ព័ត៌មានជាតិ

អាជ្ញាធរខេត្តព្រះសីហនុ ហាមអ្នកគ្មានកាតចាក់វ៉ាក់សាំងចូលអង្គភាពឬមន្ទីរខេត្ត

បានផុស

២ years មុន

នៅ

ថ្ងៃអង្គារ ១៦ វិច្ឆិកា ២០២១

ដោយ

Sokhom Khon

ប្រជាពលរដ្ឋឬភ្ញៀវទេសចរណាដែលមិនបានចាក់វ៉ាក់សាំងមិនត្រូវបានអនុញ្ញាតឱ្យចូលសាលាខេត្ត មន្ទីរឬអង្គភាពខេត្តព្រះសីហនុឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងកិច្ចប្រជុំ ស្តីពីការអនុវត្តវិធានសុវត្ថិភាពទេសចរណ៍ (SOP)ដើម្បីត្រៀមលក្ខណៈទទួលទេសចរណ៍អន្តរជាតិវ៉ាក់សាំងកាលពីរសៀលថ្ងៃទី១៥ ខែវិច្ឆិកា លោក គួច ចំរើន អភិបាលខេត្តព្រះសីហនុ បានណែនាំដល់ប្រធានមន្ទីរអង្គភាពទាំងអស់ ត្រូវចាប់ផ្តើមអនុវត្តដោយផ្តោតសំខាន់លើប្រជាពលរដ្ឋ មន្ត្រីរាជការ កងកម្លាំងប្រដាប់អាវុធ និងអង្គការសង្គមស៊ីវិល ដែលត្រូវចូលទៅមន្ទីរ អង្គភាពណាមួយ ឬចូលសាលាខេត្ត សាលាក្រុង ស្រុក ឃុំសង្កាត់ ត្រូវបង្ហាញប័ណ្ណចាក់វ៉ាក់សាំងជាមុន ទើបអនុញ្ញាតឱ្យចូល។

លោកអភិបាលខេត្តបានបន្តថា « យើងចាប់ផ្តើមត្រួតពិនិត្យប័ណ្ណចាក់វ៉ាក់សាំងប្រសិនប្រជាពលរដ្ឋ ឬភ្ញៀវទេសចរណាមិនបានចាក់វ៉ាក់សាំង ត្រូវមានលិខិតបញ្ជាក់សុខភាពពីក្រុមគ្រូពេទ្យទើបអនុញ្ញាតឱ្យចូល»។

លោកអភិបាលខេត្ត បានប្រកាសជូនសាធារណជនដែលមិនមានឯកសារដើម្បីចាក់វ៉ាក់សាំង សូមទៅកាន់សាលាឃុំ សង្កាត់ ឱ្យអាជ្ញាធរបញ្ជាក់លិខិតជូនដើម្បីមានឯកសារគ្រប់គ្រាន់ក្នុងការចាក់វ៉ាក់សាំងបានទាន់ពេលវេលា។

លោក គួច ចំរើន បានបញ្ជាក់ថា ដោយឡែកចំពោះអ្នករត់តាក់ស៊ីដឹកភ្ញៀវ ក៏ត្រូវមានប័ណ្ណចាក់វ៉ាក់សាំងបើមិនមានប័ណ្ណចាក់វ៉ាក់សាំង មិនអនុញ្ញាតឱ្យចូលអាកាសយានដ្ឋានអន្តរជាតិឡើយ ហើយអាកាសយានដ្ឋានអន្តរជាតិ ត្រូវគ្រប់គ្រងអ្នករត់តាក់ស៊ីឱ្យបានត្រឹមត្រូវ ដើម្បីចៀសវាងការដណ្តើមភ្ញៀវគ្នានាំឱ្យបាត់បង់សណ្តាប់ធ្នាប់។

លោកអភិបាលខេត្តបានបន្តទៀតថា ចំពោះភ្ញៀវទេសចរណ៍ចូលតាមផ្លូវទឹក មុនពេលចុះពីលើនាវាត្រូវធ្វើតេស្តរកមេរោគកូវីដជាមុនសិន ដូច្នេះត្រូវជូនដំណឹងមករដ្ឋបាលខេត្តជាមុនដើម្បីងាយស្រួលត្រៀមក្រុមគ្រូពេទ្យចុះយកសំណាកពីភ្ញៀវបានទាន់ពេលវេលា។

លោកអភិបាលខេត្តបានបញ្ជាក់បន្ថែមទៀតថា ជាមួយគ្នានេះរាជរដ្ឋាភិបាលក៏អនុញ្ញាតឱ្យញែកភ្ញៀវទេសចរជាពីរ ដោយទី១-ទេសចរណ៍ដែលបានចាក់វ៉ាក់សាំងគ្រប់ដូស អនុញ្ញាតឱ្យគាត់ធ្វើតេស្តរហ័ស ដោយមិនចាំបាច់ធ្វើចត្តាឡីស័ក។ ទី២-ចំពោះភ្ញៀវមិនទាន់ចាក់វ៉ាក់សាំងចូលមកកម្ពុជា តម្រូវឱ្យពួកគាត់ធ្វើតេស្ត PCR ពីរលើក និងធ្វើចត្តាឡីស័ក ១៤ថ្ងៃ ទើបអនុញ្ញាតឱ្យគាត់ធ្វើដំណើរកម្សាន្ត៕

អត្ថបទ៖ សំអឿន

Related Topics:រដ្ឋបាលខេត្តព្រះសីហនុ

Up Next

ប្រឡងឌីប្លូម បេក្ខជនម្នាក់ ដាក់ប្រឡងបន្ទប់ដាច់ដោយឡែក

Don't Miss

ពលរដ្ឋចំនួន ៦២៧គ្រួសារ រងគ្រោះដោយសារទឹកជំនន់ នៅរតនៈគិរី ទទួលអំណោយមនុស្សធម៌ ពីកាកបាទក្រហមកម្ពុជា