំសូមជូនពរដល់ប្រទេសកម្ពុជាទទួលបានជោគជ័យ»។

គួរបញ្ជាក់ថា ប្រមុខរដ្ឋាភិបាលកម្ពុជាសម្តេចតេជោហ៊ុន សែន បានប្រកាសបើកប្រទេសឡើងវិញកាលពីថ្ងៃទី០១ខែវិច្ឆិកា ឆ្នាំ២០២១ ក្រោយពីស្ថានភាពជំងឺកូវីដបានធូរស្រាលនិងកម្ពុជាបានចាក់វ៉ាក់សាំងជិត៨៨ភាគរយក្នុងចំណោមប្រជាជនសរុប១៦លាននាក់ ដែលជាអត្រាមួយខ្ពស់នៅក្នុងតំបន់ក៏ដូចជាពិភពលោក៕

ដោយ ៖ សំអឿន